କଲମ୍ବୋ,୮।୧୦: ଶେଷରେ ସେହିଆ ହିଁ ହେଲା, ଯାହାକୁ ନେଇ ଚର୍ଚ୍ଚା ଜୋର୍ ଧରିଥିଲା। ଶ୍ରୀଲଙ୍କା ଟେଷ୍ଟ ଦଳର ଅଧିନାୟକ ପଦରୁ ଇସ୍ତଫା ଦେଇଛନ୍ତି ଧନଞ୍ଜୟ ଡି’ସିଲ୍ଭା। ନିକଟରେ ଶ୍ରୀଲଙ୍କା ନିଜ ଘରୋଇ ମାଟିରେ ଭାରତ ବିପକ୍ଷ ଟେଷ୍ଟ ସିରିଜ୍ରେ ୦-୧ରେ ପରାଜିତ ହୋଇଥିଲା। ଏହି ଶୋଚନୀୟ ପରାଜୟ ପରେ ଧନଞ୍ଜୟଙ୍କ ଅଧିନାୟକ ପଦ ଯିବା ନେଇ ଆଶଙ୍କା କରାଯାଉଥିବା ବେଳେ ଏବେ ସେଥିରେ ମୋହର ବାଜିଛି। ତାଙ୍କ ସ୍ଥାନରେ ଦଳର ନିର୍ଭରଯୋଗ୍ୟ ବ୍ୟାଟର କୁଶଲ ମେଣ୍ଡିସ୍ଙ୍କୁ ଟେଷ୍ଟ ଦଳର ନୂଆ ଅଧିନାୟକ ଭାବେ ଦାୟିତ୍ୱ ଦିଆଯିବାକୁ ଯାଉଛି।
ଧନଞ୍ଜୟ ଡି’ସିଲ୍ଭାଙ୍କ ନେତୃତ୍ୱରେ ଶ୍ରୀଲଙ୍କା ଦଳର ନିରାଶାଜନକ ପ୍ରଦର୍ଶନ ହିଁ ତାଙ୍କ ଅଧିନାୟକ ପଦ ଯିବାର ମୁଖ୍ୟ କାରଣ ସାଜିଛି। ୨୦୨୪ ମସିହାରେ ସେ ଶ୍ରୀଲଙ୍କା ଟେଷ୍ଟ ଦଳର ଅଧିନାୟକ ହୋଇଥିଲେ। ମାତ୍ର ବିଗତ ଦୁଇ ବର୍ଷ ମଧ୍ୟରେ ତାଙ୍କ ନେତୃତ୍ୱରେ ଦଳ ଖେଳିଥିବା ମୋଟ ମ୍ୟାଚ୍ରୁ ମାତ୍ର ୭ଟି ଟେଷ୍ଟରେ ବିଜୟୀ ହୋଇଥିବା ବେଳେ ୮ଟିରେ ପରାଜୟର ସାମ୍ନା କରିଥିଲା। ତାଙ୍କ କପ୍ତାନ୍ସିରେ ଦଳର ଜିତିବା ହାର (Win Percentage) ମାତ୍ର ୩୮.୮୮% ରହିଥିଲା। ଏହି ବିଫଳତା ପରେ ବୋର୍ଡ କୁଶଲ ମେଣ୍ଡିସ୍ଙ୍କ ଉପରେ ଆସ୍ଥା ପ୍ରକଟ କରିଛି। ସୂଚନାଯୋଗ୍ୟ ଯେ, ମେଣ୍ଡିସ୍ ବର୍ତ୍ତମାନ ଦଳର ଏକଦିବସୀୟ (ODI) ଓ ଟି-୨୦ ଦଳର ମଧ୍ୟ ଅଧିନାୟକ ରହିଛନ୍ତି।
ସାମ୍ପ୍ରତିକ ସମୟରେ କୁଶଲ ମେଣ୍ଡିସ୍ ଶ୍ରୀଲଙ୍କାର ଅନ୍ୟତମ ଶ୍ରେଷ୍ଠ ବ୍ୟାଟର ଏବଂ ସେ ପ୍ରତ୍ୟେକ ଫର୍ମାଟ୍ରେ କ୍ରମାଗତ ରନ୍ ସଂଗ୍ରହ କରିଆସୁଛନ୍ତି। ତେବେ ତାଙ୍କ ଫିଟ୍ନେସ୍କୁ ନେଇ କିଛି ସମସ୍ୟା ରହିଛି। ଭାରତ ବିପକ୍ଷ ନିକଟତର ଟେଷ୍ଟ ସିରିଜ୍ରେ ମଧ୍ୟ ଆଘାତ ସମସ୍ୟା ଯୋଗୁ ସେ ଖେଳିପାରି ନ ଥିଲେ। ଏହା ବ୍ୟତୀତ ତାଙ୍କ କ୍ୟାରିୟର ସହ ଶୃଙ୍ଖଳାଗତ ବିବାଦ ମଧ୍ୟ ଯୋଡ଼ି ହୋଇ ରହିଛି। ୨୦୨୧ ଇଂଲଣ୍ଡ ଗସ୍ତ ସମୟରେ ନିୟମ ଭଙ୍ଗ କରିବା ଯୋଗୁ ତାଙ୍କୁ ଆନ୍ତର୍ଜାତୀୟ କ୍ରିକେଟ୍ରୁ ୧ ବର୍ଷ ପାଇଁ ବାସନ୍ଦ କରାଯିବା ସହ ୧ କୋଟି ଶ୍ରୀଲଙ୍କା ଟଙ୍କାର ଜରିମାନା ଲଗାଯାଇଥିଲା। ତେବେ ପରବର୍ତ୍ତୀ ସମୟରେ ସୁଧାର ଆସିବାରୁ ତାଙ୍କ ଉପରୁ ପ୍ରତିବନ୍ଧକ ହଟାଯାଇଥିଲା।
୩୧ ବର୍ଷୀୟ କୁଶଲ ମେଣ୍ଡିସ୍ ଶ୍ରୀଲଙ୍କା ଦଳର ଅନ୍ୟତମ ଅଭିଜ୍ଞ ଖେଳାଳି। ସେ ନିଜ କ୍ୟାରିୟରରେ ୭୫ଟି ଟେଷ୍ଟ ମ୍ୟାଚ୍ ଖେଳି ୩୬ରୁ ଅଧିକ ହାରାହାରିରେ ୪,୮୩୬ ରନ୍ ସଂଗ୍ରହ କରିଛନ୍ତି, ଯେଉଁଥିରେ ୧୦ଟି ଶତକ ଓ ୨୩ଟି ଅର୍ଦ୍ଧଶତକ ସାମିଲ ଅଛି। ଏହା ବ୍ୟତୀତ ସେ ୧୫୯ଟି ଏକଦିବସୀୟ (ODI) ମ୍ୟାଚ୍ରୁ ୫,୧୬୦ ରନ୍ ଏବଂ ୧୦୯ଟି ଟି-୨୦ ମ୍ୟାଚ୍ରୁ ୨,୬୯୪ ରନ୍ ହାସଲ କରିଛନ୍ତି।
