ନାକଟିଦେଉଳ,୯।୧(ଡି.ଏନ.ଏ.): ସମ୍ବଲପୁର ଜିଲା ନାକଟିଦେଉଳ ବ୍ଲକ ଅନ୍ତର୍ଗତ ବାଟଗାଁ ମଣ୍ଡିରେ ଟାର୍ଗେଟ ନ ଥିବାରୁ ଚାଷୀମାନଙ୍କ ଧାନ ଉଠି ପାରୁ ନ ଥିବା ଅଭିଯୋଗ ହୋଇଛି । ଏହାକୁ ନେଇ ଧାନ ବିକି ପାରି ନ ଥିବା ଚାଷୀମାନେ ଏବେ ଚିନ୍ତାରେ ପଡି ଯାଇଛନ୍ତି ।
ପ୍ରକାଶ ଯେ, ବାଟଗାଁ ମଣ୍ଡିରେ ନଭେମ୍ବର ୨୮ତାରିଖ ଠାରୁ ଧାନ କିଣା ଆରମ୍ଭ ହୋଇଛି ।ଏହି ମଣ୍ଡି ଉପରେ ବାଟଗାଁ , ଜାମୁଯୋରୀ ପଞ୍ଚାୟତର ସମସ୍ତ ଗ୍ରାମ ସମେତ ସାହେବୀ ପଞ୍ଚାୟତର ହିଞ୍ଜାମୁରା ଗ୍ରାମର ଚାଷୀମାନେ ନିର୍ଭର କରିବା ସହ ଧାନ ବିକ୍ରି କରିଥାନ୍ତି । ତେବେ ମଣ୍ଡି ଖୋଲିବା ଦିନ ଠାରୁ ଆଜି ପର୍ଯ୍ୟନ୍ତ ଏହି ମଣ୍ଡିରେ ପ୍ରାୟ ୭୫୦ଜଣ ଚାଷୀଙ୍କ ଠାରୁ ୩୧ହଜାର ୪ଶହ କୁଇଣ୍ଟାଲ ଧାନ କିଣାଯାଇଛି। ହେଲେ ବର୍ତ୍ତମାନ ଆଉ ମଣ୍ଡିରେ ଟାର୍ଗେଟ ନାହଁି। ଧାନ ବିକ୍ରି ପାଇଁ ଟୋକନର ବୈଧତା ଶେଷ ହୋଇ ଯିବା ଭୟରେ ଚାଷୀମାନେ ମଣ୍ଡିକୁ ଧାନ ଆଣି ଗଦାଇ ରଖିଛନ୍ତି । କେହି ଚାଷୀ ହଳଗାଡ଼ିରେ ଧାନ ଆଣି ବାଟଗାଁ ସେବା ସମବାୟ ସମିତିରେ ଖୋଲା ଯାଇଥିବା ମଣ୍ଡିରେ ଧାନ ଗଦାଇ ରଖିଛି ତ ଆଉ କେହି ଚାଷୀ ଭ୍ୟାନ କିମ୍ବା ଟ୍ରାକ୍ଟରରେ ଧାନ ଆଣି ମଣ୍ଡିରେ ତିନି ଦିନ ହେଲା ରଖିଛନ୍ତି । ଟୋକନ ଥାଇ ମଣ୍ଡିରେ ଟାର୍ଗେଟ ନ ଥିବାରୁ ଧାନ ବିକ୍ରି ହୋଇପାରୁ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ଏପରି କି ମିର୍ଲସ ଧାନ କୁଇଣ୍ଟାଲ ପିଛା ୫ କେଜି କଟନି ଛଟନି କରୁଥିବାରୁ ଚାଷୀମାନେ ଧାନ ବିକ୍ରି କରିବାକୁ ରାଜି ହେଉ ନାହାନ୍ତି। ଗତବର୍ଷ ତୁଳନାରେ ଚଳିତବର୍ଷ ଭଲ ଧାନ ଉପତ୍ାଦନ ହୋଇଛି। ଅଦ୍ୟାବଧି ୭୫ ପ୍ରତିଶତ ଧାନ ବିକ୍ରି ହୋଇଥିବା ବେଳେ ଚାଷୀମାନଙ୍କ ଠାରେ ବଳକା ଧାନ ପଡ଼ିରହିଛି । ଗତ ସୋମବାର ଠାରୁୁ ଏହି ଅଞ୍ଚଳର ଚାଷୀମାନେ ମଣ୍ଡିକୁ ପ୍ରାୟ ୨ହଜାର କୁଇଣ୍ଟାଲରୁ ଅଧିକ ପରିମାଣର ଧାନ ବିକ୍ରି କରିବାକୁ ଆଣି ମଣ୍ଡିରେ ଥାକ ମାରିଛନ୍ତି । କିନ୍ତୁ ଗୋଟିଏ ପଟରେ ମିର୍ଲସର କଟନି ଛଟନି ଏବଂ ଅନ୍ୟପଟେ ଟାର୍ଗେଟ ନ ଥିବାରୁ ଚାଷୀ ଧାନ ବିକ୍ରି କରି ନ ପାରି ଆଜିକୁ ଚାରି ଦିନ ହେଲା ଶୀତ କାକରରେ ମଣ୍ଡିରେ ନିଜ ଧାନକୁ ଜଗି ରହିଥିବା ଦେଖିବାକୁ ମିଳିଛି । ଅପରପକ୍ଷରେ ପାଗ କୋହଲା ରହିଥିବାରୁ ବର୍ଷା ଆଶଙ୍କାରେ ଚାଷୀମାନେ ଚିନ୍ତାରେ ପଡ଼ି ଯାଇଛନ୍ତି । ଏହି ମଣ୍ଡିରେ ୧ ହଜାର କୁଇଣ୍ଟାଲ ଧାନ କିଣାଯିବାକୁ ଗତ ୬ ତାରିଖରେ ଟାର୍ଗେଟ ଆସିଥିଲେ ମଧ୍ୟ ମଣ୍ଡିକୁ ୨ହଜାର କୁଇଣ୍ଟାଲ ଧାନ ଆସିଛି । ତେବେ କେଉଁ ଚାଷୀଙ୍କ ଧାନ ପ୍ୟାକ୍ସ କିଣିବ ସେ ନେଇ ଦ୍ୱନ୍ଦ୍ୱ ଉପୁଜି ଥିବା ବେଳେ ସବୁ ଚାଷୀଙ୍କ ଧାନ କିଣିବାକୁ ଚାଷୀମାନେ ଅଡ଼ି ବସିଛନ୍ତି । ଏଣୁ ଉକ୍ତ ମଣ୍ଡିରେ ଧାନ ଉଠାଣ ପାଇଁ ଟାର୍ଗେଟ
ବଢାଯିବାକୁ ଚାଷୀମାନେ ଦାବି କରିଛନ୍ତି ା
