ଭୁବନେଶ୍ୱର,୧୩।୧୦(ସୁନିତ୍ ମିଶ୍ର): ଗଣତନ୍ତ୍ରର ବିଶ୍ୱସନୀୟତା ମୁକ୍ତ ଓ ଅବାଧ ନିର୍ବାଚନ ସହ ପ୍ରତ୍ୟେକ ଯୋଗ୍ୟ ନାଗରିକଙ୍କ ମତଦାନ ଅଧିକାରର ସୁରକ୍ଷା ଉପରେ ନିର୍ଭରକରେ । ଏଥିପାଇଁ ସ୍ବଚ୍ଛ ଓ ନିର୍ଭୁଲ୍ ଭୋଟର ତାଲିକା ଅତ୍ୟନ୍ତ ଜରୁରୀ। ଭୋଟର ତାଲିକାରେ ଏକାଧିକ ଥର ନାମ ରହିବା, ପୁରୁଣା ତଥ୍ୟ ଅପ୍ଡେଟ୍ ନ ହେବା ଏବଂ ମୃତ ବ୍ୟକ୍ତିଙ୍କ ନାମ ତାଲିକାରୁ ନ ହଟିବା ଦ୍ୱାରା ଏହାର ନିର୍ଭୁଲତା ଓ ବିଶ୍ୱସନୀୟତା ପ୍ରଭାବିତ ହୋଇପାରେ। ତେଣୁ ଭୋଟର ତାଲିକାକୁ ନିର୍ଭରଯୋଗ୍ୟ ରଖିବା କେବଳ ଏକ ପ୍ରଶାସନିକ ଆବଶ୍ୟକତା ନୁହେଁ ବରଂ ନିର୍ବାଚନୀ ବ୍ୟବସ୍ଥାର ପବିତ୍ରତା ବଜାୟ ରଖିବା ଏବଂ ଗଣତନ୍ତ୍ର ପ୍ରତି ଜନସାଧାରଣଙ୍କ ଆସ୍ଥାକୁ ସୁଦୃଢ଼ କରିବାର ଏକ ଅତ୍ୟାବଶ୍ୟକ ପଦକ୍ଷେପ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି। ସ୍ବତନ୍ତ୍ର ସଘନ ସଂଶୋଧନ(ଏସ୍ଆଇଆର୍) ପ୍ରକ୍ରିୟାର ଗୁରୁତ୍ୱ ଉପରେ ଆଲୋକପାତକରି ମୁଖ୍ୟମନ୍ତ୍ରୀ କହିଛନ୍ତି, ଭୋଟର ତାଲିକାରେ ପ୍ରକୃତ ଯୋଗ୍ୟ ଭୋଟରଙ୍କ ନାମ ଯେପରି ଠିକ୍ ଭାବେ ପ୍ରତିଫଳିତ ହୁଏ ତାହା ସୁନିଶ୍ଚିତ କରିବାରେ ଏହି ପ୍ରକ୍ରିୟାର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଏହାଦ୍ୱାରା ଭୋଟର ତାଲିକାରେ ଥିବା ଅସଙ୍ଗତି ଚିହ୍ନଟ କରିବା, ଏକାଧିକ ସ୍ଥାନରେ ଥିବା ନାମକୁ ହଟାଇବା, ମୃତ୍ୟୁ କିମ୍ବା ବାସସ୍ଥାନ ପରିବର୍ତ୍ତନ ହେତୁ ତଥ୍ୟରେ ଆବଶ୍ୟକ ସଂଶୋଧନ କରିବା ଏବଂ ସମସ୍ତ ଯୋଗ୍ୟ ଭୋଟରଙ୍କ ନାମ ତାଲିକାରେ ସ୍ଥାନପାଇବା ସୁନିଶ୍ଚିତ ହୋଇପାରିବ। ତେବେ ଏହି ପ୍ରକ୍ରିୟାରେ ଯେପରି କୌଣସି ପ୍ରକୃତ ଓ ଯୋଗ୍ୟ ଭୋଟର ଅଯଥାରେ ତାଲିକାରୁ ବାଦ୍ ନ ପଡ଼ନ୍ତି, ସେଥିପ୍ରତି ମଧ୍ୟ ସମାନ ଭାବେ ଯତ୍ନବାନ୍ ହେବା ଆବଶ୍ୟକ। ନିର୍ବାଚନୀ ତାଲିକାରେ ସଂଶୋଧନ କରିବା ଯେତିକି ଜରୁରୀ, ପ୍ରତ୍ୟେକ ଯୋଗ୍ୟ ନାଗରିକଙ୍କ ମତଦାନ ଅଧିକାରର ସୁରକ୍ଷା କରିବା ମଧ୍ୟ ସେହି ଅନୁସାରେ ଗୁରୁତ୍ୱପୂର୍ଣ୍ଣ। ଏଗୁଡିକ କେବଳ ସାଧାରଣ ପ୍ରଶାସନିକ କାର୍ଯ୍ୟ ନୁହେଁ ବରଂ ନିର୍ବାଚନୀ ପ୍ରକ୍ରିୟାରେ ନିରପେକ୍ଷତା, ସମାନ ପ୍ରତିନିଧିତ୍ୱ ଓ ପ୍ରତ୍ୟେକ ଭୋଟର ମୂଲ୍ୟ ଓ ମତଦାନର ପବିତ୍ରତା ସହ ଜଡ଼ିତ ବିଷୟ। ଦେଶର ନିର୍ବାଚନୀ ବ୍ୟବସ୍ଥାରେ ସ୍ବଚ୍ଛତା ଓ ଅଖଣ୍ଡତା ବଜାୟ ରଖିବା ପାଇଁ ଏସ୍ଆଇଆର୍ ଏକ ଆବଶ୍ୟକ ତଥା ଗଠନମୂଳକ ପଦକ୍ଷେପ। ଏହି ପ୍ରକ୍ରିୟାକୁ ନିରପେକ୍ଷତା, ସତର୍କତା ଓ ଯଥାଯତ ଯତ୍ନର ସହ କାର୍ଯ୍ୟକାରୀ କରାଗଲେ ଭୋଟର ତାଲିକାର ବିଶ୍ୱସନୀୟତା ବଜାୟ ରହିବ। ଏହାସହ ନିର୍ବାଚନୀ ପ୍ରକ୍ରିୟା ଉପରେ ଜନସାଧାରଣଙ୍କ ଆସ୍ଥା ଓ ବିଶ୍ୱାସ ଆହୁରି ଦୃଢ଼ ହେବ। ଏକ ସୁଦୃଢ଼ ଗଣତନ୍ତ୍ର ପାଇଁ ନିର୍ଭୁଲ୍ ଭୋଟର ତାଲିକା ଏବଂ ପ୍ରତ୍ୟେକ ଯୋଗ୍ୟ ନାଗରିକଙ୍କ ମତଦାନ ଅଧିକାରର ସୁରକ୍ଷା ଅପରିହାର୍ଯ୍ୟ ବୋଲି ମୁଖ୍ୟମନ୍ତ୍ରୀ କହିଛନ୍ତି।
