ସମ୍ଭଲ: ସବୁ ସ୍ତ୍ରୀ ଚାହାନ୍ତି ତାଙ୍କ ସ୍ବାମୀ ତାଙ୍କୁ ବହୁତ ଭଲପାଆନ୍ତୁ। ହେଲେ ଉତ୍ତରପ୍ରଦେଶର ସମ୍ଭଲ ଜିଲାରେ ଏକ ଅଜବ ଘଟଣା ଦେଖିବାକୁ ମିଳିଛି। ଏଠାରେ ଜଣେ ସ୍ତ୍ରୀଙ୍କୁ ସ୍ବାମୀଙ୍କ ଭଲପାଇବା ଅଣନିଃଶ୍ୱାସୀ କରିବା ପରି ମନେ ହୋଇଛି। ଏଥିପାଇଁ ସେ ତାଙ୍କ ସହ ରହିବାକୁ ଚାହାନ୍ତି ନାହିଁ। ଏପରିକି ସ୍ବାମୀଙ୍କଠାରୁ ଅଲଗା ହେବାକୁ ନେଇ ସେ ଛାଡ଼ପତ୍ର ମାମଲା ଶରିୟା କୋର୍ଟରେ ଦାୟର କରିଥିବା ସୂଚନା ମିଳିଛି।
ଉକ୍ତ ଜିଲାରେ ରହୁଥିବା ଜଣେ ମହିଳା ବିବାହର ୧୮ ମାସ ପରେ ଛାଡ଼ପତ୍ର ନେବାକୁ କୋର୍ଟର ଦ୍ୱାରସ୍ଥ ହୋଇଥିଲେ। ତାଙ୍କ ସ୍ବାମୀ ମହିଳାଙ୍କ ସହ ଝଗଡ଼ା କରନ୍ତି ନାହିଁ, ବରଂ ବହୁତ ଭଲପାଆନ୍ତି। ଯଦି କୌଣସି ଭୁଲ ସେ କରିଦିଅନ୍ତି, ସେ ତାଙ୍କୁ କ୍ଷମା କରିଦିଅନ୍ତି। ସବୁକଥାକୁ ହସିହସି ମାନି ନିଅନ୍ତି। ଘରର କାମରେ ସହାୟତା କରନ୍ତି। କେବେ କେବେ ତାଙ୍କ ପାଇଁ ରୋଷେଇ ମଧ୍ୟ କରିଦିଅନ୍ତି। ସ୍ବାମୀଙ୍କ ଏଭଳି ବ୍ୟବହାରକୁ ନେଇ ମହିଳା ଚିନ୍ତିତ ହୋଇପଡ଼ିଛନ୍ତି। ଏପରିକି ନିଜର ବୈବାହିକ ଜୀବନରେ ଅଣନିଃଶ୍ୱାସୀ ହେବା ମନେ କରୁଛନ୍ତି। ଏଣୁ ସେ ଛାଡ଼ପତ୍ର ନେବାକୁ ଚାହୁଁଥିବା କୋର୍ଟର ମୌଲବୀଙ୍କ ସମ୍ମୁଖରେ କହିଥିଲେ। ଏହାଶୁଣି ସମସ୍ତେ ଚକିତ ହୋଇଯାଇଥିଲେ। ଅପରପକ୍ଷେ ବ୍ୟକ୍ତିଙ୍କୁ ଏ ବିଷୟରେ ପଚରାଯିବାରେ ସେ ସ୍ତ୍ରୀଙ୍କୁ ବହୁତ ଭଲପାଆନ୍ତି। ସବୁବେଳେ ତାଙ୍କ ଖୁସିକୁ ପ୍ରାଧାନ୍ୟ ଦେଉଥିବା କହିଥିଲେ।
ଉଭୟ ପକ୍ଷକୁ ଶୁଣିବା ପରେ ଅଦାଲତ ମହିଳାଙ୍କ ଆବେଦନକୁ ଖାରଜ କରିଦେଇଥିଲେ। ହେଲେ ମହିଳା ଏତିକିରେ ରହି ନ ଥିଲେ। ଏହି ମାମଲାକୁ ନେଇ ସେ ପଞ୍ଚାୟତ ମଧ୍ୟ ବସାଇଥିଲେ। ଏବେ ଉଭୟଙ୍କୁ ନିଜ ନିଜ ମଧ୍ୟରେ ମାମଲାକୁ ସମାଧାନ କରିବାକୁ କୁହାଯାଇଥିବା ଜଣାପଡ଼ିଛି।
