ଭବାନୀପାଟଣା,୪ା୧(ଉତ୍ତମ କୁମାର ଦାଶ):କଳାହାଣ୍ଡି ଜିଲା ଭବାନୀପାଟଣା ସହରରେ ପୁଣି ମାଙ୍କଡ଼ ଆତଙ୍କ ଦେଖିବାକୁ ମିଳିଛି। ଗୁରୁବାର ସହରର ଗୋଦାମପଡ଼ାରେ ଗୋଟିଏ ମାଙ୍କଡ଼ ପ୍ରାୟ ୧୫ ଜଣଙ୍କୁ ଆକ୍ରମଣ କରିଥିଲା। ଏଥିରେ ସମସ୍ତ ଆହତଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଏହା ପରେ ବନବିଭାଗର ଆର୍ଆର୍ଟି (ରାପିଡ୍ ରେଶପନ୍ସ ଟିମ୍) ଅପରେଶନ ଆରମ୍ଭ କରି ଦୀର୍ଘ ୮ ଘଣ୍ଟା ପରେ ମାଙ୍କଡ଼କୁ ଟ୍ରାଙ୍କୁଲାଇଜ କରି ଧରିବାରେ ସଫଳ ହୋଇଥିଲା। ମାଙ୍କଡ଼କୁ ନିକଟସ୍ଥ ଡ଼ଙ୍ଗରିରେ ଛଡା ଯାଇଥିଲା। ହେଲେ ଏହି ମାଙ୍କଡ଼ ଶୁକ୍ରବାର ସକାଳେ ପୁଣି ସହରକୁ ଆସି ଆତଙ୍କ ମଚାଇଛି। ସହରର ଧୋବାପଡ଼ା, ଚଞ୍ଚରାପଡ଼ା, ଆହାର କେନ୍ଦ୍ର, ଗାନ୍ଧୀ ଛକ, ଷ୍ଟେଚ୍ୟୁ ପଡ଼ାରେ ପ୍ରାୟ ୧୫ ଜଣଙ୍କୁ ଆକ୍ରମଣ କରିଥିବା ଏହି ମାଙ୍କଡ଼କୁ କାବୁ କରିବାରେ ଫେଲ ମାରିଛି ବନ ବିଭାଗ। ଖବର ପାଇ ଘଟଣା ସ୍ଥଳରେ ବନ ବିଭାଗର ଆର୍ଆର୍ଟି ଟିମ୍ ପହଞ୍ଚତ୍ଥିଲେ ମଧ୍ୟ ମାଙ୍କଡକୁ ଟ୍ରାଙ୍କୁଲାଇଜ କରିବାରେ ବିଫଳ ହୋଇଛି। ଫଳରେ ସହରରେ ଏବେ ଭୟର ବାତାବରଣ ଦେଖିବାକୁ ମିଳିଛି। ଏ ନେଇ ଭବାନୀପାଟଣା ବାସିନ୍ଦା ଆଶ୍ୱିନ ଚନ୍ଦନ କହିଛନ୍ତି ଯେ, ଗତକାଲି ସହରର ଗୋଦାମପଡ଼ାରେ ମାଙ୍କଡ ଲୋକଙ୍କୁ ଆକ୍ରମଣ କରିଥିଲା। ବନ ବିଭାଗ ମାଙ୍କଡକୁ ଧରିଥିଲେ ମଧ୍ୟ ଦୂରରେ ଛାଡ଼ିବା ପରିବର୍ତ୍ତେ ସହର ନିକଟରେ ଛାଡି ଦେବା ଫଳର ଆଜି ମାଙ୍କଡ ସହରକୁ ଆସି ଲୋକଙ୍କୁ ଆକ୍ରମଣ କରିଛି। ଏଥିଯୋଗୁ ଲୋକେ ଭୟଭୀତ ଅବସ୍ଥାରେ ରହିଛନ୍ତି। ଜଙ୍ଗଲ କ୍ଷୟ ହେବା କାରଣରୁ ମାଙ୍କଡମାନେ ସହରକୁ ଖାଦ୍ୟ ପାଇଁ ଆସୁଛନ୍ତି। ଆଉ ସହରରେ ଲୋକେ ଖାଦ୍ୟ ଦେବା କାରଣରୁ ସେମାନେ ସହର ଛାଡ଼ି ଯାଉ ନାହାନ୍ତି ବୋଲି ସେ ପ୍ରକାଶ କରିଛନ୍ତି। ୨ ଦିନରେ ମାଙ୍କଡ଼ ଆକ୍ରମଣରେ ୩୦ରୁ ଊଦ୍ଧର୍ବ ଲୋକ ଆହତ ହୋଇଥିବା ଜଣାପଡିଛି। ଖବର ଲେଖାହେବା ପର୍ଯ୍ୟନ୍ତ ମାଙ୍କଡ଼କୁ ଧରିବା ପାଇଁ ବନ ବିଭାଗର ଆର୍ଆର୍ଟି ଟିମ୍ ଅପରେଶନ ଜାରି ରଖିଛି।
