ଅହମ୍ମଦାବାଦ,୫।୩ : ରିଷଭ ପନ୍ତ ଓ ଓ୍ବାଶିଂଟନ ସୁନ୍ଦରଙ୍କ ଭାଗୀଦାରିତା ଭାରତ ପାଇଁ ମୂଲ୍ୟବାନ ସାବ୍ୟସ୍ତ ହୋଇଛି। ଇଂଲଣ୍ଡ ବିପକ୍ଷରେ ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଚାଲିଥିବା ଅନ୍ତିମ ତଥା ଚତୁର୍ଥ ଟେଷ୍ଟ ଟିମ୍ ଇଣ୍ଡିଆର ନିୟନ୍ତ୍ରଣରେ ରହିଛି। ପ୍ରଥମ ଇନିଂସରେ ଇଂଲଣ୍ଡ ୨୦୫ ରନ୍ କରିଥିବାବେଳେ ଭାରତ ଅସମାପ୍ତ ଇନିଂସ ବ୍ୟାଟିଂ ଆରମ୍ଭ କରି ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଏପରି କି ୧୪୬ ରନ୍ରେ ପ୍ରମୁଖ ୬ ବ୍ୟାଟ୍ସମ୍ୟାନଙ୍କୁ ହରାଇ ସଙ୍କଟରେ ପଡ଼ିଥିଲା ଟିମ୍ ଇଣ୍ଡିଆ। ଏହାପରେ ପନ୍ତ ଓ ସୁନ୍ଦର ୭ମ ଉଇକେଟ ପାଇଁ ୧୧୩ ରନ୍ ଯୋଡ଼ିବା ସହ ଦଳକୁ ଆଣି ଦେଇଥିଲେ ଗୁରୁତ୍ୱପୂର୍ଣ୍ଣ ଅଗ୍ରଣୀ। ପୂରା ଇନିଂସରେ ବିସ୍ଫୋରକ ବ୍ୟାଟିଂ କରିଥିବା ପନ୍ତ ଛକା ମାରି ପୂରଣ କରିଥିଲେ କ୍ୟାରିୟରର ୩ୟ ଶତକ। ତାଙ୍କ ୧୦୧ ରନ୍ର ଇନିଂସରେ ସାମିଲ ଥିଲା ୧୩ ଚୌକା ଓ ୨ ଛକା।
ସେ ଆଉଟ୍ ହେବା ପରେ ସୁନ୍ଦର ଓ ଅକ୍ଷର ପଟେଲ ଭ୍ରମଣକାରୀ ବୋଲରଙ୍କୁ ଆଉ ଉଇକେଟ ନେବାକୁ ଦେଇ ନ ଥିଲେ ସୁଯୋଗ। ଫଳରେ ଦ୍ୱିତୀୟ ଦିନ ଷ୍ଟମ୍ପ ଅସପାରଣ ସୁଦ୍ଧା ଟିମ୍ ଇଣ୍ଡିଆ ୭ ଉଇକେଟ ହରାଇ ୨୯୪ ରନ୍ କରିଛି। ଭାରତ ପାଖରେ ଆଉ ୩ ଉଇକେଟ ଥିବାବେଳେ ୮୯ ରନ୍ର ଅଗ୍ରଣୀ ହାସଲ କରିଛି। ସୁନ୍ଦର ୬୦ (୮ ଚୌକା) ଓ ଅକ୍ଷର ୧୧ ରନ୍ କରି ଅପରାଜିତ ଅଛନ୍ତି। ଇଂଲଣ୍ଡ ପକ୍ଷରୁ ଜେମ୍ସ ଆଣ୍ଡରସନ ୩ ଉଇକେଟ ନେଇଥିବାବେଳେ ବେନ ଷ୍ଟୋକ୍ସ ଓ ଜ୍ୟାକ ଲିଚ୍ ୨ ଲେଖାଏ ଉଇକେଟ ହାତେଇଛନ୍ତି।
