ନୂଆଦିଲ୍ଲୀ,୨୭।୯: ୨୮ ସେପ୍ଟେମ୍ବରରୁ ୩୦ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ ୩ ଦିନ ପାଇଁ ଦେଶବ୍ୟାପୀ ବ୍ୟାଙ୍କ ହଡ଼ତାଳ ହେବାକୁ ଯାଉଛି। ୟୁନାଇଟେଡ ଫୋରମ ଅଫ ବ୍ୟାଙ୍କ ୟୁନିୟନ୍ସ ଏହି ହଡ଼ତାଳ ଡାକରା ଦେଇଛି। ଏପରି ସ୍ଥିତିରେ ଦେଶର ଲକ୍ଷ ଲକ୍ଷ ଗ୍ରାହକଙ୍କ ମନରେ ପ୍ରଶ୍ନ ଉଠୁଛିଏହି ୩ ଦିନ କେବଳ ବ୍ୟାଙ୍କ ଶାଖା ବନ୍ଦ ରହିବ ନା ତା’ ସହିତ UPI, ATM ଏବଂ ଇଣ୍ଟରନେଟ ବ୍ୟାଙ୍କିଂ ମଧ୍ୟ ପ୍ରଭାବିତ ହେବ?
ଯଦି ଆପଣ ମଧ୍ୟ ଏହି ପ୍ରଶ୍ନକୁ ନେଇ ଚିନ୍ତିତ, ତେବେ ଏହାର ଉତ୍ତର ଏଠାରୁ ଜାଣିପାରିବେ। ବ୍ୟାଙ୍କ ହଡ଼ତାଳର ପ୍ରଭାବ ମୁଖ୍ୟତଃ ଶାଖାରେ ହେଉଥିବା କାର୍ଯ୍ୟ ଉପରେ ପଡ଼ିବାର ସମ୍ଭାବନା ରହିଛି। UPI, ଇଣ୍ଟରନେଟ ବ୍ୟାଙ୍କିଂ, ମୋବାଇଲ ବ୍ୟାଙ୍କିଂ ଏବଂ ATM ଭଳି ସେବା ସାଧାରଣତଃ ଚାଲୁ ରହିବାର ଆଶା କରାଯାଉଛି।
ବ୍ୟାଙ୍କ ୟୁନିୟନଗୁଡ଼ିକର ହଡ଼ତାଳ ୨୮, ୨୯ ଏବଂ ୩୦ ସେପ୍ଟେମ୍ବରରେ ହେବ। ଏହି ସମୟରେ ସରକାରୀ କ୍ଷେତ୍ରର ବ୍ୟାଙ୍କ ଏବଂ ଗ୍ରାମୀଣ ବ୍ୟାଙ୍କଗୁଡ଼ିକ ବନ୍ଦ ରହିବ। ଅର୍ଥାତ୍ ଯଦି ଆପଣଙ୍କୁ ବ୍ୟାଙ୍କ ଶାଖାକୁ ଯାଇ କୌଣସି ଜରୁରୀ କାମ କରାଇବାକୁ ଅଛି, ତେବେ ସମସ୍ୟା ହୋଇପାରେ।
ନା, ବ୍ୟାଙ୍କ ହଡ଼ତାଳ ଅର୍ଥ UPI ସେବା ବନ୍ଦ ହେବା ନୁହେଁ। UPI, ମୋବାଇଲ ବ୍ୟାଙ୍କିଂ ଏବଂ ଇଣ୍ଟରନେଟ ବ୍ୟାଙ୍କିଂ ଭଳି ଡିଜିଟାଲ ସେବା ଚାଲୁ ରହିବାର ଆଶା ରହିଛି। ଅର୍ଥାତ୍ ଆପଣ ସାଧାରଣ ଭାବେ UPI ମାଧ୍ୟମରେ ଟଙ୍କା ପଠାଇବା, QR କୋଡ ସ୍କାନ କରି ପେମେଣ୍ଟ କରିବା ଏବଂ ଅନଲାଇନ ବିଲ ପୈଠ କରିବା ଭଳି କାମ କରିପାରିବେ। ତେବେ କୌଣସି ଡିଜିଟାଲ ସେବାରେ ବୈଷୟିକ ତ୍ରୁଟି କିମ୍ବା ସର୍ଭର ସମସ୍ୟା ଦେଖାଦେଲେ ତାହା ଅଲଗା କଥା। ତେଣୁ ଅତ୍ୟନ୍ତ ଜରୁରୀ ପେମେଣ୍ଟ ଥିଲେ ଶେଷ ସମୟ ପର୍ଯ୍ୟନ୍ତ ଅପେକ୍ଷା ନକରିବା ଭଲ।
ହଡ଼ତାଳ ସମୟରେ ATM ସେବା ମଧ୍ୟ ଚାଲୁ ରହିବାର ଆଶା ରହିଛି। ଅନେକ ବ୍ୟାଙ୍କ ହଡ଼ତାଳ ସମୟରେ ଗ୍ରାହକଙ୍କୁ ATM ଏବଂ ଅନ୍ୟ ସେଲ୍ଫ-ସର୍ଭିସ ସୁବିଧା ବ୍ୟବହାର କରିବାକୁ ପରାମର୍ଶ ଦେଇଛନ୍ତି। ହେଲେ କୌଣସି ନିର୍ଦ୍ଦିଷ୍ଟ ATMରେ ଟଙ୍କା ଶେଷ ହୋଇଯିବା କିମ୍ବା ବୈଷୟିକ ତ୍ରୁଟି ଦେଖାଦେଲେ ସମସ୍ୟା ହୋଇପାରେ। ତେଣୁ ଆପଣଙ୍କୁ ନଗଦ ଟଙ୍କାର ଆବଶ୍ୟକତା ଥିଲେ ଆଗୁଆ କିଛି ଟଙ୍କା ଉଠାଇ ରଖିବା ଭଲ।
