ପୁରୁଣା ଭୁବନେଶ୍ୱର,୨୬ା୩(ସୁବାସ ଚନ୍ଦ୍ର ପ୍ରଧାନ):ଏକାମ୍ର କ୍ଷେତ୍ରର ଆରାଧ୍ୟ ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା ଗୁରୁବାର ଅନୁଷ୍ଠିତ ହେବ। ଏନେଇ ମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି। ବୁଧବାର ରାତିରେ ରଥଖଳାରେ ମହାରଣା କାରିଗରମାନେ ମନ୍ଦିର କାର୍ଯ୍ୟାଳୟକୁ ରଥ ହସ୍ତାନ୍ତର କରିବା ପରେ ରଥ ପ୍ରତିଷ୍ଠା କାର୍ଯ୍ୟ ଆରମ୍ଭ ହୋଇଥିଲା। ମୁକ୍ତେଶ୍ୱର ମନ୍ଦିର ପରିସରରେ ଥିବା ମରୀଚିକୁଣ୍ଡରୁ ଏକ ଘଡ଼ା ପାଣି ଆସିଥିଲା।
ଏହା ପରେ ପୁରୀରୁ ଆସିଥିବା ରାଜଗୁରୁ କ୍ଷେତ୍ରବାସୀ ବ୍ରାହ୍ମଣ ନିଯୋଗର ୧୮ଜଣ ସଦସ୍ୟଙ୍କୁ ଗୁଆ, ନଡ଼ିଆ, ପଇତା ବସ୍ତ୍ର ଦେଇ ବରଣ କରିଥିଲେ। ତା’ପରେ ପ୍ରଥମ ପ୍ରତିଷ୍ଠା କାର୍ଯ୍ୟ ଆରମ୍ଭ ହୋଇଥିଲା। ଦୀର୍ଘ ସାଢ଼େ ୩ଘଣ୍ଟା ପୂଜାର୍ଚ୍ଚନା ହୋମ ହୋଇଥିଲା ।
ପରେ ରଥ ଉପରେ ଚାରିଦ୍ୱାର ଏବଂ ରଥରେ ପୂର୍ବରୁ ଆସିଥିବା ମରୀଚିକୁଣ୍ଡ ପାଣି ସିଞ୍ଚନ କରାଯାଇ ଦଧିନଉତିରେ ଧ୍ୱଜା ବନ୍ଧାଯାଇ ରଥ ପ୍ରତିଷ୍ଠା ସମ୍ପନ୍ନ ହୋଇଥିଲା ବୋଲି ବରିଷ୍ଠ କ୍ଷେତ୍ରବାସୀ ବ୍ରାହ୍ମଣ ସେବାୟତ ଅଶୋକ କୁମାର ଶତପଥୀ କହିଛନ୍ତି।
ଜଗିବେ ୧୬ ପ୍ଲାଟୁନ ପୋଲିସ ଫୋର୍ସ
ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ମୋଟ ୧୬ ପ୍ଲାଟୁନ ପୋଲିସ ଫୋର୍ସ ନିୟୋଜିତ କରାଯାଇଛି। ୩୦ଜଣ ମହିଳା କନଷ୍ଟେବଲ, ୨୫ଜଣ ଏସ୍ଆଇ ଓ ଏଏସ୍ଆଇ, ୧୩ଜଣ ଇନ୍ସ୍ପେକ୍ଟର୍, ୭ଜଣ ଏସିପି, ୩ଜଣ ଆଡିସନାଲ ଡିସିପି ଏବଂ ୨ଜଣ ଡିସିପି ର଼୍ୟାଙ୍କର ଅଧିକାରୀ ମଧ୍ୟ ନିୟୋଜିତ କରାଯାଇଛି। ଭକ୍ତମାନଙ୍କ ସୁରକ୍ଷା ଓ ଯାତ୍ରାର ସୂଚାରୁଭାବେ ପରିଚାଳନା ପାଇଁ ପୋଲିସ ପକ୍ଷରୁ ଟ୍ରାଫିକ ନିୟନ୍ତ୍ରଣ ନେଇ ବ୍ୟବସ୍ଥା କରାଯାଇଛି ବୋଲି ଲିଙ୍ଗରାଜ ଥାନା ଆଇଆଇସି ପୂର୍ଣ୍ଣଚନ୍ଦ୍ର ପ୍ରଧାନ ସୂଚନା ଦେଇଛନ୍ତି।
ରୁକୁଣା ରଥଯାତ୍ରା ପାଇଁ ମନ୍ଦିର ପ୍ରଶାସନ, ବିଏମ୍ସି, ଜଳ ସମ୍ପଦ ବିଭାଗ, ସ୍ବାସ୍ଥ୍ୟ ବିଭାଗ, ବିଦ୍ୟୁତ୍ ବିଭାଗ ପରି ବିଭିନ୍ନ ବିଭାଗର ପ୍ରସ୍ତୁତି ଶେଷ ହୋଇଛି। ଏହା ସହିତ ବିଭିନ୍ନ ସ୍ବେଚ୍ଛାସେବୀ ଅନୁଷ୍ଠାନଗୁଡ଼ିକୁ ମଧ୍ୟ ପ୍ରଶାସନ ପକ୍ଷରୁ ଆମନ୍ତ୍ରଣ କରାଯାଇଛି। ଆଶୁ ଚିକିତ୍ସା, ଜଳ ସିଞ୍ଚନ, ଆପାତକାଳୀନ ଚିକିତ୍ସାରେ ସହଯୋଗ କରିବା ପାଇଁ ଆମ୍ବୁଲାନ୍ସ ମଧ୍ୟ ରହିଛି। ମନ୍ଦିର ସିଂହଦ୍ୱାରକୁ ଫୁଲରେ ସଜାଯାଇଥିବା ବେଳେ ଆଲୋକୀକରଣ ମଧ୍ୟ କରାଯାଇଛି। ଗୁରୁବାର ଦୈନିକ ନୀତି, ଆଳତି ଅବକାଶ, ଦର୍ଶନ, ପହଣ୍ଡି ରଥରେ ପୂଜା, ଚାରମାଳ ଖୋଲାଯିବା ପରେ ଅପରାହ୍ନ ୨ଟା ୩୦ରେ ରଥ ଟଣାଯିବ ବୋଲି ନୀତନିର୍ଘଣ୍ଟ ହୋଇଛି।
ରଥ ତଦାରଖ କଲେ ପଞ୍ଚବକ୍ର
ମନ୍ଦିର ପୁରୋହିତ ମନୋରଞ୍ଜନ ଦାସ ଏବଂ ପୁରୀ ରାଜଗୁରୁଙ୍କ ସହାୟତାରେ ରଥ ପ୍ରତିଷ୍ଠା କାର୍ଯ୍ୟ ସମ୍ପାଦନ ହେଉଥିବା ବେଳେ ଦକ୍ଷିଣ ଘରୁ ଶ୍ରୀଲିଙ୍ଗରାଜଙ୍କ ପ୍ରତିନିଧି ପଞ୍ଚବକ୍ର ରଥ ଉପରେ ପହଞ୍ଚିଥିଲେ। ପରେ ପଞ୍ଚ ଉପଚାରରେ ଭୋଗ ନୈବେଦ୍ୟ ହୋଇଥିଲା। ପୌରାଣିକ ମତ ଅନୁଯାୟୀ ରଥ ନିର୍ମାଣ କାର୍ଯ୍ୟ ଉପଯୁକ୍ତ ତଦାରଖ ନିମନ୍ତେ ପଞ୍ଚବକ୍ର ରଥକୁ ଯାଇଥାନ୍ତି ବୋଲି ପୂଜା ପଣ୍ଡା ନିଯୋଗ ସେବାୟତ ଲିଙ୍ଗରାଜ ପୂଜାପଣ୍ଡା କହିଛନ୍ତି।
Dharitri – Odisha’s No.1 Odia Daily
