ଭୁବନେଶ୍ୱର, ୫ା୧୨ (ବ୍ୟୁରୋ): ରାଜଧାନୀରେ ନାଗରିକଙ୍କୁ ଗୋଟିଏ ସ୍ଥାନରେ ସମସ୍ତ ସେବା ଯୋଗାଇ ଦେବାକୁ ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ (ବିଏସ୍ସିଏଲ) ପକ୍ଷରୁ ସହରର ୭୫ଟି ସ୍ଥାନରେ ସ୍ଥାପନ ହେବ ଡିଜିଟାଲ କିଓସ୍କ। ଜନଗହଳିପୂର୍ଣ୍ଣ ପ୍ରମୁଖ ସ୍ଥାନରେ ୨୫ଟି ଓ ବିଭିନ୍ନ କାର୍ଯ୍ୟାଳୟରେ ୫୦ କିଓସ୍କ ଲଗାଯିବ। ପ୍ରଥମ ପର୍ଯ୍ୟାୟରେ ପରୀକ୍ଷାମୂଳକ ଭାବେ ରାଜମହଲ ଛକ, କଳିଙ୍ଗ ହସ୍ପିଟାଲ ଛକ ଓ ଶହୀଦନଗର ଓ୍ବାର୍ଡ ଅଫିସ୍ରେ ଗୋଟିଏ ଲେଖାଏ ଡିଜିଟାଲ କିଓସ୍କ ଲଗାଯାଇଛି। ଶହୀଦନଗର ଓ୍ବାର୍ଡ ଅଫିସ କିଓସ୍କଟି ସେବା ଯୋଗାଇବା ଆରମ୍ଭ କରିଥିବାବେଳେ ଅନ୍ୟ ଦୁଇଟିର ସ୍ଥାପନ ପ୍ରକ୍ରିୟା ଶେଷ ହେବା ପରେ କାର୍ଯ୍ୟକାରୀ କରାଯିବ ବୋଲି ବିଏସ୍ସିଏଲ ଜିଏମ୍ ଶେଷଦେବ ନନ୍ଦ କହିଛନ୍ତି।
ତାଙ୍କ ସୂଚନାନୁସାରେ, ଦୁଇପ୍ରକାର ଡିଜିଟାଲ କିଓସ୍କ ସେବା ଯୋଗାଇବ। ‘ଇଣ୍ଟିଗ୍ରେଟେଡ ମଲ୍ଟି ସର୍ଭିସେସ୍ ଡିଜିଟାଲ କିଓସ୍କ’ ବାହାରେ ଓ ‘ଷ୍ଟାଣ୍ଡ୍ ଏଲୋନ ମଲ୍ଟି ସର୍ଭିସେସ୍ ଡିଜିଟାଲ କିଓସ୍କ’ ବିଭିନ୍ନ କାର୍ଯ୍ୟାଳୟରେ କାର୍ଯ୍ୟ କରିବ। ‘ଇଣ୍ଟିଗ୍ରେଟେଡ ମଲ୍ଟି ସର୍ଭିସେସ୍ ଡିଜିଟାଲ କିଓସ୍କ’ରେ ଲୋକେ ଓ୍ବାଇ-ଫାଇ ଆକ୍ସେସ୍ ପଏଣ୍ଟ ପାଇବା ସହ ଇମରଜେନ୍ସି କଲ୍ ବଟନ୍, ଫୋନ୍ ଚାର୍ଜ ପଏଣ୍ଟ, ସୋଲାର ପ୍ୟାନେଲ ଓ ଟିକେଟ୍ ବୁକ୍ କରିବା ଆଦି ବହୁ ସୁବିଧା ପାଇପାରିବେ। ଏହା ମୁଖ୍ୟତଃ ପାର୍କ, ମଲ୍, ସରକାରୀ କାର୍ଯ୍ୟାଳୟ ଓ ବ୍ୟସ୍ତବହୁଳ ରାସ୍ତାରେ ଦେଖିବାକୁ ମିଳିବ। ସେହିପରି ‘ଷ୍ଟାଣ୍ଡ୍ ଏଲୋନ ମଲ୍ଟି ସର୍ଭିସେସ୍ ଡିଜିଟାଲ କିଓସ୍କ’ରେ ଲୋକଙ୍କୁ ବିଭିନ୍ନ ଅଭିଯୋଗ କରିବା, ବିଲ୍ ପୈଠ କରିବା, କାର୍ଡ ସ୍ବାଇପ୍ କରିବା, ଟିକେଟ ପ୍ରିଣ୍ଟ କରିବା ପରି ସେବା ଉପଲବ୍ଧ ରହିବ। ତେବେ ଆଗାମୀ ମାର୍ଚ୍ଚ ସୁଦ୍ଧା ଚିହ୍ନଟ ସ୍ଥାନରେ ଏସବୁ କିଓସ୍କ ସ୍ଥାପନ ପାଇଁ ବିଏସ୍ସିଏଲ କର୍ତ୍ତୃପକ୍ଷ ଲକ୍ଷ୍ୟ ରଖି କାର୍ଯ୍ୟ କରୁଥିବା ନନ୍ଦ କହିଛନ୍ତି।
