ମାଲାୟାଲମ ଚଳଚ୍ଚିତ୍ରର ପ୍ରସିଦ୍ଧ ଅଭିନେତ୍ରୀ କେପିଏସି ଲଲିତାଙ୍କ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କ ୭୪ ବର୍ଷ ହୋଇଥିଲା। ଗତ କିଛି ଦିନ ହେବ କେପିଏସି ଲଲିତା ଅସୁସ୍ଥ ଥିଲେ। ସେ ମଙ୍ଗଳବାର ବିଳମ୍ବିତ ରାତିରେ କେରଳର ଥ୍ରିପୁନିଥୁରାସ୍ଥିତ ତାଙ୍କ ଘରେ ଶେଷନିଶ୍ୱାସ ତ୍ୟାଗ କରିଛନ୍ତି। ତାଙ୍କ ମୃତ୍ୟୁରେ ଦକ୍ଷିଣ ଚଳଚ୍ଚିତ୍ର ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି।
କେପିଏସି ଲଲିତା ପ୍ରାୟ ୫ ଦଶନ୍ଧି ଧରି ସାଉଥ ସିନେମାରେ କାମ କରିଥିଲେ। ସେ ୫୫୦ରୁ ଅଧିକ ମାଲାୟାଲମ ଏବଂ ତାମିଲ ଚଳଚ୍ଚିତ୍ରରେ ନିଜର ଅଭିନୟ ଦକ୍ଷତା ପ୍ରଦର୍ଶନ କରିଥିଲେ। ସେ ଥିଏଟରରେ ଅଭିନୟ ଆରମ୍ଭ କରିଥିଲେ। ଲଲିତା ୧୯୬୯ମସିହାରେ ମାଲାୟାଲମ ଚଳଚ୍ଚିତ୍ର ଇଣ୍ଡଷ୍ଟ୍ରିରେ କେ.ସ ସେଥୁମାଧବନଙ୍କ ନିର୍ଦ୍ଦେଶିତ ଚଳଚ୍ଚିତ୍ର କୁଟୁକୁଡୁମ୍ବମ ଜରିଆରେ ଅଭିନୟ ଆରମ୍ଭ କରିଥିଲେ। ଏହା ପରେ ସେ ଏକରୁ ଅଧିକ ଚଳଚ୍ଚିତ୍ରରେ କାମ କରିଥିଲେ। ସେ ଦୁଇଥର ଜାତୀୟ ପୁରସ୍କାର ଜିତିଥିଲେ। ତାଙ୍କୁ ଚାରିଥର କେରଳ ରାଜ୍ୟ ଚଳଚ୍ଚିତ୍ର ପୁରସ୍କାର ପ୍ରଦାନ କରାଯାଇଥିଲା।
