ନୂଆଦିଲ୍ଲୀ,୧୧-୧୦:: କଶ୍ମୀରକୁ ନେଇ ଚାଇନା ବାରମ୍ବାର ମୁଣ୍ଡ ଖେଳାଉଥିବାବେଳେ ଜିନ୍ଜିଆଙ୍ଗ୍, ହଂକଂ ଓ ତିବ୍ବତ ପ୍ରସଙ୍ଗରେ ଭାରତ କାହିଁକି ନୀରବ ରହୁଛି ବୋଲି ଗୁରୁବାର କଂଗ୍ରେସ ପ୍ରଶ୍ନ କରିଛି। ଏହାସହ ଭାରତର ଆଭ୍ୟନ୍ତରୀଣ ବ୍ୟାପାରରେ ଚାଇନାର ହସ୍ତକ୍ଷେପ ରୋକିବାରେ ନରେନ୍ଦ୍ର ମୋଦି ସରକାର ବିଫଳ ହୋଇଥିବା ବିରୋଧୀ ଦଳ ସମାଲୋଚନା କରିଛି।
କଂଗ୍ରେସ ନେତା ମନୀଷ୍ ତିଓ୍ବାରୀ କହିଛନ୍ତି, କଶ୍ମୀରକୁ ନେଇ ଭାରତ-ପାକିସ୍ତାନ ମଧ୍ୟରେ ଟଣାଓଟରା ଚାଲିଥିବାବେଳେ ଚାଇନା ମଧ୍ୟ ବାରମ୍ବାର ଏହି ପ୍ରସଙ୍ଗ ଉଠାଉଛି। ଏଭଳି ସମୟରେ ଜିନ୍ଜିଆଙ୍ଗ୍ରେ ସଂଖ୍ୟାଲଘୁ ଉଇଗର ମୁସଲମାନଙ୍କ ମାନବାଧିକାର ଉଲ୍ଲଂଘନ, ହଂକଂରେ ସରକାର ବିରୋଧୀ ବିକ୍ଷୋଭ ବେଳେ ଗଣତନ୍ତ୍ର ସପକ୍ଷବାଦୀଙ୍କ ଉପରେ ଦମନଲୀଳା ଏବଂ ତିବ୍ବତରେ ଉତ୍ପୀଡ଼ନ ଭଳି ପ୍ରସଙ୍ଗ ଭାରତ କାହିଁକି ଉଠାଉନାହିଁ। ସେହିପରି ଦକ୍ଷିଣ ଚାଇନା ସାଗର(ଏସ୍ସିଏ)ର ଦାଦାଗିରି ଉପରେ କେନ୍ଦ୍ର ନୀରବ କାହିଁକି। ଏହିସବୁ ପ୍ରସଙ୍ଗ ଉପରେ ଆମେ ନଜର ରଖିଛୁ ବୋଲି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଏବଂ ବହିର୍ବ୍ୟାପାର ମନ୍ତ୍ରଣାଳୟ ଚାଇନାକୁ କାହିଁକି କହୁନାହାନ୍ତି ବୋଲି ମନୀଷ୍ ଟୁଇଟ୍ କରିଛନ୍ତି। ପ୍ରକାଶ ଯେ, ଚାଇନା ରାଷ୍ଟ୍ରପତି ଜି ଜିନ୍ପିଙ୍ଗ୍ ଦୁଇଦିନ ତଳେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କୁ କହିଥିଲେ, କଶ୍ମୀର ସ୍ଥିତି ଉପରେ ଆମର କଡ଼ା ନଜର ରହିଛି।
