ନୂଆଦିଲ୍ଲୀ,୨୫।୩: ମହାରାଷ୍ଟ୍ରର ଶିବସେନା (ୟୁବିଟି) ଏମପି ସଞ୍ଜୟ ରାଉତ କହିଛନ୍ତି, ‘ଦିଲ୍ଲୀର ରାମଲିଲା ମଇଦାନରେ ଇଣ୍ଡିଆ ଆଲାଇନ୍ସ ଏକ ବିକ୍ଷୋଭ ପ୍ରଦର୍ଶନ କରୁଛି। ଆମେ ସମସ୍ତେ ସେହି ରାଲିରେ ଯୋଗଦେବୁ। ପ୍ରଧାନମନ୍ତ୍ରୀ ମୋଦି ଅରବିନ୍ଦ କେଜରିୱାଲଙ୍କୁ ଭୟ କରୁଛନ୍ତି। ବର୍ତ୍ତମାନ ଅରବିନ୍ଦ କେଜରିୱାଲ ଅଧିକ ବିପଜ୍ଜନକ। ଯେହେତୁ ସେ ବର୍ତ୍ତମାନ ଜେଲରୁ କାମ କରିବେ। ତେଣୁ ଲୋକମାନେ ତାଙ୍କ କଥା ଶୁଣିବେ ଏବଂ ତାଙ୍କ ସମର୍ଥନରେ ଆସିବେ। ସ୍ବାଧୀନତା ସଂଗ୍ରାମ ସମୟରେ ମଧ୍ୟ ଜେଲକୁ ଯାଇଥିବା ନେତାମାନେ ଅଧିକ ଶକ୍ତିଶାଳୀ ହୋଇଥିଲେ। ’
ଆମ ଆଦମୀ ପାର୍ଟି (ଏଏପି) ଘୋଷଣା କରିଛି ଯେ ଏହାର ନେତା ଅରବିନ୍ଦ କେଜରିୱାଲ ଜେଲରୁ ସରକାର ଚଳାଇବେ। ଗୋଟିଏ ପଟେ ଏହି ବିବୃତ୍ତି ସାରା ଦେଶରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଅନ୍ୟ ପଟେ ଭାଜପା ନେତାମାନେ ତାଙ୍କୁ ଟାର୍ଗେଟ କରୁଛନ୍ତି। କିଛି ଦିନ ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଗିରଫ କରିଛି। ମାର୍ଚ୍ଚ ୨୧, ୨୦୨୪ ରେ ଅରବିନ୍ଦ କେଜରିୱାଲଙ୍କୁ ଏକ୍ସାଇଜ ପଲିସି ମାମଲାରେ ଇଡି ଗିରଫ କରିଥିଲା।
ତାଙ୍କ ଗିରଫଦାରୀକୁ ଦୃଷ୍ଟିରେ ରଖି ଏଏପି ‘ମେଁ ଭି କେଜରିୱାଲ’ ଅଭିଯାନ ଆରମ୍ଭ କରିଛି। ଏହି ଅଭିଯାନ ମାଧ୍ୟମରେ ଏଏପି ବାର୍ତ୍ତା ପଠାଇବାକୁ ଚାହୁଁଛି ଯେ କେଜରିୱାଲ ତାଙ୍କ ପଦରୁ ଇସ୍ତଫା ଦେବେ ନାହିଁ ଏବଂ ଆବଶ୍ୟକ ସ୍ଥଳେ ସେ ଜେଲରୁ ସରକାର ଚଳାଇବେ। ଦିଲ୍ଲୀ ମନ୍ତ୍ରୀ ଆତିଶି ଏହା ମଧ୍ୟ କହିଛନ୍ତି, ଆମେ ଏହା ମଧ୍ୟ କହିଛୁ ଯେ ଆବଶ୍ୟକ ହେଲେ ସେ ଜେଲରୁ ମଧ୍ୟ ସରକାର ଚଳାଇବେ। ସେ ସରକାର ଚଳାଇ ପାରିବେ କାରଣ କୌଣସି ନିୟମ ତାଙ୍କୁ ତାହା କରିବାରେ ରୋକି ପାରିବ ନାହିଁ। ତାଙ୍କୁ ଦୋଷୀ ସାବ୍ୟସ୍ତ କରାଯାଇ ନାହିଁ,ତେଣୁ ସେ ଦିଲ୍ଲୀର ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ ଜାରି ରଖିବେ ।
