ବଇଣ୍ଡା,୯ା୭(ଡି.ଏନ.ଏ.) ଚାଷ ଜମିକୁ ମାଡ଼ିବ ପାହାଡ଼ ପାଣି। ବର୍ଷସାରା ଫସଲ ଫଳାଇବେ ଚାଷୀ। ଏହି ଉଦ୍ଦେଶ୍ୟ ନେଇ ଅନୁଗୋଳ ଜିଲା କିଶୋରନଗର ବ୍ଲକ ଜୟଗଡଠାରେ ପାହାଡରୁ ବହି ଆସିଥିବା ଜୟଗଡ ନାଳକୁ ବାନ୍ଧି ଏକ ପ୍ରୋଜେକ୍ଟ ନିର୍ମାଣ କରାଯାଇଥିଲା। କେନାଲ ମାଧ୍ୟମରେ ଏହି ପାହାଡ଼ି ପାଣିକୁ ୨ଟି ପଞ୍ଚାୟତର ଶତାଧିକ ଚାଷୀଙ୍କ ଜମି ନିକଟରେ ପହଞ୍ଚାଯିବାର ବ୍ୟବସ୍ଥା ହୋଇଥିଲା। ହେଲେ ଆବଶ୍ୟକ ରକ୍ଷଣାବେକ୍ଷଣ ଅଭାବ ଓ କଂକ୍ରିଟ ଓ୍ବାଲ ନିର୍ମାଣ କରା ନ ଯିବାରୁ ମାଟି ପଶି କେନାଲଗୁଡ଼ିକ ପୋତି ହୋଇପଡ଼ୁଛି। ଫଳରେ ଜମି ନିକଟରେ ପାଣି ପହଞ୍ଚିପାରୁ ନ ଥିବାରୁ ଚାଷ କାର୍ଯ୍ୟ ବାଧାପ୍ରାପ୍ତ ହେଉଛି। ବାରମ୍ବାର ଅଭିଯୋଗ ସତ୍ତ୍ୱେ କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ପଦକ୍ଷେପ ନିଆଯାଉ ନାହିଁ। ଏ ନେଇ ୧୦ ଗ୍ରାମର ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
କିଶୋରନଗର ବ୍ଲକ ନାକିଚି ପଞ୍ଚାୟତରେ ୧୯୮୩ ମସିହାରେ ସରକାରଙ୍କ ପକ୍ଷରୁ ଏହି ପ୍ରୋଜେକ୍ଟ ନିର୍ମାଣ କରାଯାଇଥିଲା। ୧୯୮୫ ମସିହାରେ କେନାଲ ନିର୍ମାଣ ପରେ ଠେଲକନାଳି ପଞ୍ଚାୟତର ବୁଦୁଲିମୁଣ୍ଡା, କନ୍ଧରାମୁଣ୍ଡା ଓ ନାକିଚି ପଞ୍ଚାୟତର ମଣ୍ଡାମ, ନୂଆଁଭୂଇଁ, ରାଣୀଭୂଇଁ, ବଡ ଡଙ୍ଗିଆଣୀ, କଣ୍ଡାଳ, ଖୋଲ ଡଙ୍ଗିଆଣୀ, ମଧପୁର ଆଦି ଗ୍ରାମର ଚାଷ ଜମି ଜଳସେଚିତ ହୋଇପାରିଥିଲା। ନିର୍ମାଣ ହୋଇଥିବା କେନାଲଗୁଡ଼ିକର ଓ୍ବାଲ ମଧ୍ୟରୁ ୪୦ ପ୍ରତିଶତ କଂକ୍ରିଟ ଓ ୬୦ ପ୍ରତିଶତ ମାଟି ରହିଥିଲା। କିନ୍ତୁ ଉପଯୁକ୍ତ ଯତ୍ନ ଅଭାବରୁ କେନାଲଗୁଡ଼ିକରେ ମାଟି ପଶି ପ୍ରାୟ ୫୦ ପ୍ରତିଶତ ପୋତି ହୋଇଗଲାଣି। ଫଳରେ ପାଣି ଆସୁ ନ ଥିବାରୁ ଜମିଗୁଡ଼ିକରେ ଖରାଟିଆ ଧାନ ଚାଷ ହେଇପାରୁନାହିଁ। ବିଶେଷକରି କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥ ପାର୍ଶ୍ୱ ରାଣୀଭୂଇଁ ଦେଇ କଣ୍ଡାଳ ଗ୍ରାମ ଅଭିମୁଖେ ଯାଇଥିବା କେନାଲ ଅଧିକ ପୋତି ହୋଇଯାଇଛି। ଏଥିଯୋଗୁ ଚାଷ ଜମି ନିକଟରେ ପାଣି ପହଞ୍ଚିବାରେ ସମସ୍ୟା ହେଉଛି। ସମସ୍ତ କେନାଲ ବନ୍ଧକୁ କଂକ୍ରିଟ କରାଯିବା ସହ ପୋତି ହୋଇପଡ଼ିଥିବା କେନାଲର ପୁନରୁଦ୍ଧାର ପାଇଁ କଣ୍ଡାଳ ଗ୍ରାମବାସୀ ୧୦ ମେ ୨୦୧୯, ୧୨ ଜୁନ ୨୦୨୦, ୮ ଫେବୃୟାରୀ ୨୦୨୨ରେ କ୍ଷୁଦ୍ର ଜଳ ସେଚନ ବିଭାଗ ଓ ଜିଲା ପ୍ରଶାସନ ନିକଟରେ ଅଭିଯୋଗ କରିଥିଲେ। କିନ୍ତୁ ଏ ଦିଗରେ ଆବଶ୍ୟକ ପଦକ୍ଷେପ ନିଆଯାଇ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। କ୍ଷୁଦ୍ର ଜଳସେଚନ ବିଭାଗ କନିଷ୍ଠଯନ୍ତ୍ରୀ ତ୍ରିପୁରାରୀ ନାୟକ କହିଛନ୍ତି, କେନାଲ ପାର୍ଶ୍ୱରେ ଠିକାସଂସ୍ଥା ପକ୍ଷରୁ ୱାଲ ନିର୍ମାଣ କରାଯାଇ ନ ଥିବା ଯୋଗୁ ଜାତୀୟ ରାଜପଥ ସମ୍ପ୍ରସାରଣ ବେଳେ ମାଟି ପଡି ପୋତି ହୋଇଯାଇଛି। ଏଥିସହ ଅନ୍ୟ କେନାଲର ପୁନରୁଦ୍ଧାର ପାଇଁ ପଦକ୍ଷେପ ନିଆଯିବ।
