ନୂଆଦିଲ୍ଲୀ,୯।୧୦(ପି.ଟି./ଆଇଏଏନ୍ଏସ୍):ବାକ୍ ଓ ଅଭିବ୍ୟକ୍ତି ସ୍ବାଧୀନତାର ଅପବ୍ୟବହାରକୁ ନେଇ ଗୁରୁବାର ସୁପ୍ରିମକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି। ବର୍ତ୍ତମାନ ସମୟରେ ଏହି ଅଧିକାରର ସବୁଠୁ ବେଶି ଅପବ୍ୟବହାର କରାଯାଉଥିବା କହିଛନ୍ତି। ଏହାସହ ଗତ ମାର୍ଚ୍ଚରେ ଆୟୋଜିତ ତବଲିଘି ଜମାତ୍ କାର୍ଯ୍ୟକ୍ରମର ମିଡିଆ କଭରେଜ ସମ୍ପର୍କରେ କେନ୍ଦ୍ର ସରକାରଙ୍କ ପକ୍ଷରୁ ଦାଖଲ ସତ୍ୟପାଠକୁ ‘ଛଳନାପୂର୍ଣ୍ଣ’ ଓ ‘ଲଜ୍ଜାହୀନ’ ବୋଲି ଭର୍ସନା କରିଛନ୍ତି।
ପ୍ରଧାନ ବିଚାରପତି ଜଷ୍ଟିସ୍ ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଜମିଆତ୍ ଉଲାମା-ଇ-ହିନ୍ଦ୍ ଓ ଅନ୍ୟମାନଙ୍କ ପକ୍ଷରୁ ଦାଏର ପିଟିଶନର ଶୁଣାଣି କରିଛନ୍ତି। ଦେଶରେ କୋଭିଡ୍-୧୯ ମହାମାରୀ ଆରମ୍ଭ ହେବାବେଳେ ନୂଆଦିଲ୍ଲୀର ନିଜାମୁଦ୍ଦିନ ମର୍କଜ୍ରେ ଆୟୋଜିତ ତବ୍ଲିଘି ଜମାତ୍ର କାର୍ଯ୍ୟକ୍ରମକୁ ନେଇ କେତେକ ଗଣମାଧ୍ୟମ ସାମ୍ପ୍ରଦାୟିକ ଘୃଣା ବିସ୍ତାର କରୁଛନ୍ତି ବୋଲି ଉକ୍ତ ଆବେଦନରେ ଅଭିଯୋଗ କରାଯାଇଥିଲା। ଜମାତ୍ ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ଦୁଷ୍ୟନ୍ତ ଡାଭେ ଯୁକ୍ତି ବାଢ଼ିଥିଲେ ଯେ, ଆବେଦନକାରୀମାନେ ଅଭିବ୍ୟକ୍ତି ସ୍ବାଧୀନତାର ମୁହଁ ବନ୍ଦ ଲାଗି ଉଦ୍ୟମ କରୁଛନ୍ତି ବୋଲି କେନ୍ଦ୍ର ସରକାର ନିଜ ସତ୍ୟପାଠରେ ଉଲ୍ଲେଖ କରିଛନ୍ତି।
ଏନେଇ ଖଣ୍ଡପୀଠ କହିଛନ୍ତି, ଅଭିବ୍ୟକ୍ତି ଓ ମତ ପ୍ରକାଶ କରିବାର ଅଧିକାରକୁ ଏବେ ସବୁଠୁ ଅଧିକ ଅପବ୍ୟବହାର କରାଯାଉଛି। ଆପଣ ନିଜ ଅନୁସାରେ ଯୁକ୍ତି ବାଢ଼ିବା ପାଇଁ ଯେପରି ସ୍ବାଧୀନ ଠିକ୍ ସେହିଭଳି ସେମାନେ ମଧ୍ୟ ନିଜ ସତ୍ୟପାଠରେ କୌଣସି ଅଭିଯୋଗ ଆଣିବା ପାଇଁ ମୁକ୍ତ। ତେବେ ସୂଚନା ଓ ପ୍ରସାରଣ ମନ୍ତ୍ରଣାଳୟର ସଚିବଙ୍କ ପରିବର୍ତ୍ତେ ଜଣେ ଅତିରିକ୍ତ ସଚିବ ସତ୍ୟପାଠ ଦାଖଲ କରିଥିଲେ। ସେଥିରେ ତବଲିଘି ଜମାତ୍ ପ୍ରସଙ୍ଗରେ ମିଡିଆ ରିପୋର୍ଟିଂ ସମ୍ପର୍କରେ ଅନାବଶ୍ୟକ ଓ ଯୁକ୍ତିହୀନ ଅଭିଯୋଗ ଅଣାଯାଇଥିବାରୁ ଖଣ୍ଡପୀଠ ବିରକ୍ତି ପ୍ରକାଶ କରିଛନ୍ତି। ଦୁଇ ସପ୍ତାହ ପରେ ଏହି ମାମଲାର ପରବର୍ତ୍ତୀ ଶୁଣାଣି କରିବାକୁ ଖଣ୍ଡପୀଠ ଧାର୍ଯ୍ୟ କରିଛନ୍ତି।
