ଓ୍ବାଶିଂଟନ, ୧୪।୪ : ସୂର୍ଯ୍ୟଙ୍କଠାରୁ ବାହାରୁଥିବା ଏକ ଉତ୍ତାପ ତରଙ୍ଗ ଝଡ଼ ପ୍ରବଳ ବେଗରେ ପୃଥିବୀ ସହ ଧକ୍କା ହେବାର ଆଶଙ୍କା ରହିଛି। ଏହା ଯୋଗୁ ଜିପିଏସ ସିଷ୍ଟମ, ମୋବାଇଲ ନେଟୱାର୍କ ଏବଂ ସାଟେଲାଇଟ ଟିଭି ପ୍ରଭାବିତ ହେବ ବୋଲି କୁହାଯାଉଛି। ସୌରଝଡ଼ ଯୋଗୁ ପୃଥିବୀର ଉତ୍ତର ଏବଂ ଦକ୍ଷିଣ ମେରୁରେ ଆଲୋକର ପରିମାଣ ବଢ଼ିପାରେ। ଏହି ଝଡ ଦ୍ୱାରା ପୃଥିବୀର ଚୁମ୍ବକୀୟ କ୍ଷେତ୍ର ପ୍ରଭାବିତ ହୋଇପାରେ।
ଉତ୍ତର କିମ୍ବା ଦକ୍ଷିଣ ମେରୁ ନିକଟରେ ରାତିର ଆକାଶରେ ସୁନ୍ଦର ଆଲୋକ ଦୃଶ୍ୟମାନ ହେବ। ଆମେରିକାର ସ୍ପେସ ଏଜେନ୍ସି କହିଛି ଯେ ଗତ କିଛି ବର୍ଷ ମଧ୍ୟରେ ସୂର୍ଯ୍ୟରେ ବହୁତ କମ ପରିବର୍ତ୍ତନ ହେବାର ଲକ୍ଷ୍ୟ କରାଯାଇଛି। ମାତ୍ର ୨୦୨୫ ବେଳକୁ ବହୁ ପରିବର୍ତ୍ତନ ଆସିବାର ଆଶଙ୍କା ରହିଛି।
ଆମେରିକାର ସ୍ପେସ ଏଜେନ୍ସି ନାସା ଅନୁଯାୟୀ, ଏହି ସୌରଝଡ଼ ଘଣ୍ଟା ପ୍ରତି ୧.୬ ମିଲିୟନ କିଲୋମିଟର ବେଗରେ ପୃଥିବୀ ଆଡକୁ ମାଡ଼ି ଆସୁଛି। କିଛି ସମୟ ମଧ୍ୟରେ ଏହାର ବେଗ ଅଧିକ ତୀବ୍ର ହେବ। ଝଡ଼ ପୃଥିବୀର ଚୁମ୍ବକୀୟ କ୍ଷେତ୍ରକୁ ପ୍ରବେଶ କରିବା ମାତ୍ରେ ସାଟେଲାଇଟ୍ ସଙ୍କେତଗୁଡ଼ିକ ବ୍ୟାହତ ହେବ, ଯାହା ଜିପିଏସ, ଟିଭି, ମୋବାଇଲ ନେଟୱାର୍କର କାର୍ଯ୍ୟରେ ସମସ୍ୟା ସୃଷ୍ଟି କରିବାର ଆଶଙ୍କା ରହିଛି।
ଆମେରିକାର ସ୍ପେସ ଏଜେନ୍ସି ନାସା ଦ୍ୱାରା କରାଯାଇଥିବା ଏକ ଅଧ୍ୟୟନ ଅନୁଯାୟୀ ସୂର୍ଯ୍ୟ ପୃଷ୍ଠରେ ବିଭିନ୍ନ ରାସାୟନିକ ବିସ୍ଫୋରଣ ଘଟିଥାଏ। ସେଥିରୁ ଅତ୍ୟଧିକ ଉଜ୍ଜ୍ୱଳ ଆଲୋକ ସହିତ ବହୁ ପରିମାଣର ଶକ୍ତି ବାହାରି ଥାଏ। ଫଳରେ ଘଣ୍ଟା ପ୍ରତି ବହୁ ମିଲିୟନ ମାଇଲ ବେଗରେ ଏକ ବିଲିୟନ ଟନ ଚୁମ୍ବକୀୟ ଶକ୍ତି ମହାକାଶକୁ ବ୍ୟାପିଥାଏ। ଏହାକୁ ଜିଓମ୍ୟାଗ୍ନେଟିକ ଝଡ କୁହାଯାଏ ।
