ନୂଆଦିଲ୍ଲୀ: ଦେହଜୀବୀଙ୍କ କଥା ମନକୁ ଆସିଲେ ଆପାଣାଛାଏଁ ଏକ ଛବି ନଜରକୁ ଆସିଯାଏ। ଏମାନଙ୍କର ରୋଜଗାରର ମାଧ୍ୟମ ମଧ୍ୟ ଗୋଟିଏ ବୋଲି ଧରି ନିଆଯାଏ। ହେଲେ କରୋନା ମହାମାରୀ ଏମାନଙ୍କ ଜୀବନକୁ ବଦଳାଇ ଦେଇଛି। ଜଣାପଡିଛି କି ରାଜଧାନୀ ଦିଲ୍ଲୀର ଜେବି ରୋଡରେ ସବୁଠାରୁ ଅଧିକ ଦେହଜୀବୀ ରହୁଥିବା ବେଳେ କରୋନା ମହାମାରୀକୁ ନେଇ ଦେଶରେ ଯେତେବେଳେ ଲକ୍ଡାଉନ ଜାରି କରାଯାଇଥିଲା ସେମାନେ ବହୁ ଅସୁବିଧାର ସମ୍ମୁଖୀନ ହୋଇଥିଲେ। ଏଠାରେ ପ୍ରାୟ ୭୫୦ ଦେହଜୀବୀ ରହୁଥିବା ବେଳେ ଲକ୍ଡାଉନ ପରେ ପରେ କେତେଜଣ ନିଜ ନିଜ ଘରକୁ ଫେରି ଯାଇଥିବା ବେଳେ ଯେଉଁମାନେ ଏଠାରେ ରହିଯାଇଥିଲେ ସେମାନଙ୍କ ପାଇଁ ସମୟ କାଟିବା କାଠିକର ପାଠ ହୋଇଯାଇଥିଲା। ଏହାପରେ ସେମାନେ ବିଭିନ୍ନ ଏନ୍ଜିଓ ସହ ଯୋଗାଯୋଗ କରି ମାସ୍କ ତିଆରି କରିବା ଆରମ୍ଭ କରି ଦେଇଥିଲେ। ଏବେ ଏମାନଙ୍କ ମଧ୍ୟରୁ କେତେଜଣ ମାସ୍କ ତିଆରି ସମ୍ପୂର୍ଣ୍ଣ ରୂପେ ଶିଖି ଯାଇଥିବା ବେଳେ ନିଜ କୋଠିରେ ରହି ମାସ୍କ ତିଆରି କରିବାକୁ ଇଚ୍ଛା ପ୍ରକାଶ କରିଥିବା କୁହାଯାଏ। କରୋନା ମହାମାରୀ ଭୟରେ ଏମାନଙ୍କ ରୋଜଗାର ଏକ ପ୍ରକାର ଠପ୍ ହୋଇ ଯାଇଥିବାରୁ ଏବେ ଏମାନେ ରୋଜଗାରର ଭିନ୍ନ ପନ୍ଥା ବାଛି ନେଇଥିବା କୁହାଯାଉଛି। ଏବେ ମାସ୍କ, ସାନିଟାଇଜର ଆଦିର ବହୁଳ ବ୍ୟବହାର ହେଉଥିବାରୁ ଏହା ପ୍ରସ୍ତୁତ କରି ବିକ୍ରି କରିବାକୁ ଚେଷ୍ଟା କରୁଛନ୍ତି ଏମାନେ।
