ମାଟି କିମ୍ବା ସିମେଣ୍ଟ ଇଟା ନୁହେଁ ଏଥର ସ୍ବପ୍ନର ଘର ନିର୍ମାଣ କରିବେ ଏକ ସ୍ବତନ୍ତ୍ର ଇଟାରେ। ଏହା ପୁଣି ତିଆରି ହୋଇଛି ଶତପ୍ରତିଶତ ବର୍ଜ୍ୟବସ୍ତୁରେ। ଇଟାର ଦାମ୍ ରଖାଯାଇଛି ୧୦ ଟଙ୍କା। ଏହା ମାଟି ଓ ସିମେଣ୍ଟ ଇଟାଠାରୁ ଅଢେଇ ଗୁଣ ମଜଭୁତ। ଏଭଳି ଇଟା ପ୍ରସ୍ତୁତ କରୁଛନ୍ତି ଗୁଜରାଟର ବ୍ୟବସାୟୀ ମନୀଶ କୋଠାରୀ। ପେସାରେ ସେ ଜଣେ ମେକାନିକାଲ ଇଞ୍ଜିନିୟର। ରାଇନୋ ମେଶିନସ୍ କମ୍ପାନୀର ମାଲିକ ତଥା ପରିଚାଳନା ନିର୍ଦ୍ଦେଶକ ମନୀଶ କମ୍ପାନୀକୁ ୧୯୮୬ରେ ପଞ୍ଜୀକରଣ କରିଥିଲେ। କମ୍ପାନୀର ନାମ ଅନୁସାରେ ଇଟାର ନାମ ରଖିଛନ୍ତି ରାଇନୋ ବ୍ରିକ୍ସ ବା ରାଇନୋ ଇଟା। ବର୍ଜ୍ୟ ପ୍ଲାଷ୍ଟିକ୍ ସହ ଫାଉଣ୍ଡ୍ରି ଡଷ୍ଟ୍ (ସିଲିକା, ମାଟି ଓ କାର୍ବନ ମିଶା ଧୂଳି) ମିଶାଇ ସେ ଇଟା ତିଆରି କରୁଛନ୍ତି। ୭୫ ପ୍ରତିଶତ ଫାଉଣ୍ଡ୍ରି ଡଷ୍ଟ ସହ ୨୫ ପ୍ରତିଶତ ପ୍ଲାଷ୍ଟିକ୍ ବର୍ଜ୍ୟ ରହୁଛି ଇଟାରେ। ଏହା ଏବେ ବ୍ୟବହାର କରାଯାଉଥିବା ପାରମ୍ପରିକ ଇଟାଠରୁ ୨୫ ପ୍ରତିଶତ ହାଲ୍କା। ଏହି ଇଟା ତିଆରି କରିବାରେ ପାଣି ବ୍ୟବହାର କରାଯାଉନାହିଁ।ଏଥିରେ କାନ୍ଥ ଗଢିବା ପରେ ବି ସେଥିରେ ପାଣି ଦେବାକୁ ପଡୁନାହିଁ ବୋଲି କହନ୍ତି ୫୨ ବର୍ଷୀୟ ମନୀଶ। ଏହି ଇଟା ଉପରେ ଗବେଷଣା ଓ ବିକାଶ କରିବାରେ ଆର୍ ପ୍ଲସ୍ ଡି ଲାବ୍ (ଏକ ଆର୍କିଟେକ୍ଚରାଲ ଫାର୍ମ) ମନୀଶଙ୍କୁ ସାହଯ୍ୟ କରିଛି। ୨୦୧୮ର ଶେଷାର୍ଦ୍ଧରେ ପ୍ରଥମେ ସେ ଏଭଳି ଇଟା ପ୍ରସ୍ତୁତ କରିବାକୁ ସକ୍ଷମ ହୋଇପାରିଥିଲେ। ଫେବୃୟାରୀ ୨୦୨୦ରେ ଇଟା ତିଆରି କରିବା ଆରମ୍ଭ କରିଥିଲେ। ଏବେ ତାଙ୍କ ପାଖରେ ଇଟା ଲାଗି ଅର୍ଡର ପହଞ୍ଚିବାରେ ଲାଗିଛି।
