
କେନ୍ଦୁଝର,୧୬।୧ (ନରେଶ ଚନ୍ଦ୍ର ପଟ୍ଟନାୟକ): ମହିଳାଙ୍କ ବେକରୁ ସୁନା ଚେନ୍ ଟାଣିନେଲେ ଲୁଟେରା। ଏହି ଘଟଣା ବୁଧବାର ଘଟିଥିବା ଜଣାପଡିଛି। ତେବେ ପୋଲିସ ଗୁରୁବାର ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବାବେଳେ ଜଣେ ଦୋକାନୀ ପାଖରୁ ସିସିଟିଭି ଫୁଟେଜ ନେଇଛି। ଠିକ୍ ଏସପି ଅଫିସ ପଛରେ ଥିବା ପିଡବ୍ଲ୍ୟୁଡି ଅଫିସ ସାମ୍ନାରେ ଏହି ଲୁଟ ହୋଇଛି। ସୁନା ଚେନ୍ ଝାମ୍ପି ନେଇ ଲୁଟେରା କଲେଜ ଛକ ଆଡ଼େ ବାଇକରେ ଛୁ ମାରିଥିଲେ। ସ୍ଥାନୀୟ ଲୋକେ ଧରିବାକୁ ଗୋଡାଇ ଥିଲେ ମଧ୍ୟ ଲୁଟେରା ଖସି ପଳାଇଥିଲେ। ପଛରେ ଆଉ ଏକ ବାଇକରେ ୨ ଯୁବକ ଥିଲେ ସେମାନେ ବୋଧେ ଲୁଟେରାଙ୍କ ସାଥୀ ହୋଇ ପାରନ୍ତି ଅନୁମାନ କରାଯାଉଛି। ଏହି ଘଟଣା ପରେ ମହିଳା ଜଣଙ୍କ ଏତଲା କ୍ରମେ ପୋଲିସ ଅଧିକ ତଦନ୍ତ କରୁଛି। ଏସ୍ପି ଅଫିସ ପାଖେ ଦିନରେ ବଜାର ଉପରେ ଏହି ଘଟଣା ଘଟିଥିବାରୁ ପୋଲିସ ଲାଗି ଏକ ଶକ୍ତ ଚାଲେଞ୍ଜ ସୃଷ୍ଟି କରିଛି।