ଭୁବନେଶ୍ୱର,୨୩।୩(ବ୍ୟୁରୋ): ରାଜ୍ୟରେ ମୁଣ୍ଡ ପିଛା ଋଣ ଭାର ବଢ଼ି ବଢ଼ି ଚାଲିଛି। ୨୦୦୯-୧୦ରେ ମୁଣ୍ଡପିଛା ଋଣ ୯,୧୮୦ ଟଙ୍କା ଥିବାବେଳେ ୨୦୨୧ ଜାନୁୟାରୀ ସୁଦ୍ଧା ୨୩,୫୨୪ ଟଙ୍କା ହୋଇଛି। କଂଗ୍ରେସ ସଭ୍ୟ ତାରାପ୍ରସାଦ ବାହିନୀପତିଙ୍କ ଏକ ଲିଖିତ ପ୍ରଶ୍ନର ଉତ୍ତରରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ସୋମବାର ବିଧାନସଭାରେ ଏହି ସୂଚନା ଦେଇଛନ୍ତି। ତେବେ ରାଜ୍ୟର ମୁଣ୍ଡପିଛା ଋଣ ଜାତୀୟ ଏବଂ ଅଗ୍ରଣୀ ରାଜ୍ୟର ଋଣଠାରୁ କମ୍ ରହିଛି। ୨୦୨୧ ଜାନୁୟାରୀ ସୁଦ୍ଧା ରାଜ୍ୟର ସମୁଦାୟ ଋଣ ଭାର ୧,୦୩,୪୧୦.୪୦ କୋଟି ଟଙ୍କା ରହିଛି। ସେଥିରୁ ବିଦେଶୀ ସଂସ୍ଥାରୁ ୬୩୪୭.୪୪ କୋଟି ଟଙ୍କା ଅଣାଯାଇଥିବାବେଳେ ୫୩,୩୮୫.୯୨ କୋଟି ଟଙ୍କା କାମ୍ପା, ଓଏମ୍ବିଡିଏସି ଏବଂ ଖୋଲା ବଜାରରୁ ଅଣାଯାଇଛି। ରାଜ୍ୟ ସରକାର ଅନ୍ତର୍ଜାତୀୟ ସଂସ୍ଥା, ପ୍ରୋଭିଡେଣ୍ଟ ଫଣ୍ଡ ଏବଂ ଅନ୍ୟାନ୍ୟ ଉତ୍ସରୁ ଋଣ ଆଣିଥାଆନ୍ତି। ବିଶ୍ୱବ୍ୟାଙ୍କ, ଏସିଆନ୍ ଡେଭେଲପମେଣ୍ଟ ବ୍ୟାଙ୍କ, ଇଣ୍ଟରନ୍ୟାଶନାଲ ଫଣ୍ଡ ଫର୍ ଏଗ୍ରିକଲଚର ଡେଭେଲପମେଣ୍ଟ (ଆଇଏଫ୍ଏଡି), ଜାପାନ ଇଣ୍ଟରନ୍ୟାଶନାଲ କୋପରେଶନ ଏଜେନ୍ସି, କେଏଫ୍ଡବ୍ଲ୍ୟୁ ଡେଭେଲପମେଣ୍ଟ ବ୍ୟାଙ୍କ, ବ୍ରକିକ୍ସ ବ୍ୟାଙ୍କ ଏବଂ ଏସିଆନ ଇନଫ୍ରାଷ୍ଟ୍ରକ୍ଚର ଇନଭେଷ୍ଟମେଣ୍ଟ ବ୍ୟାଙ୍କରୁ ଋଣ ଆଣିଥାଆନ୍ତି। ରୁରାଲ ଇନଫ୍ରାଷ୍ଟ୍ରକ୍ଚର ଡେଭେଲପମେଣ୍ଟ ବ୍ୟାଙ୍କ, ନାବାର୍ଡ ଓ୍ବେରହାଉସିଂ ସ୍କିମ ଏବଂ ଦୀର୍ଘ ମିଆଦ ଜଳସେଚନ ପାଣ୍ଠି ଆଦିରୁ ୧୫,୬୨୩.୫୫ କୋଟି ଋଣ ନେଇଛନ୍ତି। କୋଭିଡ-୧୯ ମହାମାରୀ ଯୋଗୁ ଦ୍ରବ୍ୟ ଓ ସେବା ଟିକସ (ଜିଏସଟି) ଆଦାୟ ପ୍ରଭାବିତ ହେଇଛି। ସେଥିପାଇଁ କେନ୍ଦ୍ର ସରକାର ସ୍ପେଶାଲ ଓ୍ବିଣ୍ଡୋ ଜରିଆରେ ରାଜ୍ୟ ସରକାର ୩,୮୨୨ କୋଟି ଟଙ୍କା ଚଳିତ ଆର୍ଥିକବର୍ଷରେ ଋଣ କରିଛନ୍ତି। ସେହିପରି ୨୦୨୧ ଜାନୁୟାରୀ ସୁଦ୍ଧା ରାଜ୍ୟ ସରକାର ଜିଏସ୍ଟି କ୍ଷତି ଭରଣା ବାବଦରେ ୨୯,୯୯୪.୬୧ କୋଟି ପାଇଛନ୍ତି। ବିତ୍ତୀୟ ଉତ୍ତରଦାୟିତ୍ୱ ଓ ବଜେଟ ପରିଚାଳନା (ଏଫ୍ଆର୍ବିଏମ୍) ନର୍ମ ଅନୁଯାୟୀ ଋଣ ଭାର ରହିଛି ବୋଲି ମନ୍ତ୍ରୀ କହିଛନ୍ତି।
