ପୁରୀ ଅଫିସ,୭।୧୨: ପୁରୀ ଜିଲା ପୋଲିସ ମୁଖ୍ୟାଳୟରେ ଖୁବ୍ଶୀଘ୍ର ୨୪ଘଣ୍ଟିଆ କଲ୍ ସେଣ୍ଟର ଖୋଲାଯିବ। ଲୋକଙ୍କ ଅଭିଯୋଗ ସିଧାସଳଖ ଯେଭଳି ତୁରନ୍ତ ଗ୍ରହଣ କରି କାର୍ଯ୍ୟାନୁଷ୍ଠାନ ନେଇହେବ ସେଥିଲାଗି ଏଭଳି ଯୋଜନା କରାଯାଇଛି। କଲ ସେଣ୍ଟର ନମ୍ବର ୭୬୫୩୮୯୧୦୩୦ରେ ଲୋକେ ନିଜର ସମସ୍ୟା ଜଣାଇପାରିବେ। ଏହି ନମ୍ବରରେ ଲୋକେ ସିଧାସଳଖ କଲ୍ କରି କଥା ହେବା ସହିତ ହ୍ବାଟ୍ସ ଆପ୍ ଜରିଆରେ ମଧ୍ୟ ମେସେଜ କରିପାରିବେ। ଯଦି କୌଣସି ବ୍ୟକ୍ତି ନିଜର ସମସ୍ୟା ସମ୍ପର୍କରେ ମେସେଜ କରି ଜଣାନ୍ତି ତେବେ ତୁରନ୍ତ ଏହାକୁ ଗ୍ରହଣ କରି ଅଭିଯୋଗକାରୀଙ୍କ ନିକଟରେ ପୋଲିସ ପହଞ୍ଚିବ। ୨୪ ଘଣ୍ଟାର ବିଭିନ୍ନ ଅଭିଯୋଗ ଉପରେ ଏସ୍ପି ନିଜେ ସମୀକ୍ଷା କରିବେ। ଏଥିଲାଗି ଏକ ରିସେପଶନ ସେଣ୍ଟର ଡିପିଓ ପୁରୀରେ ପ୍ରତିଷ୍ଠା କରାଯିବ। ସେଠାରେ ସକାଳ ୧୦ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଜଣେ ମହିଳା କର୍ମଚାରୀ ରହିବେ। ଛୁଟି ଦିନଗୁଡିକରେ ମଧ୍ୟ ଏହା ଚାଲିବ। ଯଦି କୌଣସି ବ୍ୟକ୍ତି ଡିପିଓ ଆସନ୍ତି ତେବେ ସେ ରିସେପଶନ ସେଣ୍ଟର ଯାଇ ନିଜର ଅଭିଯୋଗ ଦାଖଲ କରିପାରିବେ। ସମସ୍ତ ଅଭିଯୋଗ ଏସ୍ପି ନିଜେ ତଦାରଖ କରିବେ। ତାଙ୍କ ଅନୁପସ୍ଥିତିରେ ଅତିରିକ୍ତ ଏସ୍ପି ଏହି ଦାୟିତ୍ୱ ତୁଲାଇବେ। ନିର୍ଦ୍ଧାରିତ ସମୟ ମଧ୍ୟରେ ସମସ୍ତ ଅଭିଯୋଗର ତଦନ୍ତ କରାଯିବ। ଏଥିଲାଗି କେତେଜଣ ନୋଡାଲ ଅଫିସର ନିୟୋଜିତ ହେବେ। ଡିଏସ୍ପି ଏଚଆର୍ପିସି ମନୋବ୍ରତା ଶତପଥୀ ଅଭିଯୋଗ ଶୁଣାଣିର ନୋଡାଲ ଅଫିସର ରହିବେ। ଏଚ୍ଆର୍ପିସି ଇନ୍ସପେକ୍ଟରଙ୍କ ଦ୍ୱାରା ସବୁ ଅଭିଯୋଗ ଡିପିଓକୁ ଆସିବା ୫-ଟି କଲ ସେଣ୍ଟର ନମ୍ବର ଜରିଆରେ ଦାଏର କରିବେ। ଡିଏସ୍ପି ଏଚ୍ଆରପିସି୍ ଧାର୍ଯ୍ୟ ସମୟ ମଧ୍ୟରେ ସବୁ ଅଭିଯୋଗର ତଦାରଖକରି ସମାଧାନ ପାଇଁ ପଦକ୍ଷେପ ନେବେ।
