ନୂଆଦିଲ୍ଲୀ, ୧୨।୭: ଉତ୍ତରପ୍ରଦେଶରେ ଗ୍ୟାଙ୍ଗଷ୍ଟର ବିକାଶ ଦୁବେଙ୍କ ଏନ୍କାଉଣ୍ଟର ପରେ ଏବେ ୫ ବର୍ଷର ଏନ୍କାଉଣ୍ଟର ତଥ୍ୟ ନେଇ ସାରା ଦେଶରେ ଚର୍ଚ୍ଚା ଜାରି ରହିଛି। ଅପରାଧୀଙ୍କୁ ଏନ୍କାଉଣ୍ଟର କରାଯିବା କିଛି ନୂଆ ଘଟଣା ନୁହେଁ। ୨୦୧୨-୧୩ରୁ ୨୦୧୭-୧୮ ଗତ ୫ ବର୍ଷ ମଧ୍ୟରେ ଦେଶରେ ୮୨୮ ଅପରାଧୀଙ୍କୁ ଏନ୍କାଉଣ୍ଟର କରାଯାଇଛି। ସେଥିମଧ୍ୟରେ ୧୦୧୪-୧୫ରେ ସର୍ବାଧିକ ୧୮୮ ଏନ୍କାଉଣ୍ଟର ହୋଇଛି। ଏସବୁ ଏନ୍କାଉଣ୍ଟର ମଧ୍ୟରେ ୨୦୧୩ଠାରୁ ୨୦୧୭ ମଧ୍ୟରେ ଗତ ୫ ବର୍ଷରେ ୨୫୬ ଫେକ୍ ଏନ୍କାଉଣ୍ଟର ଘଟଣା ଘଟିଛି। ୨୦୧୫ରେ ସର୍ବାଧିକ ୧୪୦ଟି ଫେକ୍ ଏନ୍କାଉଣ୍ଟର ହୋଇଛି। ଦେଶର ୫ଟି ରାଜ୍ୟ ଫେକ୍ ଏନ୍କାଉଣ୍ଟର ତାଲିକାରେ ରହିଛନ୍ତି। ଉତ୍ତରପ୍ରଦେଶ ସହିତ ଆସାମ, ଛତିଶଗଡ଼, ମେଘାଳୟ ଏବଂ ଝାଡ଼ଖଣ୍ଡରେ ଏନ୍କାଉଣ୍ଟର ଘଟଣା ପ୍ରାୟତଃ ଘଟିଥାଏ।ଫେକ୍ ଏନ୍କାଉଣ୍ଟର ଘଟଣାରେ ଉତ୍ତରପ୍ରଦେଶ ମଧ୍ୟ ଆଗୁଆ ରହିଛି। ଏଠାରେ ଏହି ସମୟ ମଧ୍ୟରେ ୪୫ ପ୍ରତିଶତ ଫେକ୍ ଏନ୍କାଉଣ୍ଟର ଘଟିଛି। ଆପରାଧୀକ ଘଟଣାରେ ଉତ୍ତରପ୍ରଦେଶ ସବୁବେଳେ ଆଗରେ ରହିଛି। ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବଙ୍କ ଶାସନର ୩ ବର୍ଷ ମଧ୍ୟରେ ରାଜ୍ୟରେ ୧୬ ଏନ୍କାଉଣ୍ଟର ହୋଇଥିଲା। ତେବେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସରକାରରେ ଗତ ୩ ବର୍ଷ ମଧ୍ୟରେ ଏହା ୭ଗୁଣା ବୃଦ୍ଧି ପାଇ ୧୧୨ରେ ପହଞ୍ଚିଛି। ୨୦୧୮ରେ ଦେଶରେ ୨୨ ଫେକ୍ ଏନ୍କାଉଣ୍ଟର କରାଯାଇଥିବାବେଳେ ସେଥିମଧ୍ୟରୁ ଉତ୍ତରପ୍ରଦେଶ ୭୭ ପ୍ରତିଶତ ଅର୍ଥାତ୍ ୧୭ଟି ଘଟଣା ଘଟିଛି। ୨୦୧୨ରୁ ୨୦୧୭ ମଧ୍ୟରେ ଉତ୍ତରପ୍ରଦେଶ ସରକାର ଫେକ୍ ଏନ୍କାଉଣ୍ଟର ଯୋଗୁ ସର୍ବାଧିକ ୧୩ କୋଟି ୨୩ ଲକ୍ଷ ଟଙ୍କାର କ୍ଷତିପୂରଣ ଦେଇଛନ୍ତି।
