ଛେଣ୍ଡିପଦା,୯ା୮(ସ୍ବ.ପ୍ର.):ଲକ୍ଷ୍ୟ ଥିଲା ୭୦୦ ହେକ୍ଟର ଜମି ଜଳସେଚିତ ହେବ। ସେଥିପାଇଁ ୫୦ ବର୍ଷ ତଳେ ନିର୍ମାଣ କରାଯାଇଥିଲା ବାଲିବନ୍ଧ କ୍ଷୁଦ୍ର ଜଳସେଚନ ପ୍ରକଳ୍ପ। ଉପକୃତ ହେଉଥିଲେ ପାଖାପାଖି ଏକ ହଜାର ଚାଷୀ। ହେଲେ ଦୀର୍ଘବର୍ଷ ହେଲା ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଏହି ପ୍ରକଳ୍ପ ପୋତି ହୋଇଚାଲିଛି। ଫଳରେ ଜଳଧାରଣ କ୍ଷମତା ହ୍ରାସ ପାଉଥିବାରୁ କେନାଲରେ ଅଧିକ ପାଣି ଚାଷ ଜମିକୁ ଯାଇପାରୁ ନାହିଁ। ସଫେଇ ଅଭାବରୁ କେନାଲ ଅବସ୍ଥା ମଧ୍ୟ ଶୋଚନୀୟ। ବାରମ୍ବାର ଅଭିଯୋଗ ସତ୍ତ୍ୱେ ବିଭାଗ ପକ୍ଷରୁ ପଦକ୍ଷେପ ନିଆଯାଉ ନ ଥିବାରୁ ଅନୁଗୋଳ ଜିଲା ଛେଣ୍ଡିପଦା ବ୍ଲକ ବାଗଡିଆ ଓ ଟାଙ୍ଗିରି ପଞ୍ଚାୟତର ବହୁ ହେକ୍ଟର ଜମି ପଡ଼ିଆ ପଡ଼ୁଛି।
ଛେଣ୍ଡିପଦା ବ୍ଲକ ବାଗଡିଆ ପଞ୍ଚାୟତର ବାଲିବନ୍ଧଠାରେ ୧୯୭୦ ମସିହାରେ ନିର୍ମାଣ କରାଯାଇଥିବା ଏହି କ୍ଷୁଦ୍ର ଜଳସେଚନ ପ୍ରକଳ୍ପ ଉପରେ ବାଗଡିଆ ଓ ଟାଙ୍ଗିରି ପଞ୍ଚାୟତର ବାଗଡିଆ, ବଣିଆନଟି ଏବଂ ପୁରୁଣାଗଡ ଆଦି ଗ୍ରାମର ଏକ ହଜାର ଚାଷୀ ନିର୍ଭର କରନ୍ତି। ଏହି ଦୁଇ ପଞ୍ଚାୟତର ଚାଷ ଜମିକୁ ପାଣି ଯିବା ପାଇଁ ପ୍ରକଳ୍ପରୁ ୫ କିଲୋମିଟର କେନାଲ ବ୍ୟବସ୍ଥା ରହିଛି। କିନ୍ତୁ ପ୍ରକଳ୍ପ ଓ କେନାଲର ରକ୍ଷଣାବେକ୍ଷଣ ଦିଗରେ ଆବଶ୍ୟକ ଦୃଷ୍ଟି ଦିଆଯାଉ ନାହିଁ। ସଫେଇ ଓ ମରାମତି ଅଭାବରୁ ପ୍ରକଳ୍ପ ସହ କେନାଲ ପୋତି ହେଉଛି। ପ୍ରକଳ୍ପ ଭିତରକୁ ମାଟି ଧସି ଗଦା ହୋଇଥିବା ବେଳେ କୋନଲ ଲଟା ବୁଦାରେ ପରିପୂର୍ଣ୍ଣ ହୋଇଯାଇଛି। ଏହି କାରଣରୁ କେନାଲରେ ଅଧିକ ପାଣି ଚାଷ ଜମି ନିକଟକୁ ଯାଇପାରୁ ନାହିଁ। ଫଳରେ ତଳମୁଣ୍ଡରେ ଥିବା ଚାଷ ଜମି ଜଳସେଚିତ ହୋଇପାରୁ ନାହିଁ। ଖରିଫ ଚାଷ ପାଇଁ ଆବଶ୍ୟକ ବର୍ଷା ହେଉ ନ ଥିବାରୁ ଏହି କେନାଲ ପାଣିକୁ ଚାଷୀମାନେ ଭରସା କରିଥିବା ବେଳେ କ୍ଷୁଦ୍ର ଜଳସେଚନ ବିଭାଗ ପଦକ୍ଷେପ ନ ନେବା ଚାଷୀମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ତୁରନ୍ତ କେନାଲର ମରାମତି କାର୍ଯ୍ୟ କରିବା ପାଇଁ ଚାଷୀମାନେ ଦାବି କରିଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ସନ୍ତୋଷ ବିଶ୍ବାଳ କହିଛନ୍ତି, ଉକ୍ତ ପ୍ରକଳ୍ପ କାମ ଏକ ଠିକା ସଂସ୍ଥାକୁ ଦିଆଯାଇଥିଲା। କିନ୍ତୁ ଠିକା ସଂସ୍ଥା କାମ ନ କରିବାରୁ ତାହା ପଡିରହିଛି। ଖୁବ୍ଶୀଘ୍ର ପ୍ରକଳ୍ପର କେନାଲ ସଫେଇ କରାଯାଇ ଚାଷ ଜମି ନିକଟରେ କିପରି ପାଣି ପହଞ୍ଚାଯିବ ସେ ନେଇ ପଦକ୍ଷେପ ନିଆଯିବ।
