ବୟସ ମାତ୍ର ୧୮ । କିନ୍ତୁ ଏଗ୍ରି ରୋବୋ ତିଆରି କରି କୃଷି କ୍ଷେତ୍ରରେ ଏକ ଉଦାହରଣ ସୃଷ୍ଟି କରିଛନ୍ତି ରାଜସ୍ଥାନ କୋଟାର ଆର୍ଯ୍ୟନ୍ ସିଂ । ଏହି ରୋବୋ କୃତ୍ରିମ ବୁଦ୍ଧିମତ୍ତା ଦ୍ୱାରା ଚାଲୁଛି। ଏହା ଦ୍ୱାରା ଜଳସେଚନ ଓ ଅନ୍ୟାନ୍ୟ କାର୍ଯ୍ୟ ସୁରୁଖୁରୁରେ ସଞ୍ଚାଳନ କରାଯାଇପାରୁଛି। ଆର୍ଯ୍ୟନଙ୍କ ଜନ୍ମ ଏକ କୃଷକ ପରିବାରରେ। ସେ କୃଷକ ଜୀବନର କଷ୍ଟକର ତଥା ଅଭାବୀ ଜୀବନକୁ ନିକଟରୁ ଦେଖିବା ପରେ ସେମାନଙ୍କୁ ସାହାଯ୍ୟ କରିବା ଲାଗି ସ୍ଥିର କରିଥିଲେ, ଯାହାର ଫଳସ୍ବରୂପ ସେ ଏହି ରୋବୋ ନିର୍ମାଣ କରିଛନ୍ତି। ପ୍ରଥମେ ୧୦ମ ଶ୍ରେଣୀରେ ପଢ଼ିବା ସମୟରେ ଏଭଳି ରୋବୋ ନିର୍ମାଣ କରିବାକୁ ଚିନ୍ତା କରିଥିଲେ। ପରେ କୋଭିଡ୍-୧୯ ଲକ୍ଡାଉନ ସମୟରେ ଏଥିପାଇଁ ସେ ବହୁ ସମୟ ପାଇଥିଲେ ଓ ଟେକ୍ନୋଲୋଜି ଉପରେ ନିଶ୍ଚିତ ହୋଇଥିଲେ। ଆର୍ଯ୍ୟନ ବିଟେକ୍ ଛାତ୍ର ହୋଇଥିବାରୁ ଏହି ରୋବୋ ନିର୍ମାଣ କରିବା ତାଙ୍କ ପାଇଁ ସହଜ ହୋଇଥିଲା। କଲେଜର ପରୀକ୍ଷାଗାରରେ ପ୍ରାଧ୍ୟାପକମାନେ ତାଙ୍କୁ ଏ ଦିଗରେ ସହଯୋଗ କରିଥିଲେ।
