ଇଣ୍ଡିଆନାପୋଲିସ୍ (ୟୁଏସ୍), ୫ା୭ (ଏପି)-ସାତ ଥର ନାସ୍କାର ଚାମ୍ପିୟନ ଜେମି ଜନସନ କରୋନା ଭାଇରସ୍ ପଜିଟିଭ୍ ବୋଲି ଜଣାପଡ଼ିଛି। ଫଳରେ ସେ ରବିବାର ଇଣ୍ଡିଆନାପୋଲିସ ମୋଟର ସ୍ପିଡ୍ଓ୍ବେ ରେସ୍ରେ ଭାଗ ନେଇ ପାରିବେ ନାହିଁ। କୌଣସି ନାସ୍କାର ସିରିଜରେ କରୋନା ପଜିଟିଭ୍ ହେବାରେ ୪୪ ବର୍ଷୀୟ ଜନସନ ହେଉଛନ୍ତି ପ୍ରଥମ ଡ୍ରାଇଭର। ଏହା ରେସ୍କୁ ପ୍ରଭାବିତ କରିବ କି ନା ସେ ସମ୍ପର୍କରେ କୌଣସି ସୂଚନା ନାହିଁ। ଡାକ୍ତର ସୁସ୍ଥ ଘୋଷଣା ନ କରିବା ପର୍ଯ୍ୟନ୍ତ ଜନସନ ରେସ୍କୁ ପ୍ରତ୍ୟାବର୍ତ୍ତନ କରିପାରିବେ ନାହିଁ ବୋଲି ହେଣ୍ଡ୍ରିକ୍ ମୋଟର ଟ୍ରାନ୍ସପୋର୍ଟସ ପ୍ରକାଶ କରିଛି। ଜନସନଙ୍କ ସ୍ତ୍ରୀ ଚାନିଙ୍କ ନିକଟରେ ଆଲର୍ଜି ଲକ୍ଷଣ ଦେଖା ଦେଇଥିଲା। କୋଭିଡ୍-୧୯ ଟେଷ୍ଟରେ ତାଙ୍କର ପଜିଟିଭ୍ ଆସିବା ପରେ ଜନସନଙ୍କର ଟେଷ୍ଟ ହୋଇଥିଲା। କିନ୍ତୁ ତାଙ୍କ ନିକଟରେ ରୋଗର କୌଣସି ଲକ୍ଷଣ ଦେଖାଯାଇ ନ ଥିଲା। ଜନସନ କହିଛନ୍ତି, ମୋ କପ୍ କ୍ୟାରିୟରରେ କେବେ ଏକ ରେସ୍ ମିସ୍ କରି ନାହିଁ। ପ୍ରତିଯୋଗିତା ବାହାରେ ରହି ରେସ୍ ଦେଖିବା ମୋ ପାଇଁ କଷ୍ଟକର ହେବ।
