ବେଜିଂ, ୬।୬ : ଚାଇନାର ଜନସଂଖ୍ୟା ହ୍ରାସ ପାଇବା ସରକାରଙ୍କ ପାଇଁ ଚିନ୍ତାର ବିଷୟ ପାଲଟିଛି। ନିକଟରେ ଚାଇନ ଅଧିକାରୀଙ୍କ ପକ୍ଷରୁ କୁହାଯାଇଛି ଯେ ବେଜିଂ ଦ୍ୱାରା ଦିଆଯାଇଥିବା ସରକାରୀ ଆକଳନ ଅପେକ୍ଷା ଜନସଂଖ୍ୟା ସଙ୍କଟ ଅଧିକ ଖରାପ ସ୍ଥିତିରେ ରହିଛି। ପରିସଂଖ୍ୟାନ ଅଧିକାରୀଙ୍କ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଗତ ଏକ ବର୍ଷରେ ଚାଇନାର ୧୦ଟି ପ୍ରାଦେଶିକ ଅଞ୍ଚଳର ଜନସଂଖ୍ୟା ପୁଣି ହ୍ରାସ ପାଇଛି।
ଏହି ପରିପ୍ରେକ୍ଷୀରେ, ନ୍ୟୁଜ ଏଜେନ୍ସି ଏଏନଆଇର ଏକ ରିପୋର୍ଟରେ ଉଲ୍ଲେଖ କରାଯାଇଛି ଯେ, ଯଦିଓ ଗତ କିଛି ବର୍ଷ ହେବ ଚାଇନାର ଜନସଂଖ୍ୟା ହ୍ରାସ ପାଉଛି, କିନ୍ତୁ ନିକଟରେ ଜନ୍ମ ହାର ଏବଂ ମୃତ୍ୟୁ ହାର ମଧ୍ୟରେ ପାର୍ଥକ୍ୟ କମିବାରେ ଲାଗିଛି। ଜାତୀୟ ପରିସଂଖ୍ୟାନ ବ୍ୟୁରୋ ଅନୁଯାୟୀ, ଚାଇନାର ଜନ୍ମ ହାର ୦.୭୫୨ ପ୍ରତିଶତ ଥିବାବେଳେ ମୃତ୍ୟୁ ହାର ୦.୭୧୮ ପ୍ରତିଶତ ରହିଛି। ଫଳସ୍ବରୂପ ପ୍ରାକୃତିକ ଅଭିବୃଦ୍ଧି ହାର ୦.୦୩୪ ପ୍ରତିଶତ ରହିଛି। ୨୦୨୦ରେ ପ୍ରାକୃତିକ ଅଭିବୃଦ୍ଧି ହାର ୦.୧୪୫ ପ୍ରତିଶତ ଥିଲା।
ନ୍ୟାଶନାଲ ଷ୍ଟାଟିଷ୍ଟିକ୍ସ ବ୍ୟୁରୋ ଅଫ ଚାଇନାର ସର୍ବଶେଷ ଆକଳନ ଅନୁଯାୟୀ, ୨୦୨୧ରେ ଚାଇନାର ଜନସଂଖ୍ୟା ୧୪୧ କୋଟି ୧୨ ଲକ୍ଷ ୨୧୨ ଥିଲା। ୨୦୨୧ରେ ଚାଇନାର ଜନସଂଖ୍ୟା ମାତ୍ର ୪ ଲକ୍ଷ ୮୦ ହଜାର ବୃଦ୍ଧି ପାଇଥିଲା। କୁହାଯାଉଛି ଯେ କରୋନା ମହାମାରୀ କାରଣରୁ ଲୋକମାନେ ସନ୍ତାନ ପ୍ରସବ କରିବାକୁ ଅନିଚ୍ଛା ପ୍ରକାଶ କରୁଛନ୍ତି।
ଅପରପକ୍ଷରେ, ଗତ ଏକ ବର୍ଷ ମଧ୍ୟରେ ଚାଇନାର ଅର୍ଥନୀତିର ହ୍ରାସ ଯୋଗୁ ଲୋକେ ସନ୍ତାନ ଚାହୁଁ ନାହାନ୍ତି। ଚାଇନାର ସରକାରୀ ପରିସଂଖ୍ୟାନ ଅନୁଯାୟୀ, ୧୯୮୦ ଦଶକର ଶେଷ ଭାଗରେ ଚାଇନାର ମୋଟ ପ୍ରଜନନ ହାର ପ୍ରତି ମହିଳାଙ୍କ ପିଛା ୨.୬ ପ୍ରତିଶତ ଥିଲା। ସେହିପରି ମୃତ୍ୟୁ ହାର ୨.୧ ପ୍ରତିଶତ ଥିଲା। କିନ୍ତୁ ୧୯୯୪ ପରଠାରୁ ଜନ୍ମ ହାର କମି ୧.୬ ରୁ ୧.୭ ପ୍ରତିଶତ ଛୁଇଁଛି।
ଏଥି ସହିତ, ୨୦୨୦ରେ ଚାଇନାରେ ଜନ୍ମ ହାର ୧.୩ ପ୍ରତିଶତକୁ ହ୍ରାସ ପାଇଛି। ୨୦୨୧ରେ ଜନ୍ମ ହାର ୧.୧୫ ପ୍ରତିଶତକୁ ଖସି ଆସିଥିଲା। ଯେତେବେଳେ କି ଆମେରିକା ଏବଂ ଅଷ୍ଟ୍ରେଲିଆରେ ଜନ୍ମ ହାର ୧.୬ ପ୍ରତିଶତ ଏବଂ ଜାପାନରେ ମଧ୍ୟ ଜନ୍ମ ହାର ୧.୩ ପ୍ରତିଶତ ରହିଛି।
ଗତ ବର୍ଷ ଚାଇନା ସକରାର ଏକ ନୂତନ ଜନସଂଖ୍ୟା ଏବଂ ପରିବାର ଯୋଜନା ଆଇନ ଜାରି କରିଥିଲେ। ଏହା ଅନ୍ତର୍ଗତ ଚାଇନାର ଦମ୍ପତିଙ୍କୁ ତିନିଟି ସନ୍ତାନ ଜନ୍ମ କରିବାକୁ ଅନୁମତି ଦିଆଯାଇଛି। ମାତ୍ର ଖର୍ଚ୍ଚ ବଢ଼ି଼ିବା ଯୋଗୁ ଦମ୍ପତିମାନେ ଅଧିକ ସନ୍ତାନ ନେଇ ଅନିଚ୍ଛା ପ୍ରକାଶ କରୂଛନ୍ତି।
