ସ୍ବର୍ଣ୍ଣଚମ୍ପା ଫୁଲଚାଷରୁ ବର୍ଷକୁ ୯ ଲକ୍ଷ ଟଙ୍କା ରୋଜଗାର କରୁଛନ୍ତି ମହାରାଷ୍ଟ୍ରର କୃଷକ ରବର୍ଟ ଡିବ୍ରିଟୋ। ଏହା ସହ ସେ ୨୫ଟି ଗାଁରେ ଏହି ଫୁଲଚାଷ କରିବା ପାଇଁ ଲୋକମାନଙ୍କୁ ପ୍ରେରଣା ଦେଇଛନ୍ତି। ଡିବ୍ରିଟୋଙ୍କୁ ବର୍ତ୍ତମାନ ବୟସ ୬୪। ପାଲଘର ଜିଲା ବାସାଇ- ବିରାର ତହସିଲ ଅନ୍ତର୍ଗତ ସତପଲେ ଗାଁରେ ତାଙ୍କ ଘର। ସେଠାରେ ସେ ୩୦ ଗୁଣ୍ଠ ଜମିରେ ସ୍ବର୍ଣ୍ଣଚମ୍ପା ଚାଷ କରୁଛନ୍ତି। ୮ରୁ ୧୦ ଫୁଟ ଯାଏ ବଢି ପାରୁଥିବା ଏହି ଚମ୍ପାଗଛରୁ ଦିନକୁ ପାଖାପାଖି ୧୦ ହଜାର ଫୁଲ ବାହାରୁଛି ଓ ତାହାକୁ ଘର ପାଖରୁ ୫୭ କି.ମି. ଦୂର ମୁମ୍ବାଇର ଦାଦର ଫୁଲ ବଜାରରେ ବିକ୍ରି କରୁଛନ୍ତି। ଏହି କାର୍ଯ୍ୟରେ ସେ କେତେଜଣ ଲୋକଙ୍କୁ ବି ନିଯୁକ୍ତି ଦେଇଛନ୍ତି। ସବୁ ଖର୍ଚ୍ଚ ଯାଇ ସେ ମାସକୁ ୭୫ ହଜାର ଟଙ୍କା ଲାଭ କରୁଛନ୍ତି। ଏହି ଫୁଲ ଏବେ ମୁମ୍ବାଇବାସୀଙ୍କ ଅତି ପ୍ରିିୟ ହୋଇଯାଇଛି। ସେ ଶହେଟି ଫୁଲକୁ ୧୦୦ ଟଙ୍କାରେ ବିକନ୍ତି। କିନ୍ତୁ ଗଣେଶ ଚତୁର୍ଥୀ, ନବରାତ୍ରି ଓ ବାହାଘର ସମୟରେ ଏହାର ଦାମ ପ୍ରାୟ ୭୦୦ ଟଙ୍କା ରହେ। ଡିବ୍ରିଟୋ ପଲିଟେକ୍ନିକ୍ ପଢୁଥିତ୍ଲେ। ପିତାଙ୍କ ମୃତ୍ୟୁ ପରେ ପାଠ ଛାଡି ଦେଇ ମଲ୍ଲିଫୁଲ ଚାଷ ଆରମ୍ଭ କରିଥିଲେ। ପରେ ଏହି ଚାଷରୁ ଓହରି ଆସି ସେ ସ୍ବର୍ଣ୍ଣଚମ୍ପା ଚାଷ ପ୍ରତି ମନ ବଳାଇଥିଲେ। ସେ ତାଙ୍କ ବଗିଚାରେ ଶୁଖିଲା ଗୋବର ଖତ ପ୍ରୟୋଗ କରନ୍ତି ଓ ପ୍ରତି ୪ ଦିନରେ ପାଣି ମଡାନ୍ତି। ଏବେ ତାଙ୍କ ତତ୍ତ୍ୱାବଧାନରେ ବାସାଇ- ବିରାର ତହସିଲର ୨୫ଟି ଗାଁର ପାଖାପାଖି ୫୦୦ ପରିବାର ସ୍ବର୍ଣ୍ଣଚମ୍ପା ଚାଷ କରି ଜୀବିକା ନିର୍ବାହ କରୁଛନ୍ତି। କରୋନା ମହାମାରୀ ସମୟରେ ଚାଷରେ କ୍ଷତି ହେଉଥିତ୍ଲେ ବି ଏହାକୁ ଜାରି ରଖିବା ଲାଗି ସେ ଲୋକମାନଙ୍କୁ ଉତ୍ସାହିତ କରୁଛନ୍ତି। ଏହି ଚାଷକୁ ଲୋକପ୍ରିୟ କରିପାରିଥିବାରୁ ଡିବ୍ରିଟୋଙ୍କୁ ବସନ୍ତରାଓ ନାଏକ କୃଷି ପୁରସ୍କାର ପ୍ରଦାନ କରାଯାଇଛି।
