ଭଞ୍ଜନଗର,୧୭।୪(ବାବୁଲା ପ୍ରଧାନ): ଜନଗଣନା ସମୟରେ ଶୁକ୍ରବାର ସର୍ପ ଦଂଶନରେ ଜଣେ ଶିକ୍ଷୟିତ୍ରୀ ଗୁରୁତର ଭାବେ ଅସୁସ୍ଥ ହୋଇପଡ଼ିଛନ୍ତି। ଯାହାକୁ ନେଇ ଶିକ୍ଷକମାନେ ଚିନ୍ତିତ ହୋଇପଡିଛନ୍ତି। ଏହି ଘଟଣାଟି ଘଟିଛି
ଗଞ୍ଜାମ ଜିଲା ଆସିକା ବ୍ଲକ ମୁନିଗାଡ଼ି ଗ୍ରାମରେ । ଉକ୍ତ ଗ୍ରାମର ସରକାରୀ ଉଚ୍ଚ ବିଦ୍ୟାଳୟରେ ନିଯୁକ୍ତ ଥିବା ସଂସ୍କୃତ ଶିକ୍ଷୟିତ୍ରୀ ମଧୁସ୍ମିତା କହଁର ଦିନ ବେଳେ ପ୍ରବଳ ଖରା ଯୋଗୁ ସାରେ ଗ୍ରାମରେ ଜନଗଣନା କାର୍ଯ୍ୟ କରୁଥିଲେ। ଏହି ସମୟରେ ବର୍ଷା ଯୋଗୁ ବିଦ୍ୟୁତ୍ ଚାଲି ଯାଇଥିଲା। ଅନ୍ଧାରରେ ଜନଗଣନା ପାଇଁ ମଧୁସ୍ମିତା ଗୋଲା ସାହିକୁ ଚାଲି ଚାଲି ଯାଉଥିବା ସମୟରେ ଏକ ସର୍ପ ତାଙ୍କୁ ଦଂଶନ କରିଥିଲା। ଏହାପରେ ନିକଟରେ ଥିବା ଗ୍ରାମବାସୀ ଏବଂ ଅନ୍ୟ ଶିକ୍ଷକମାନେ ଜାଣିବା ପରେ ତାଙ୍କୁ ତୁରନ୍ତ ଚିକିତ୍ସା ପାଇଁ ଗୋବରା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ନେଇଥିଲେ। ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ଅଧିକ ଚିକିତ୍ସା ପାଇଁ ରାତିରେ ଭଞ୍ଜନଗର ମେଡିକାଲକୁ ଅଣାଯାଇଛି। ଏଠାରେ ତାଙ୍କ ସ୍ବାସ୍ଥ୍ୟ ଅବସ୍ଥା ସ୍ଥିର ଥିବା ଜଣାପଡିଛି। ସଂପୃକ୍ତ ବିଦ୍ୟାଳୟର ଅବସରପ୍ରାପ୍ତ ପ୍ରଧାନ ଶିକ୍ଷକ ଦିଗାମ୍ବର ପ୍ରଧାନ, କ୍ରୀଡ଼ା ଶିକ୍ଷକ ସନ୍ତୋଷ ବେହେରା, ସୂପରଭାଇଜର ଆଶୋକ କୁଆର କହଁର ପ୍ରମୁଖ ମେଡିକାଲରେ ରହି ମଧୁସ୍ମିତାଙ୍କ ସ୍ବାସ୍ଥ୍ୟଅବସ୍ଥା ତଦାରଖ କରୁଛନ୍ତି।
