ରାଞ୍ଚି,୯ା୮: ଝାଡ଼ଖଣ୍ଡରେ JPSC ପରୀକ୍ଷାକୁ ନେଇ ଛାତ୍ରୀଛାତ୍ରମାନଙ୍କ ଦାବି ଦୀର୍ଘଦିନ ଧରି ଚର୍ଚ୍ଚାରେ ରହିଛି । ପରୀକ୍ଷା ପ୍ରକ୍ରିୟାରେ ଅନିୟମିତତା ଅଭିଯୋଗ, ଅଟକି ରହିଥିବା ପରୀକ୍ଷା ଏବଂ ନିଯୁକ୍ତି ବ୍ୟବସ୍ଥାରେ ସୁଧାର ଦାବି କରି ପରୀକ୍ଷାର୍ଥୀମାନେ ଲଗାତାର ଆନ୍ଦୋଳନ କରୁଛନ୍ତି ।
ଏହାରି ମଧ୍ୟରେ ସରକାରୀ କମିଟି ଏବଂ ଛାତ୍ର ପ୍ରତିନିଧିଙ୍କ ମଧ୍ୟରେ ହୋଇଥିବା ତୃତୀୟ ପର୍ଯ୍ୟାୟ ଆଲୋଚନାକୁ ନେଇ ବଡ଼ ସୂଚନା ସାମ୍ନାକୁ ଆସିଛି। ସୂତ୍ର ଅନୁସାରେ, ଛାତ୍ରମାନଙ୍କ ଅନେକ ଦାବି ଉପରେ ସରକାରୀ କମିଟି ସକାରାତ୍ମକ ଆଭିମୁଖ୍ୟ ଦେଖାଇଛି । ତୃତୀୟ ପର୍ଯ୍ୟାୟ ଆଲୋଚନାରେ ସରକାରୀ କମିଟି ଛାତ୍ରମାନଙ୍କୁ କହିଛି ଯେ ୧୪ତମ JPSC ପରୀକ୍ଷା ରଦ୍ଦ କରାଯିବ । ଏହା ସହ ୨୦୨୩-୨୫ର ବ୍ୟାକଲଗ୍ JPSC ପରୀକ୍ଷାଗୁଡ଼ିକୁ ମଧ୍ୟ ରଦ୍ଦ କରିବା ନେଇ ସୂଚନା ମିଳିଛି। ତେବେ ଏନେଇ ଅଧିକାରିକ ଆଦେଶ ଜାରି ହେବା ପରେ ହିଁ ସ୍ଥିତି ସମ୍ପୂର୍ଣ୍ଣ ସ୍ପଷ୍ଟ ହେବ।
ବୈଠକରେ ସରକାରୀ କମିଟି ପକ୍ଷରୁ ସମଗ୍ର ମାମଲାର CID ତଦନ୍ତ ୯୦ ଦିନ ମଧ୍ୟରେ ଶେଷ କରାଯିବ ବୋଲି କୁହାଯାଇଥିବା ସୂଚନା ମିଳିଛି। ଏହା ସହ ମାମଲାର ଆର୍ଥିକ ଦିଗଗୁଡ଼ିକର ତଦନ୍ତ ED କରିବ ବୋଲି ମଧ୍ୟ କୁହାଯାଇଛି। ଏହା ବ୍ୟତୀତ ଆଉଟସୋର୍ସିଂ ଏଜେନ୍ସି TDPL ଦ୍ୱାରା ପରିଚାଳିତ ସମସ୍ତ ପରୀକ୍ଷାର ମଧ୍ୟ ତଦନ୍ତ କରାଯିବା ନେଇ ସୂଚନା ସାମ୍ନାକୁ ଆସିଛି । ପରୀକ୍ଷା ପ୍ରକ୍ରିୟାରେ ପାରଦର୍ଶିତା ଏବଂ ନିରପେକ୍ଷତା ଦାବିରେ ଛାତ୍ରମାନେ ଦୀର୍ଘଦିନ ଧରି ସ୍ୱର ଉଠାଇ ଆସୁଛନ୍ତି । ଏବେ ସରକାରୀ କମିଟି ପକ୍ଷରୁ ପରୀକ୍ଷା ରଦ୍ଦ ଏବଂ ତଦନ୍ତ ନେଇ ଆଶ୍ୱାସନ ମିଳିଥିବା ଖବର ପରେ ଆଗାମୀ ପଦକ୍ଷେପ ଉପରେ ସମସ୍ତଙ୍କ ନଜର ରହିଛି ।
