ଥୁଆମୂଳ ରାମପୁର,୨୧ା୧୧(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ କାଠକୁରା ଗ୍ରାମର ବୃଦ୍ଧ ଲାଚଣ ପରାଭୋଇ ଆଖି ଅପରେଶନ ପାଇଁ ରାୟପୁର ଯାଉଥିବା ବେଳେ ଟ୍ରେନ୍ରୁ ନିଖୋଜ ହୋଇଯାଇଛନ୍ତି। ଗତ ମଙ୍ଗଳବାର ନିକେଶଯୋର ଗ୍ରାମର ସତ୍ୟ ନାଏକ ଘର ଲୋକଙ୍କୁ ନ ଜଣାଇ ତାଙ୍କୁ ଜୁନାଗଡ଼ ଷ୍ଟେଶନରୁ ଟ୍ରେନ୍ ଯୋଗେ ରାୟପୁର ନେଉଥିଲେ। ତେବେ ମୁରିବାହାଲ ଷ୍ଟେଶନ ଅଞ୍ଚଳରେ ଲାଚଣ କେଉଁଆଡ଼େ ଓହ୍ଲାଇ ପଡ଼ି ନିଖୋଜ ହୋଇଯାଇଥିବା ସତ୍ୟ ନାଏକ ଫୋନ୍ ଯୋଗେ ବୃଦ୍ଧଙ୍କ ଝିଅ ଚାଉଳ ପରାଭୋଇଙ୍କୁ ଜଣାଇଥିଲେ।
ଘଟଣାକୁ ୫ ଦିନ ବିତିଯାଇଥିଲେ ମଧ୍ୟ ଲାଚଣଙ୍କର କୌଣସି ସନ୍ଧାନ ମିଳିପାରି ନାହିଁ। ଏନେଇ ୧୯ ତାରିଖରେ ଥୁଆମୂଳ ରାମପୁର ଥାନାରେ ଅଭିଯୋଗ ହୋଇଥିଲେ ହେଁ ପୋଲିସର ତଦନ୍ତ ପ୍ରକ୍ରିୟାକୁ ନେଇ ପରିବାର ଓ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି। ବୃଦ୍ଧଙ୍କୁ ତୁରନ୍ତ ସୁରକ୍ଷିତ ଭାବେ ଉଦ୍ଧାର କରିବାକୁ ପରିବାର ପକ୍ଷରୁ ଦାବି କରାଯାଇଛି।

