ମହାକାଳପଡ଼ା,୨୧ା୧୧(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ବାତ୍ୟା ଅକ୍ୱାନ ପ୍ରଭାବରେ ପ୍ରଶାସନ ପକ୍ଷରୁ ଆଶ୍ରୟସ୍ଥଳୀରେ ବିପନ୍ନମାନଙ୍କୁ ଥଇଥାନ କରାଯାଇଛି। ଏ ନେଇ ପେଟଛେଲା ପଞ୍ଚାୟତ ସ୍ଥାନୀୟ ଜଙ୍ଗଲ ଘେରି ଜନଜାତି ବିପନ୍ନମାନଙ୍କୁ ଦୁଇ କିମି ଦୂର ରାମଚଣ୍ଡୀ ମନ୍ଦିର କମ୍ୟୁନିଟି ସେଣ୍ଟରରେ ଅଢ଼େଇ ଶହରୁ ଅଧିକ ଥଇଥାନ କରାଯାଇଛି। ବାତ୍ୟା ବେଳେ ଏମାନଙ୍କୁ ବିଧାୟକ ଡ. ଦୁର୍ଗା ପ୍ରସନ୍ନ ନାୟକ ଭେଟି ଦୁଃଖସୁଖ ବୁଝିଥିଲେ। ପରେ ପୂର୍ବତନ ବାଚସ୍ପତି ପ୍ରଦୀପ ଅମାତ ଓ ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଏହି ଜନଜାତିମାନଙ୍କୁ ଭେଟିଥିଲେ। ତିନିଦିନ ହେବ ଆଶ୍ରୟ ନେଇଥିବା ଜନଜାତି ବିପନ୍ନମାନଙ୍କୁ ଜିଲାପାଳ ରଘୁନାଥ ଆର୍ ଆୟାର ରାମଚଣ୍ଡୀ କମ୍ୟୁନିଟି ସେଣ୍ଟରରେ ଭେଟି ସମସ୍ୟା ସମ୍ପର୍କରେ ଆଲୋଚନା କରିଥିଲେ।

ଆବାସ ଗୃହ ନାହିଁ, ଏକ କମ୍ୟୁନିଟି ସେଣ୍ଟର ନାହିଁ, ଅଙ୍ଗନଓ୍ବାଡ଼ି କେନ୍ଦ୍ର ନାହିଁ, ଜମି ନାହିଁ , ରୋଜଗାର ନାହିଁ ଆମେ କିପରି ବଞ୍ଚିବୁ ବୋଲି ଜନଜାତିମାନେ ଜିଲାପାଳଙ୍କୁ ପ୍ରଶ୍ନ କରି ଏକ ଅଭିଯୋଗପତ୍ର ପ୍ରଦାନ କରିଥିଲେ। ଜନଜାତି ମହିଳାମାନଙ୍କଠାରୁ ଜିଲାପାଳ ଅଭିଯୋଗ ପତ୍ର ପାଇ କିପରି ସମସ୍ୟା ସମାଧାନ ହେବ ବିଡିଓଙ୍କ ସହିତ ଆଲୋଚନା କରିଥିଲେ। ଆଶ୍ରୟସ୍ଥଳୀରେ ଜନଜାତିମାନଙ୍କ ପରସା ଯାଉଥିବା ଭୋଜନ ଦେଖିଥିଲେ।

ଜିଲାପାଳଙ୍କ ସହିତ ବିଡିଓ ମନୋଜ କୁମାର ନାୟକ, ବ୍ଲକ ଜରୁରୀକାଳିନ ଅଧିକାରୀ ଦୀପକ କୁମାର ପରିଡ଼ା , କନିଷ୍ଠ ଯନ୍ତ୍ରୀ ଅଭିଷେକ ବିଶୋଇ , ରାଜସ୍ବ ନିରୀକ୍ଷକ ବିଜୟ କୁମାର ବେହେରା , ସରପଞ୍ଚ ପ୍ରସନ୍ନ ବେହେରା , ରାମନଗର ସରପଞ୍ଚ ମିଲନ ଦେବନାଥ, ନିର୍ବାହୀ ଅଧିକାରୀ ହୃଷୀକେଶ ସେଠୀ, ବିଜୟ କୁମାର ସେଠୀ , ରମେଶ ଭକ୍ତା, ଲକ୍ଷ୍ମୀକାନ୍ତ ସ୍ବାଇଁଙ୍କ ସମେତ ଦୁଇ ଶହରୁ ଅଧିକ ଜନଜାତି ଲୋକମାନେ ଉପସ୍ଥିତ ଥିଲେ। ପରେ ମା’ ରାମଚଣ୍ଡୀଙ୍କ ଦର୍ଶନ କରି ଆଶିଷ ଭିକ୍ଷା କରିଥିଲେ ଜିଲାପାଳ। ପରେ ଏହି ଜନଜାତି ସମସ୍ତ ପରିବାରକୁ ପଲିଥିନ ବଣ୍ଟନ କରାଯାଇଥିଲା। ଏହି ଜଙ୍ଗଲ ଘେରିରେ ୪୦ରୁ ଅଧିକ ପରିବାର ବସବାସ କରନ୍ତି। ଏହା ପୂର୍ବରୁ ଜିଲାପାଳ ଏହି ବ୍ଲକ ଅଞ୍ଚଳର ଚାଷୀଙ୍କ ପନିପରିବା ଫସଲ ନଷ୍ଟ , ଉଦ୍ୟାନ କୃଷି , ମାଛ ଚାଷୀ ଓ କୁକୁଡ଼ା ଫାର୍ମ ପରିଦର୍ଶନ କରିଥିଲେ।

