କେନ୍ଦୁଝର,୧୬ା୧୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସହର ଜେଲରୋଡ୍ ରାସ୍ତାରେ ଶନିବାର ଅପରାହ୍ନରେ ଏକ ପୋଲିସ ଗାଡ଼ି ଧକ୍କାରେ ଜଣେ ଛାତ୍ର ଗୁରୁତର ହୋଇଛନ୍ତି। ତାଙ୍କ ନାମ ଶୁଭମ ଖାଡ଼ଙ୍ଗା ଏବଂ ସେ ସ୍ଥାନୀୟ ସ୍ବରସ୍ବତୀ ଶିଶୁ ବିଦ୍ୟାମନ୍ଦିରରେ ନବମ ଶ୍ରେଣୀରେ ପାଠ ପଢୁଛନ୍ତି। ସ୍କୁଲ ଛୁଟି ପରେ ସାଇକେଲରେ ନୂଆସାହିରେ ତାଙ୍କ ଘରକୁ ଫେରୁଥିବାବେଳେ ସମ୍ମୁଖ ପଟୁ ଆସୁଥିବା ଏକ ପୋଲିସ ପାଟ୍ରୋଲିଂ ବୋଲେରୋ (ଓଡି ୦୫ ବିଏମ୍ ୫୮୪୫) ଧକ୍କା ଦେଇଥିଲା। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିଲା। ଗାଡ଼ି ଧକ୍କାରେ ତାଙ୍କ ସାଇକେଲ ଭାଙ୍ଗିଯାଇଛି। ପୋଲିସ ଗାଡ଼ିରେ ଥିବା କର୍ମଚାରୀମାନେ ଆହତ ଛାତ୍ରଙ୍କୁ ଉଦ୍ଧାର କରି କେନ୍ଦୁଝର ମୁଖ୍ୟ ଚିକିତ୍ସାଳୟକୁ ନେଇଥିଲେ। ଛାତ୍ରଙ୍କ ଗୋଡ଼ ଭାଙ୍ଗି ଯାଇଥିବାବେଳେ ମୁହଁରେ ମାଡ଼ ହୋଇଥିବା ଜଣାପଡ଼ିଛି।
ଉକ୍ତ ରାସ୍ତାରେ ପରିବା ମାର୍କେଟଠାରୁ ଆରମ୍ଭ କରି ମାଛ ଦୋକାନୀ ବର୍ଷ ତମାମ ବସୁଥିବାରୁ ଟ୍ରାଫିକ୍ ସମସ୍ୟା ସୃଷ୍ଟି ହେଉଥିବାବେଳେ ଏବେ ଚାଲିଥିବା ହସ୍ତତନ୍ତ ମେଳା ଯୋଗୁ ରାସ୍ତାରେ ବେଆଇନ ଗାଡ଼ି ପାର୍କିଂ ହେଉଛି। ଫଳରେ ଉକ୍ତ ରାସ୍ତା ଅସୁରକ୍ଷିତ ହୋଇପଡ଼ିଛି। ଉକ୍ତ ସ୍ଥାନରେ ମେଳା ଏବଂ ପରିବା ମାର୍କେଟ ଯୋଗୁ ଲୋକମାନେ ରାସ୍ତା ଉପରେ ଗାଡ଼ି ରଖୁଥିବାରୁ ରାସ୍ତା ସଙ୍କୁଚିତ ହୋଇ ବାରମ୍ବାର ଦୁର୍ଘଟଣା ଘଟୁଛି।
