ଅନୁଗୋଳ ଅଫିସ, ୨୯।୪ – ଅନୁଗୋଳ ପୌର ପ୍ରଶାସନ ପକ୍ଷରୁ ବାଳିକା ଉଚ୍ଚ ବିଦ୍ୟାଳୟ ଓ ଟାଉନ୍ ହାଇସ୍କୁଲ ଠାରେ କ୍ୱାରାଣ୍ଟାଇନ ସେଣ୍ଟର କରାଯାଇଛି। କିନ୍ତୁ ଉକ୍ତ ସେଣ୍ଟର ପାର୍ଶ୍ୱରେ ଦୈନିକ ପରିବା ବ୍ୟବସାୟୀମାନେ ବେପାର କରୁଛନ୍ତି। କରୋନା ସନ୍ଦିଗ୍ଧମାନଙ୍କୁ ସେଠାରେ ରଖାଯାଉଥିବା ବେଳେ ନିକଟରେ ପରିବା ବ୍ୟବସାୟ ସହରବାସୀଙ୍କୁ ଚିନ୍ତାରେ ପକାଇଛି।
ଜଣେ କି ଦୁଇଜଣ ନୁହନ୍ତି, ଅନେକ ବ୍ୟବସାୟୀ ଟାଉନ ଉଚ୍ଚବିଦ୍ୟାଳୟ ପାର୍ଶ୍ୱରେ ପରିବା ପସରା ମେଲାଉଛନ୍ତି। ପାଖାପାଖି ଏକ ସପ୍ତାହ ହେବ ଏପରି ଘଟଣା ଦେଖିବାକୁ ମିଳୁଛି। ସଚେତନ ଥିବା ଅନେକ ଲୋକ ସେଠାକୁ ପରିବା କିଣିବାକୁ ଯାଉ ନ ଥିବାବେଳେ କେତେଜଣ ଗ୍ରାହକ ନିୟମିତ ସମ୍ପୃକ୍ତ ବ୍ୟବସାୟୀଙ୍କଠାରୁ ପରିବା କିଣୁଛନ୍ତି। ହେଲେ ଏ ନେଇ ପୌର ପ୍ରଶାସନ ନିକଟରେ ଖବର ନାହିଁ। ପୋଲିସ ପ୍ରଶାସନ ପକ୍ଷରୁ ସମସ୍ତ ପରିବା ବ୍ୟବସାୟୀଙ୍କୁ ଅନୁଗୋଳ ଷ୍ଟାଡିୟମଠାରେ ବ୍ୟବସାୟ କରିବାକୁ ଅନୁମତି ଦିଆଯାଉଥିବାବେଳେ କିପରି ଟାଉନ୍ ହାଇସ୍କୁଲ ପାର୍ଶ୍ୱରେ ପରିବା ବ୍ୟବସାୟ ହେଉଛି ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ଅନୁଗୋଳ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, ଘଟଣା ଉପରେ ନଜର ପଡ଼ିନାହିଁ। କୌଣସି କର୍ମଚାରୀଙ୍କ ନିକଟରୁ ମଧ୍ୟ ସୂଚନା ମିଳିନାହିଁ। ତେବେ ସେଠାରେ ପସରା ମେଲାଉଥିବା ବ୍ୟବସାୟୀଙ୍କୁ ତୁରନ୍ତ ହଟାଯିବ ବୋଲି ପଣ୍ଡା ପ୍ରକାଶ କରିଛନ୍ତି।
