ସୋର, ୧୧ା୧୨(ଡି.ଏନ.ଏ.): ବାଲେଶ୍ୱର ଜିଲା ସୋର ଥାନା ଅଞ୍ଚଳର ନାବାଳିକାଙ୍କୁ ଇନଷ୍ଟାଗ୍ରାମରେ ପ୍ରେମ କରି ଅପହରଣ ଅଭିଯୋଗରେ ଖୋର୍ଦ୍ଧା ଜିଲା ଆୟତପୁର ଗ୍ରାମର ଜଣେ ଯୁବକଙ୍କୁ ସୋର ପୋଲିସ ଗିରଫ କରି କୋର୍ଟଚାଲାଣ କରିଛି। ଆୟତପୁର ଗ୍ରାମର ପ୍ରଶାନ୍ତ ନାୟକ ଉକ୍ତ ନାବାଳିକାଙ୍କ ସହ ଇନ୍ଷ୍ଟାଗ୍ରାମରେ ପରିଚିତ ହୋଇଥିଲେ। ପରବର୍ତ୍ତୀ ସମୟରେ ଉଭୟଙ୍କ ମଧ୍ୟରେ ଫୋନ ନମ୍ବର ଆଦାନପ୍ରଦାନ ପରେ କଥାବାର୍ତ୍ତା ହୋଇ ପ୍ରେମ ଆରମ୍ଭ ହୋଇଥିଲା। ଗତ ଅକ୍ଟୋବର ୭ରେ ପ୍ରଶାନ୍ତ ଆୟତପୁରରୁ ଆସି ନାବାଳିକାଙ୍କ ଘରୁ ଅପହରଣ କରି ଫେରାର ହୋଇଯାଇଥିଲେ। ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରି ନ ପାଇ ଅକ୍ଟୋବର ୧୭ରେ ସୋର ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ସୋର ପୋଲିସ ଏକ ମାମଲା (ନଂ. ୪୪୬/୨୨) ରୁଜୁ କରି ନାବାଳିକାଙ୍କ ମୋବାଇଲକୁ ବାରମ୍ବାର ଫୋନ୍ ଆସିଥିବା ଏକ ମୋବାଇଲ ନମ୍ବରକୁ ଟ୍ରାକିଂ କରି ଭୁବନେଶ୍ୱର ୟୁନିଟ-୯ସ୍ଥିତ ମା’ ମଙ୍ଗଳା ବସ୍ତିରେ ପହଞ୍ଚିଥିଲେ। ସେଠାରୁ ନାବାଳିକାଙ୍କୁ ଉଦ୍ଧାର କରିବା ସହ ପ୍ରଶାନ୍ତଙ୍କୁ ଗିରଫ କରି ସୋର ଥାନାକୁ ଆଣିଥିଲେ। ଶନିବାର ଅପରାହ୍ନରେ ପୋଲିସ ଉଭୟଙ୍କର ଡାକ୍ତରୀମାଇନା ପରେ ନାବାଳିକାଙ୍କୁ ବିବାହର ପ୍ରଲୋଭନ ଦେଖାଇ ଅପହରଣ କରିଥିବା ଅଭିଯୋଗରେ ପ୍ରଶାନ୍ତଙ୍କୁ କୋର୍ଟଚାଲାଣ କରିଛି।
