ନୂଆଦିଲ୍ଲୀ,୨୨।୧୧ : ପାକିସ୍ତାନ ଦଖଲ କରିଥିବା କଶ୍ମୀରକୁ ମୁକ୍ତ କରିବାକୁ ଭାରତୀୟ ସେନା ପ୍ରସ୍ତୁତ ରହିଛନ୍ତି। ତେବେ ସେମାନେ ଏଥିପାଇଁ ସରକାରଙ୍କ ନିର୍ଦ୍ଦେଶକୁ ଅପେକ୍ଷା କରିଛନ୍ତିି। ମଙ୍ଗଳବାର କମାଣ୍ଡର ଲ୍ୟୁଟନାଟ ଜେନେରାଲ ଉପେନ୍ଦ୍ର ଦ୍ୱିବେଦୀ ଏହି ମନ୍ତବ୍ୟ ଦେଇଛନ୍ତି। ନିକଟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ତାଙ୍କର ଏକ ବିବୃତ୍ତିରେ ପାକିସ୍ତାନ ଅଧିକୃତ କଶ୍ମୀର(ପିଓକେ)କୁ ଫେରାଇ ଆଣିବା ବିଷୟରେ କହିଥିଲେ।
ପ୍ରତିରକ୍ଷା ମନ୍ତ୍ରୀଙ୍କ ବିବୃତ୍ତି ଉପରେ ଏକ ପ୍ରଶ୍ନର ଉତ୍ତରରେ ଉତ୍ତର ସେନା କମାଣ୍ଡର ଲେଫ୍ଟ ଜେନେରାଲ ଉପେନ୍ଦ୍ର କହିଛନ୍ତି ଯେ ସେନା ଏନେଇ ସରକାରଙ୍କ ଆଦେଶକୁ ଅପେକ୍ଷା କରିଛି। ଭାରତୀୟ ସେନା ସରକାର ଦେଇଥିବା କୌଣସି ଆଦେଶ ପାଳନ କରିବେ। ଯେତେବେଳେ ବି ଏପରି ନିର୍ଦ୍ଦେଶ ଦିଆଯିବ, ଆମେ ସବୁବେଳେ ପ୍ରସ୍ତୁତ ରହିଛୁ।
ସେ ଏହା ମଧ୍ୟ କହିଛନ୍ତି ଯେ ଧାରା ୩୭୦ ଉଚ୍ଛେଦ ହେବା ପରେ ଜମ୍ମୁ-କଶ୍ମୀରରେ ଅନେକ ପରିବର୍ତ୍ତନ ହୋଇଛି। ରାଜ୍ୟରେ ଆତଙ୍କବାଦ ଉପରେ କଟକଣା ଜାରି କରାଯାଇଛି। ପାକିସ୍ତାନ ଅଧିକୃତ କଶ୍ମୀର ଉପରେ କୌଣସି ବଡ଼ ବିବୃତ୍ତି ନ ଦେଇ ସେ କହିଛନ୍ତି, ପିଓକେ ଉପରେ ପ୍ରସ୍ତାବ ସଂସଦରେ ପାରିତ ହୋଇସାରିଛି। ଏଥିରେ କିଛି ନୂଆ କଥା ନାହିଁ।
