ହରାରେ, ୨୦।୭(ପି.ଟି.)- କ୍ରିକେଟ ବ୍ୟାପାରରେ ସରକାରଙ୍କ ଅବାଞ୍ଚିତ ହସ୍ତକ୍ଷେପ କାରଣରୁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଜିମ୍ବାଓ୍ବେକୁ ବାସନ୍ଦ କରିଛି। ଆଇସିସିର ଏହି କଠୋର ପଦକ୍ଷେପରେ ଜିମ୍ବାଓ୍ବେ ଓ ତା’ର ତାରକା କ୍ରିକେଟରମାନେ ଚକିତ ହେବା ସହ ନିରାଶ ହୋଇଛନ୍ତି। ଏହି ନିଷ୍ପତ୍ତି ସେମାନଙ୍କ କ୍ୟାରିୟରକୁ ଅନ୍ଧାରକୁ ଠେଲି ଦେଇଛି ଖେଳାଳିମାନେ ଅଭିଯୋଗ ଆଣିଛନ୍ତି।
ସରକାରଙ୍କ ପ୍ରଭାବ ଓ ହସ୍ତକ୍ଷେପ କାରଣରୁ ଆଇସିସି ସମ୍ବିଧାନର ଖୋଲାଖୋଲି ଉଲ୍ଲଂଘନ ହେଉଥିଲା। ଫଳରେ ଗୁରୁବାର ଜିମ୍ବାଓ୍ବେ କ୍ରିକେଟକୁ ବାସନ୍ଦ କରାଯାଇଥିଲା। ଜିମ୍ବାଓ୍ବେ ତାରକା କ୍ରିକେଟର ସିକନ୍ଦର ରାଜା ଏଥିରେ ନିରାଶ ବ୍ୟକ୍ତି କରିଛନ୍ତି। ଏ ଭଳି ଢ଼ଙ୍ଗରେ କ୍ରିକେଟରୁ ବିଦାୟ ନେବାକୁ କେବେ ଭାବ ନ ଥିଲି ବୋଲି ବେଶ୍ ଭାବପ୍ରବଣ ହୋଇ ସେ ଟୁଇଟ୍ କରି ଜଣାଇଛନ୍ତି। ଗୋଟିଏ ନିଷ୍ପତ୍ତି ସାରା ଦଳକୁ ଏକଘରକିଆ କରିଦେଇଛି। ଏହା ଦ୍ୱାରା ବହୁ ଲୋକ ସେମାନଙ୍କ ଜୀବିକା ହରାଇଛନ୍ତି। ଏହାଦ୍ୱାରା ସେମାନଙ୍କ ପରିବାର ମଧ୍ୟ କ୍ଷତିଗ୍ରସ୍ତ ହେବ। ବାସନ୍ଦ ହେବା ଫଳରେ ଆଇସିସି ଜିମ୍ବାଓ୍ବେ କ୍ରିକେଟକୁ ଆଉ କୌଣସି ଅନୁଦାନ ଦେବନାହିଁ।
ପୂର୍ବତନ ଜିମ୍ବାଓ୍ବେ ଅଧିନାୟକ ବ୍ରେଣ୍ଡନ ଟେଲର ଆଇସିସିର ଏଭଳି କଠୋର ନିଷ୍ପତ୍ତି କ୍ରିକେଟ ସହିତ ଜଡିତ ରହିଆସିଥିବା ବହୁ ଲୋକଙ୍କ କ୍ୟାରିୟରକୁ ଶେଷ କରିଦେଇଛି। ଶହଶହ ସଂଖ୍ୟାରେ ସଚ୍ଚୋଟ ଲୋକ, ଖେଳାଳି, ସପୋର୍ଟ ଷ୍ଟାଫ୍, ଗ୍ରାଉଣ୍ଡ ଷ୍ଟାଫ୍ ସେମାନଙ୍କ ଚାକିରି ହରାଇଛନ୍ତି ବୋଲି ଟେଲର ଟୁଇଟ କରି ଜଣାଇଛନ୍ତି। ଜିମ୍ବାଓ୍ବେ ଦ୍ରୁତ ବୋଲର କାଇଲ ଜାର୍ଭିସ ମଧ୍ୟ ଏଥିରେ ନିରାଶ ବ୍ୟକ୍ତ କରିଛନ୍ତି। ଜିମ୍ବାଓ୍ବେ ଅଲରାଉଣ୍ଡର ସୋଲୋମୋନ ମାଇର କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କରିଛନ୍ତି। ଏ ସଂକ୍ରାନ୍ତରେ ଖେଳାଳି ଓ ଟେକ୍ନିକାଲ ଷ୍ଟାଫ୍ଙ୍କୁ ଜଣାଇଛି ବୋଲି ସେ ତାଙ୍କ ଇନ୍ଷ୍ଟାଗ୍ରାମ୍ ପେଜରେ ଉଲ୍ଲେଖ କରିଛନ୍ତି। ଆଇସିସିର ଏହି ନିଷ୍ପତ୍ତି ଦୁର୍ଭାଗ୍ୟଜନକ ବୋଲି ୨୯ ବର୍ଷୀୟ ସୋଲୋମୋନ କହିଛନ୍ତି। ସେ ଜିମ୍ବାଓ୍ବେ ପାଇଁ ୪୭ଟି ଦିନିକିଆ ମ୍ୟାଚ୍ ଖେଳିଛନ୍ତି। ଉଲ୍ଲେଖଥାଉ କି, ଜିମ୍ବାଓ୍ବେ ୨୦୨୦ ଜାନୁୟାରୀରେ ଭାରତ ଗସ୍ତ କରି ୩ଟି ଟି୨୦ ମ୍ୟାଚ୍ ଖେଳିବା କାର୍ଯ୍ୟକ୍ରମ ରହିଥିଲା। ଶେଷଥର ପାଇଁ ଜିମ୍ବାଓ୍ବେ ୨୦୦୨ ଫେବୃୟାରୀ ଓ ମାର୍ଚ୍ଚରେ ଭାରତ ଗସ୍ତ କରିଥିଲା।
