ଭୁବନେଶ୍ୱର, ୩୦।୭(ବ୍ୟୁରୋ): ସ୍ବାସ୍ଥ୍ୟ ସେବାକୁ ନେଇ ସାରା ରାଜ୍ୟରୁ ଆସୁଛି ନାନା ଅଭିଯୋଗ। ଏସ୍ସିବି ମେଡିକାଲର ଭୁଲ୍ କ୍ୟାନ୍ସର ରିପୋର୍ଟ ପାଇଁ ମହିଳା ଅଙ୍ଗ ହରାଇଥିବାବେଳେ ଭୁଲ୍ ଇଞ୍ଜେକ୍ସନ ଓ ତ୍ରୁଟିପୂର୍ଣ୍ଣ ଚିକିତ୍ସାଯୋଗୁ ଅନେକଙ୍କ ଜୀବନ ଯାଉଛି। ଏବେ ରାଜଧାନୀର ପ୍ରମୁଖ ଚିକିତ୍ସାଳୟ କ୍ୟାପିଟାଲ ହସ୍ପିଟାଲରେ ସମାନ ଘଟଣା ଘଟିଛି। ଇଞ୍ଜେକ୍ସନ ନେବାର କିଛି ସମୟ ପରେ ଜଣେ ରୋଗୀଙ୍କ ମୃତ୍ୟୁ ହୋଇଛି। ମୃତକ ହେଲେ ଧଉଳି ଥାନା ଅନ୍ତର୍ଗତ ଜଗନ୍ନାଥପୁରପାଟନା ଗାଁର ଦୁଃଶାସନ ସାହୁ (୫୫)। ଭୁଲ୍ ଚିକିତ୍ସା ଯୋଗୁ ତାଙ୍କର ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ ଆଣି ହୋହଲ୍ଲା କରିବାରୁ ହସ୍ପିଟାଲରେ ଉତ୍ତେଜନା ପ୍ରକାଶ ପାଇଥିଲା। ହସ୍ପିଟାଲ କର୍ତ୍ତୃପକ୍ଷଙ୍କ ରିପୋର୍ଟ ଆଧାରରେ ଧଉଳି ଥାନା ପୋଲିସ ଏକ ଅପମୃତ୍ୟୁ ମାମଲା (ନଂ.୧୯/୨୦୨୨) ରୁଜୁ କରି ତଦନ୍ତ ଚଳାଇଥିବା ଥାନାଧିକାରୀ ଚିତ୍ତ ଜେନା କହିଛନ୍ତି।
ସୂଚନା ଅନୁଯାୟୀ, ସକାଳେ ଦୁଃଶାସନ ଛାତିରେ ଯନ୍ତ୍ରଣା ଅନୁଭବ କରିଥିଲେ। ପୁତୁରା ଶତୃଘ୍ନ ତାଙ୍କୁ ସ୍ଥାନୀୟ ମ୍ୟୁନିସିପାଲିଟି ହସ୍ପିଟାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତରଙ୍କ ପରାମର୍ଶକ୍ରମେ ଏକ ଇଞ୍ଜେକ୍ସନ ଦିଆଯାଇଥିଲା। ଅଧିକ ଚିକିତ୍ସା ଲାଗି ପରିବାର ଲୋକେ ତାଙ୍କୁ କ୍ୟାପିଟଲ ହସ୍ପିଟାଲରେ ଭର୍ତ୍ତି କରିଥିଲେ। ଡାକ୍ତର ଏସିଡିଟି ହୋଇଥିବା କହି କିଛି ପରୀକ୍ଷା କରିଥିଲେ। ପ୍ରେସ୍ସ୍କ୍ରିପ୍ଶନରେ ଔଷଧ ଲେଖିବା ସହ ୨ଟି ଇଞ୍ଜେକ୍ସନ ଦେଇଥିଲେ। ୪୫ ମିନିଟ୍ ପରେ ଦେହ ଠିକ୍ ହୋଇଯିବ କହି ଡାକ୍ତର ରୋଗୀଙ୍କୁ ଘରକୁ ନେଇଯିବାକୁ କହିଥିଲେ। କିନ୍ତୁ ଇଞ୍ଜେକ୍ସନ ନେବା ପରେ ଦୁଃଶାସନଙ୍କ ଛାତିରେ ଅଧିକ ଯନ୍ତ୍ରଣା ହୋଇଥିଲା। ଏନେଇ ପରିବାର ଲୋକ ଡାକ୍ତରଙ୍କୁ ଜଣାଇବାରୁ ସେ କିଛି ହେବନି ଘରକୁ ପଳାଇଯାଅ ବୋଲି କହିଥିଲେ। ଏହାପରେ ପରିବାର ଲୋକେ ଦୁଃଶାସନକୁ ଧରି ଘରକୁ ଫେରୁଥିଲେ। ବାଟରେ ସାମନ୍ତରାପୁର ଛକ ନିକଟରେ ତାଙ୍କ ଯନ୍ତ୍ରଣା ଅସହ୍ୟ ହୋଇଥିଲା ଓ ସେ ସଜ୍ଞାହୀନ ହୋଇପଡିଥିଲେ। ଫଳରେ ତାଙ୍କୁ ପୁଣି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। କାଜୁଆଲିଟିରେ ଜଣେ ମହିଳା ଡାକ୍ତର ରୋଗୀଙ୍କ ପ୍ରେସ୍ସ୍କ୍ରିପ୍ଶନ ଛଡ଼ାଇ ନେଇଥିଲେ। ପରିବାର ଲୋକେ ପଚାରିବାରୁ ଚିକିତ୍ସା ସରିବା ପରେ ଦିଆଯିବ ବୋଲି କହିଥିଲେ। ଏହା ପରେ ଦୁଃଶାସନଙ୍କୁ ମୃତ ଘୋଷଣା କରାଯାଇଥିଲା। ଏହାକୁ ନେଇ ମଧ୍ୟାହ୍ନରେ ମେଡ଼ିକାଲ ପରିସରରେ ମୃତକଙ୍କ ସମ୍ପର୍କୀୟମାନେ ପାଟିତୁଣ୍ଡ କରିଥିଲେ। ଭୁଲ୍ ଇଞ୍ଜେକ୍ସନ ଓ ତ୍ରୁଟିପୂର୍ଣ୍ଣ ଚିକିତ୍ସା ପାଇଁ ଦୁଃଶାସନଙ୍କ ମୃତ୍ୟୁ ହେଲା ଓ ଏଥିପାଇଁ ଚିକିତ୍ସା କରୁଥିବା ଡାକ୍ତର ହିଁ ଦାୟୀ ବୋଲି ଅଭିଯୋଗ କରିଥିଲେ। ଦୀର୍ଘ ସମୟ ଧରି ସେଠାରେ ଉତ୍ତେଜନା ପ୍ରକାଶ ପାଇଥିଲା। ପୋଲିସ ପହଞ୍ଚତ୍ ବୁଝାଶୁଝା କରିବାରୁ ପରିସ୍ଥତି ଶାନ୍ତ ପଡ଼ିଥିଲା। ଏନେଇ କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ଲକ୍ଷ୍ମୀଧର ସାହୁ କହିଛନ୍ତି, ବିଭାଗ ପକ୍ଷରୁ ତଦନ୍ତ ଟିମ୍ ଗଠନ କରାଯାଇଛି। ଶନିବାର ଉକ୍ତ ଟିମ୍ ତଦନ୍ତ ରିପୋର୍ଟ ପ୍ରଦାନ କରିବ ବୋଲି ସେ କହିଛନ୍ତି।
