ଭୁବନେଶ୍ୱର,୨୫।୭(ବ୍ୟୁରୋ): ନୂଆ ରୂପ ପାଇବ ଇନ୍ଫୋଭ୍ୟାଲି। ଓ୍ବେବ୍ ଡେଭଲପ୍ମେଣ୍ଟ ଏବଂ ଡିଜିଟାଲ ମାର୍କେଟିଂ କ୍ଷେତ୍ରରେ କାର୍ଯ୍ୟ କରୁଥିବା କମ୍ପାନୀଗୁଡିକ ପାଇଁ ଭୁବନେଶ୍ୱର ଏବେ ପ୍ରଥମ ପସନ୍ଦ ପାଲଟିଥିବାରୁ ଏହାକୁ ଦୃଷ୍ଟିରେ ରଖି ଇନ୍ଫୋଭ୍ୟାଲିକୁ ବିକଶିତ କରାଯିବ। ଏହି ଅଞ୍ଚଳରେ ଫ୍ଲାଏଓଭର ନିର୍ମାଣ ସହିତ ଗମନାଗମନ ବ୍ୟବସ୍ଥା ସୁଦୃଢ଼ୀକରଣ କରାଯିବ। ଟ୍ରାଫିକ୍ ସମସ୍ୟାକୁ ଦୃଷ୍ଟିରେ ରଖି କମିଶନରେଟ୍ ପୋଲିସ୍ ଦ୍ୱାରା ଟ୍ରାଫିକ୍ ବ୍ୟବସ୍ଥାକୁ ସୁବ୍ୟବସ୍ଥିତ କରାଯିବ। ଇନ୍ଫୋଭ୍ୟାଲି ଅଞ୍ଚଳକୁ ବିକଳ୍ପ ରାସ୍ତା ବ୍ୟବସ୍ଥା ମଧ୍ୟ କରାଯିବ। ଏହାସହ ଉଭୟ ଇନ୍ଫୋସିଟି ଓ ଇନ୍ଫୋଭ୍ୟାଲି ଅଞ୍ଚଳକୁ ମୋ ବସ୍ ଭଳି ସାଧାରଣ ପରିବହନ ବ୍ୟବସ୍ଥା ଆରମ୍ଭ କରିବା ଉପରେ ଗୁରୁତ୍ୱ ଦେଇଛନ୍ତି ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା, କ୍ରୀଡ଼ା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା। ବୁଧବାର ଇନ୍ଫୋଭ୍ୟାଲି ପରିଦର୍ଶନ କରିବା ଅବସରରେ ମନ୍ତ୍ରୀ ଏହାର ସାମଗ୍ରିକ ବିକାଶ ଉପରେ ଗୁରୁତ୍ୱାରୋପ କରିଛନ୍ତି।
ଆଇଟି ମ୍ୟାପ୍ରେ ନିଜର ସ୍ଥିତି ମଜଭୁତ କରିବା ସହ ଦେଶର ନୂଆ ଆଇଟି ହବ୍ରେ ପରିଣତ ହୋଇଥିବା ଭୁବନେଶ୍ୱରକୁ ଯେପରି ଦେଶ ବିଦେଶର ବଡ଼ ବଡ଼ ଆଇଟି କମ୍ପାନୀମାନଙ୍କୁ ଆକୃଷ୍ଟ କରିହେବ ସେଥିଲାଗି ଯୋଜନା ପ୍ରସ୍ତୁତ କରିବାକୁ ହେବ। ତେଣୁ ଦେଶବିଦେଶର ବିଭିନ୍ନ ସହରରେ ‘ରୋଡ୍-ଶୋ’ ଆୟୋଜନ କରିବାକୁ ବିଭାଗୀୟ ଅଧିକାରୀମାନଙ୍କୁ ମନ୍ତ୍ରୀ ବେହେରା ପରାମର୍ଶ ଦେଇଥିଲେ। ଏହି ପରିଦର୍ଶନ ସମୟରେ ସେ ଇନ୍ଫୋଭ୍ୟାଲି ଏବଂ ଆଇସିଟି ଅଞ୍ଚଳର ବିକାଶ ତଥା କାର୍ଯ୍ୟର ଅଗ୍ରଗତି ସମ୍ପର୍କରେ ଅନୁଧ୍ୟାନ କରିଥିଲେ। ଏଠାରେ ପୋଲିସ୍ ଏବଂ ଅଗ୍ନିଶମ ସୁରକ୍ଷା ବ୍ୟବସ୍ଥାକୁ ଅଧିକ ମଜଭୁତ କରିବା, ବୁଲା ଗୃହପାଳିତ ପଶୁଙ୍କ ବିଚରଣ ଉପରେ ରୋକ ଲଗାଇବା ସହିତ ଏସ୍ଇଜେଡ୍ ଅଞ୍ଚଳରେ ଦୃଢ଼ ପ୍ରାଚୀର ନିର୍ମାଣ, ଇନ୍ଫୋସିସ୍ ଆଗରେ ଥିବା ଉଠାଦୋକାନ ଉଚ୍ଛେଦ ଏବଂ ଇଣ୍ଟରନେଟ୍ ଯୋଗାଯୋଗ ବ୍ୟବସ୍ଥାକୁ ସୁଦୃଢ କରିବାକୁ ମନ୍ତ୍ରୀ କହିଥିଲେ। ଏହି ଅବସରରେ ଇଲେକ୍ଟ୍ରୋନିକ୍ସ ଏବଂ ଆଇଟି ବିଭାଗ, ଇଡ୍କୋ ଏବଂ ଓକାକ୍ର ବରିଷ୍ଠ ଅଧିକାରୀଙ୍କୁ ନେଇ ଗଠିତ ଅନୁଧ୍ୟାନକାରୀ ଦଳ ଇଡ୍କୋ ଦ୍ୱାରା ନିର୍ମାଣାଧୀନ ଇଲେକ୍ଟ୍ରୋନିକ୍ସ ମାନୁଫାକ୍ଚରିଂ କ୍ଲଷ୍ଟର(ଇଏମ୍ସି), ସେଣ୍ଟ୍ରାଲ୍ ପାର୍କ ଏବଂ ଆଇଟି ଏସ୍ଇଜେଡ୍ରେ ଥିବା ମେସର୍ସ ଶାନ୍ତି ସୋଲାର ଓ ମେସର୍ସ ଇନ୍ଫୋସିସ୍ ପରିଦର୍ଶନ କରିଥିଲେ। ଇଡ୍କୋ, ଓକାକ୍, ଏସ୍ଟିପିଆଇ ଏବଂ ଇନ୍ଫୋସିସ୍ର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
