ନୂଆଦିଲ୍ଲୀ,୨୦।୭(ପି.ଟି.)- ଜିମ୍ବାଓ୍ବେକୁ ଆଇସିସି ବାସନ୍ଦ କରିବା ପରେ ଆସନ୍ତା ଜାନୁୟାରୀରେ ଖେଳାଯିବାକୁ ଥିବା ଭାରତ- ଜିମ୍ବାଓ୍ବେ ସୀମିତ ଓଭର ସିରିଜ ନେଇ ଆଶଙ୍କା ପ୍ରକାଶ ପାଇଛି। ତେବେ ବିକଳ୍ପ ପଦକ୍ଷେପ ବା ନିଷ୍ପତ୍ତି ନେବା ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆସନ୍ତା ଅକ୍ଟୋବର ପର୍ଯ୍ୟନ୍ତ ଅପେକ୍ଷା କରିବ। ଜାନୁୟାରୀରେ ଘରୋଇ ପରିବେଶରେ ଭାରତ ଜିମ୍ବାଓ୍ବେ ବିପକ୍ଷରେ ଏକ ୩ ମ୍ୟାଚ୍ ବିଶିଷ୍ଟ ଟି୨୦ ସିରଜ ଖେଳିବାର କାର୍ଯ୍ୟକ୍ରମ ରହିଛି। ଗୁଆହାଟୀରେ ପ୍ରଥମ ଟି୨- ଜାନୁୟାରୀ ୫ ତାରିଖରେ ଖେଳାଯିବାର କାର୍ଯ୍ୟକ୍ରମେ ରହିଛି। ସେହିପରି ୭ରେ ଇନ୍ଦୋରରେ ଓ ୧୦ରେ ପୁଣେରେ ଯାଥାକ୍ରମ ଦ୍ୱିତୀୟ ଓ ତୃତୀୟ ଟି୨୦ ଖେଳାଯିବାର କାର୍ଯ୍ୟକ୍ରମ ଥିଲା। ତେବେ ଜିମ୍ବାଓ୍ବେ ବାସନ୍ଦ ହେବା ପରେ ଏହି ସିରିଜ୍ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି।
ଏବେ କୌଣସି ବିକଳ୍ପ ଯୋଜନା ନେଇ ଆମେ ଚିନ୍ତା କରୁନାହୁଁ। ଅକ୍ଟୋବର ୧୬ରେ ଆଇସିସିର କ୍ୱାର୍ଟଲି ମିଟିଂ ଆୟୋଜନ ହେବ। ଆଇସିସି ମଧ୍ୟ ଜିମ୍ବାଓ୍ବେକୁ ପରିସ୍ଥିତି ସୁଧାରିବା ପାଇଁ ୩ ମାସ ସମୟ ଦେଇଛି। ତେଣୁ ସେ ପର୍ଯ୍ୟନ୍ତ ଆମକୁ ଅପେକ୍ଷା କରିବାକୁ ହେବ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ତେବେ ଯଦି ଜିମ୍ବାଓ୍ବେ କ୍ରିକେଟ ଆଇସିସିଠାରୁ ସବୁଜ ସଙ୍କେତ ନ ପାଏ ତାହେଲେ ଆମକୁ କିଛି ଯୋଜନା ଆପଣାଇବାକୁ ହେବ। ଆଇସିସିର ଫୁଲ ମେମ୍ବର ଯଥା ଆଫଗାନିସ୍ତାନ, ଶ୍ରୀଲଙ୍କା ଓ ଓ୍ବେଷ୍ଟଇଣ୍ଡିଜ୍ ଯଦି ସେତେବେଳେ କୌଣସି ସିରିଜ ଖେଳୁ ନ ଥାନ୍ତି ତାହେଲେ ଭାରତ ଆସି ସିରିଜ ଖେଳିବା ନେଇ ସମ୍ଭାବନା ରହିବ। ତେବେ ଅକ୍ଟୋବର ପରେ ଯାଇ ସ୍ଥିତି ସ୍ପଷ୍ଟ ହେବ ବୋଲି ସେ କହିଛନ୍ତି।
