ଓ୍ୱାଶିଂଟନ,୨୬ା୭: ଆମେରିକା ସିନେଟ୍ରେ ଏକ ନୂଆ ବିଧେୟକ ଆସିଛି। ଏହି ବିଲ୍ ଅନୁଯାୟୀ ଆଗାମୀ ୩ବର୍ଷ ପାଇଁ ନୂତନ ଏଚ୍-୧ବି ଭିଜା ସେବା ବନ୍ଦ ରଖିବାକୁ ଏବଂ ଟ୍ରମ୍ପ ପ୍ରଶାସନ ଦ୍ୱାରା ଲଗାଯାଇଥିବା ୧,୦୦,୦୦୦ ଡଲାର ଦେୟକୁ ନିୟମରେ ପରିଣତ କରିବାକୁ ପ୍ରସ୍ତାବ ଦିଆଯାଇଛି। ଭାରତ ଏବଂ ଚାଇନା ଭଳି ଦେଶର ବୈଷୟିକ କର୍ମଚାରୀମାନେ ମୁଖ୍ୟତଃ ଏହି ଭିଜା ଜରିଆରେ ଆମେରିକାରେ କାମ କରୁଥିବାରୁ, ଏହି ବିଧେୟକ ପାସ୍ ହେଲେ ଆମେରିକୀୟ କମ୍ପାନୀଗୁଡ଼ିକ ଏବଂ ବିଦେଶୀ କର୍ମଚାରୀମାନେ ବଡ଼ଧରଣର ପ୍ରତିବନ୍ଧକ ସାମ୍ନା କରିବେ। ଏଚ୍-୧ବି ଭିଜା ହେଉଛି ଏକ ଅସ୍ଥାୟୀ ଭିଜା, ଯାହା ଆମେରିକା କମ୍ପାନୀଗୁଡ଼ିକୁ ବିଶେଷଜ୍ଞ କ୍ଷେତ୍ରରେ ଦକ୍ଷ କର୍ମଚାରୀଙ୍କୁ ନିଯୁକ୍ତି ଦେବା ପାଇଁ ଅନୁମତି ଦେଇଥାଏ। ଭାରତ ଏବଂ ଚାଇନା ଭଳି ଦେଶରୁ ପ୍ରତିବର୍ଷ ଅନେକ ହଜାର କର୍ମଚାରୀଙ୍କୁ ନିଯୁକ୍ତି ଦେବା ପାଇଁ ଆମେରିକାର ଟେକ୍ନୋଲୋଜି କମ୍ପାନୀଗୁଡ଼ିକ ଏହି ଭିଜା ଉପରେ ନିର୍ଭର କରନ୍ତି।
ମଣ୍ଟାନାର ଆମେରିକୀୟ ସିନେଟର ଟିମ୍ ଶିହୀ କହିଛନ୍ତି, ଏଚ୍-୧ବି କାର୍ଯ୍ୟକ୍ରମଟି କଠିନ ଏବଂ ସ୍ୱତନ୍ତ୍ର ପଦବୀଗୁଡ଼ିକ ପାଇଁ କର୍ମଚାରୀ ଅଭାବକୁ ଦୂର କରିବାକୁ ତିଆରି ହୋଇଥିଲା-ଶସ୍ତା ବିଦେଶୀ ଶ୍ରମିକଙ୍କୁ ଆଣି ଯୋଗ୍ୟ ଆମେରିକୀୟଙ୍କୁ ବାହାର କରିବା ପାଇଁ ନୁହେଁ। ମୋର ଏହି ବିଧେୟକ ଏହି କାର୍ଯ୍ୟକ୍ରମକୁ ଏହାର ମୂଳ ଉଦ୍ଦେଶ୍ୟକୁ ଫେରାଇବ ଏବଂ ଆମେରିକୀୟ ଶ୍ରମିକମାନଙ୍କୁ ପ୍ରଥମ ସ୍ଥାନ ଦେବ। ଏହି ପ୍ରସ୍ତାବରେ ଲଟେରି ପଦ୍ଧତି ବଦଳରେ ଦରମା ଆଧାରରେ କର୍ମଚାରୀ ଚୟନ କରାଯିବ। ଏକାସଙ୍ଗେ ଏକାଧିକ କାମ କରିବା ଏବଂ ତୃତୀୟ ପକ୍ଷ ଏଜେନ୍ସି ମଡେଲକୁ ବାରଣ କରାଯିବ। ଏଚ୍-୧ବି ଭିଜାଧାରୀମାନେ ନିଜ ସହ ଲୋକଙ୍କୁ ଆଣିବା ଉପରେ ରୋକ୍ ଲଗାଯିବ।
