ନୂଆଦିଲ୍ଲୀ,୭।୧୦: ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ବିରୋଧୀ ଦଳଗୁଡ଼ିକର ଆନ୍ଦୋଳନ ଥମିବାର ନାଁ ନେଉନାହିଁ । ମଙ୍ଗଳବାର ଦିନତମାମ ଧାରଣା ପରେ ଆଜି ‘ଇଣ୍ଡିଆ’ ମେଣ୍ଟର ଏମପିମାନେ ଦିଲ୍ଲୀରେ ଏକାଠି ହୋଇଥିଲେ। ମଲ୍ଲିକାର୍ଜୁନ ଖାର୍ଗେ, ବିରୋଧୀ ଦଳ ନେତା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସମେତ ବିଭିନ୍ନ ଦଳର ଏମପି ଦିଲ୍ଲୀର ସାଗର ରତ୍ନା ରେଷ୍ଟୁରାଣ୍ଟରେ ଲଞ୍ଚ କରିଥିଲେ ।
ଲଞ୍ଚ ପରେ ରାହୁଲ ଗାନ୍ଧୀ ଜନ୍ତର-ମନ୍ତରରେ ଧାରଣା ଦେବାକୁ ଘୋଷଣା କରିଥିଲେ । ଏହାପରେ ସମସ୍ତ ବିରୋଧୀ ଏମପି ବସ୍ରେ ଜନ୍ତର-ମନ୍ତର ଅଭିମୁଖେ ବାହାରିଥିଲେ । ତେବେ ପୋଲିସ ରାହୁଲ ଗାନ୍ଧୀଙ୍କ ସମେତ ବିରୋଧୀ ଏମପିମାନଙ୍କୁ ଜନ୍ତର-ମନ୍ତର ଯିବାକୁ ଅନୁମତି ଦେଇନଥିଲା। ରାସ୍ତା ବ୍ଲକ୍ କରାଯିବାରୁ ବିରୋଧୀ ନେତାମାନେ ରାସ୍ତା ଉପରେ ହିଁ ଧାରଣାରେ ବସିଥିଲେ। ଏହି ସମୟରେ ପ୍ରିୟଙ୍କା ଗାନ୍ଧୀ ରାସ୍ତା ଉପରେ ଶୋଇପଡ଼ି କହିଥିଲେ ଯେ, ସେ ଏଠାରୁ ହଟିବେ ନାହିଁ । ପରେ ଦିଲ୍ଲୀ ପୋଲିସ ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀଙ୍କୁ ହେପାଜତକୁ ନେଇଥିଲା। ରାହୁଲଙ୍କୁ ପୋଲିସ ଜୋରଜବରଦସ୍ତ ବସ୍ରେ ବସାଇଥିବା ଅଭିଯୋଗ ହୋଇଛି।
ରାହୁଲ ଗାନ୍ଧୀ ପୁଣିଥରେ ଜ୍ଞାନେଶ କୁମାରଙ୍କ ଇସ୍ତଫା ଦାବି ଦୋହରାଇଥିଲେ । ସେ କହିଥିଲେ, ମଙ୍ଗଳବାର ସେମାନେ ନିର୍ବାଚନ କମିଶନଙ୍କ ସହ ଦେଖା କରିବାକୁ ଚାହୁଁଥିଲେ, କିନ୍ତୁ ସେମାନଙ୍କୁ ଭେଟିବାକୁ ଦିଆଯାଇନଥିଲା। ଦିଲ୍ଲୀ ପୋଲିସ ସେମାନଙ୍କୁ ଅଟକାଇଥିବା ରାହୁଲ କହିଥିଲେ। ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଅମିତ ଶାହା ଓ ଆରଏସ୍ଏସ୍ ମୁଖ୍ୟ ମୋହନ ଭାଗବତଙ୍କୁ ମଧ୍ୟ ଟାର୍ଗେଟ କରିଥିଲେ । ଗଣତନ୍ତ୍ରକୁ ଦୁର୍ବଳ କରିବାକୁ ଉଦ୍ୟମ ହେଉଥିବା ସେ ଅଭିଯୋଗ କରିଥିଲେ । ଏଥିସହ ସେ କହିଥିଲେ ଯେ, ଜ୍ଞାନେଶ କୁମାରଙ୍କୁ ଇସ୍ତଫା ଦେବାକୁ ପଡ଼ିବ।
