ପୁରୀ ଅଫିସ,୧୬ା୧୦: କରୋନା ବିପଦ ଟଳିନାହିଁ। ଆଗକୁ ଶୀତଋତୁରେ ସଂକ୍ରମଣ ବୃଦ୍ଧି ପାଇବା ଆଶଙ୍କା ଥିବାରୁ ଏଥିପ୍ରତି ହେୟଜ୍ଞାନ କଲେ ସ୍ଥିତି ପୁଣି ସଙ୍ଗିନ ହୋଇପାରେ। କାର୍ତ୍ତିକ ମାସରେ ଶ୍ରୀମନ୍ଦିର ଖୋଲିଲେ ଶ୍ରଦ୍ଧାଳୁଙ୍କୁ ନିୟନ୍ତ୍ରଣ କରିବା ଅସମ୍ଭବ ହୋଇପଡ଼ିବ। ଯଦି ସେବାୟତ ସଂକ୍ରମିତ ହୁଅନ୍ତି ତେବେ ମହାପ୍ରଭୁଙ୍କ ନୀତିକାନ୍ତି ପ୍ରଭାବିତ ହୋଇପାରେ। ତେଣୁ କାର୍ତ୍ତିକ ମାସ ଶେଷ ପର୍ଯ୍ୟନ୍ତ ଅପେକ୍ଷା କରାଯାଉ। ଠାକୁରଙ୍କ ନୀତିକାନ୍ତି ପ୍ରଭାବିତ ଭଳି ସ୍ଥିତି ନ ଉପୁଜୁ ବୋଲି ଗୁରୁବାର ସହରର ବୁଦ୍ଧିଜୀବୀ, ଶିକ୍ଷାବିତ୍ ଏବଂ ଏନ୍ଜିଓ କର୍ମକର୍ତ୍ତାଙ୍କ ସହିତ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାରଙ୍କ ଆଲୋଚନାବେଳେ ଏହି ମତ ପ୍ରକାଶ ପାଇଛି। ତେବେ ଏମାନଙ୍କ ମଧ୍ୟରୁ କେତେଜଣ ଜୀବନ ସହ ଜୀବିକାକୁ ଗୁରୁତ୍ୱ ଦେଇଥିଲେ। ପରୀକ୍ଷାମୂଳକ ଭାବେ କାର୍ତ୍ତିକ ମାସର ପ୍ରଥମ ୭ଦିନ ଭକ୍ତଙ୍କୁ ମନ୍ଦିର ପ୍ରବେଶ ଅନୁମତି ଦିଆଯାଇ ସ୍ଥିତି ପରଖାଯାଉ। ଯଦି ଭିଡ଼ ଅନିୟନ୍ତ୍ରିତ ହୋଇଯାଏ ତେବେ ପୁନଶ୍ଚ ବନ୍ଦ କରାଯାଉ ବୋଲି କହିଥିଲେ। କିନ୍ତୁ ଏହା ସମ୍ଭବ ହେବ ନାହିଁ ବୋଲି ଆଉ କେତେଜଣ ମତ ରଖିଥିଲେ।
ସର୍ବସାଧାରଣଙ୍କ ଦର୍ଶନ ଲାଗି ଶ୍ରୀମନ୍ଦିର ଖୋଲିବା ସଂକ୍ରାନ୍ତରେ ମୁଖ୍ୟ ପ୍ରଶାସକ ବିଭିନ୍ନ ପକ୍ଷଙ୍କ ସହିତ ଆଲୋଚନା ଜାରି ରଖିଛନ୍ତି। ସେବାୟତଙ୍କ ସହ ୪ଦିନ ଧରି ଆଲୋଚନା ପରେ ଗୁରୁବାର ପଞ୍ଚମ ଦିବସରେ ଭିଡିଓ କନ୍ଫରେନ୍ସ ମାଧ୍ୟମରେ ବୁଦ୍ଧିଜୀବୀ, ଶିକ୍ଷାବିତ୍ ଏବଂ ଏନ୍ଜିଓ କର୍ମକର୍ତ୍ତାଙ୍କ ମତ ସଂଗ୍ରହ କରିଥିଲେ। ଏଥିରେ ୮ଟି ଏନ୍ଜିଓ, ୭ଜଣ ବୁଦ୍ଧିଜୀବୀ ଓ ଶିକ୍ଷାବିତ୍ ଭାଗ ନେଇଥିଲେ। ଜିଲାପାଳ ବଲୱନ୍ତ ସିଂ, ଉନ୍ନୟନ ପ୍ରଶାସକ ଅଜୟ କୁମାର ଜେନା, ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ, ଶ୍ରୀମନ୍ଦିର ପରିଚାଳନା କମିଟି ସେବକ ପ୍ରତିନିଧି ରାମଚନ୍ଦ୍ର ଦାସମହାପାତ୍ର, ଅନନ୍ତ ତିଆଡ଼ି, ମାଧବ ଚନ୍ଦ୍ର ମହାପାତ୍ର, ମାଧବ ଚନ୍ଦ୍ର ପୂଜାପଣ୍ଡା ପ୍ରମୁଖ ଉପସ୍ଥିତ ଥିଲେ।
