ମହାକାଳପଡ଼ା,୨୬ା୧(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବତୀଘର-ଖରିନାଶି ଟୁବି ଫେରିଘାଟ ଡଙ୍ଗା ଚଳାଚଳକୁ ନେଇ ଉଭୟ ପଞ୍ଚାୟତ ମଧ୍ୟରେ ବିବାଦ ସୃଷ୍ଟି ହୋଇଥିଲା। ଏହି ଫେରିଘାଟ ଡଙ୍ଗା ୧୯୮୪ଠାରୁ ବତୀଘର ପଞ୍ଚାୟତ ନିୟନ୍ତ୍ରଣରେ ବ୍ଲକ ପ୍ରଶାସନ ପକ୍ଷରୁ ନିଲାମ ପ୍ରକ୍ରିୟା ହୋଇଥାଏ। ହେଲେ ୪ ବର୍ଷ ହେବ ଖରିନାଶି ପଞ୍ଚାୟତ ପକ୍ଷରୁ ଏହି ଘାଟ ନିଲାମର ୫୦ପ୍ରତିଶତ ଅର୍ଥ ଦାବି କରାଯାଇଥିଲା। ଏହାକୁ ନେଇ ଖରିନାଶି ପଞ୍ଚାୟତ କର୍ତ୍ତୃପକ୍ଷ ଉଚ୍ଚ ନ୍ୟାୟାଳୟର ଦାରସ୍ଥ ହୋଇଥିଲେ। ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ଅନୁସାରେ କେନ୍ଦ୍ରାପଡ଼ା ଜିଲାପାଳ ଉଭୟ ପକ୍ଷଙ୍କୁ ଡାକି ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରିବେ ବୋଲି ରାୟରେ ଉଲ୍ଲେଖ କରିଥିଲେ। ଏହାକୁ ନେଇ ଜିଲାପାଳ ଡିସେମ୍ବର ୨୪ରେ ଉଭୟ ପଞ୍ଚାୟତ ସରପଞ୍ଚଙ୍କୁ ଉପସ୍ଥିତ ରହିବା ପାଇଁ ପରାମର୍ଶ ଦେଇଥିଲେ। ପରେ ଉଭୟ ପଞ୍ଚାୟତର ସମସ୍ତ ରେକର୍ଡ ପତ୍ର ଯାଞ୍ଚ କରିଥିଲେ । ସାମୂହିକ ସ୍ବାର୍ଥ ଦୃଷ୍ଟିରୁ ବିବାଦର ସମାଧାନ ପାଇଁ ଉଦ୍ୟମ କରିଥିଲେ। ଏହା ସତ୍ତ୍ୱେ ଦୁଇ ପଞ୍ଚାୟତ ପୂର୍ବ ପରି ଫେରି ଘାଟ ଡଙ୍ଗା ଚଳାଇ ଥିବା ଦେଖିବାକୁ ମିଳିଥିଲା। ପରେ ଜିଲାପାଳଙ୍କ ଅଫିସ ଚିଠି ନମ୍ବର ୬୩, ୯ା୧ା୨୦୨୫ ଅନୁସାରେ ବତୀଘର ପଞ୍ଚାୟତକୁ ମୋଟ ନିଲାମ ଅର୍ଥର ୯୦ ଓ ଖରିନାଶି ପଞ୍ଚାୟତକୁ ୧୦ ପ୍ରତିଶତ ମୋଟ ନିଲାମ ଅର୍ଥ ପ୍ରଦାନ କରିବା ପାଇଁ ବ୍ଲକ ପ୍ରଶାସନକୁ ନିର୍ଦ୍ଦେଶ ଦିଆଯାଇଛି । ପ୍ରଶାସନ ଚିଠି ମିଳିବା ପରେ ମଧ୍ୟ ଖରିନାଶି ଘାଟ ପୂର୍ବପରି ବେଆଇନ ଭାବେ ଫେରିଘାଟ ଡଙ୍ଗା ଚଳାଚଳ କରିଥିଲା। ଖବର ପାଇ ଶୁକ୍ରବାର ଅପରାହ୍ନରେ ମହାକାଳପଡ଼ା ତହସିଲଦାର ତଥା ଭାରପ୍ରାପ୍ତ ବିଡ଼ିଓ ଶିବ ମଲିକଙ୍କ ସମେତ ଜମ୍ବୁ ସାମୁଦ୍ରିକ ଥାନା ଟିମ୍କୁ ନେଇ ଚଢ଼ାଉ କରାଯାଇଥିଲା। ହେଲେ ଆଗୁଆ ସୂଚନା ପାଇ ଖରିନାଶି ଫେରିଘାଟ ଡଙ୍ଗା ଦେଖିବକୁ ମିଳି ନ ଥିଲା। ପରେ ମାଜିଷ୍ଟ୍ରେଟ ତଥା ବିଡ଼ିଓ ଘଟଣା ସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହ ଆଲୋଚନା କରି ଫେରିଥିଲେ।
ପ୍ରଶାସନ ନିର୍ଦ୍ଦେଶ ଅବମାନନା କଲେ ବେଆଇନ ଡଙ୍ଗା ଜବତ ଓ ଘାଟ ଚାଳକଙ୍କୁ ଗିରଫ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। ମହାକାଳପଡ଼ା ତହସିଲଦାର ତଥା ଭାରପ୍ରାପ୍ତ ବିଡ଼ିଓ ଶିବ ମଲିକ କୁହନ୍ତି, ଏ ସମ୍ପର୍କରେ ଜିଲାପାଳଙ୍କୁ ଅବଗତ କରାଯାଇଛି। ଆଇନ ଅନୁସାରେ ପଦକ୍ଷେପ ଗ୍ରହଣ କରାଯିବ।
