ପୁରୀ ଅଫିସ, ୩୦ା୭: ବହୁ ବର୍ଷ ଧରି ଆବାସ ପାଇଁ ପ୍ରତୀକ୍ଷାରତ ଶ୍ରୀମନ୍ଦିରର ଗରିବ ଓ ବାସହୀନ ସେବାୟତଙ୍କ ମନରେ ଆଶା ସଞ୍ଚାର ହୋଇଛି। ସେବାୟତ ଆବାସ ଯୋଜନାରେ ଗୃହ ନିର୍ମାଣ ଲାଗି ଶୁକ୍ରବାରଠାରୁ ଜମି ଚିହ୍ନଟ ପ୍ରକ୍ରିୟା ଆରମ୍ଭ ହୋଇଛି। ହରଚଣ୍ଡୀ ସାହି ମୌଜାରେ ପ୍ରାୟ ୩ ଏକର ଜାଗା ଚିହ୍ନଟ କରାଯାଇ ପାଚେରି ନିର୍ମାଣ କାମ ଆରମ୍ଭ ହୋଇଛି। ଏହି ପ୍ରକଳ୍ପ ହେବା ଦ୍ୱାରା ପ୍ରାୟ ୫ଶହ ସେବାୟତ ଉପକୃତ ହେବେ। ସାମାଜିକ, ଅର୍ଥନୈତିକ ସର୍ବେକ୍ଷଣ ଶେଷ ପରେ ସେବାୟତ ଆବାସ ଯୋଜନା ପାଇଁ କାର୍ଯ୍ୟକ୍ରମ ଆରମ୍ଭ ହୋଇଛି।
୨୦୧୩ରେ ନବକୃଷ୍ଣ ସେଣ୍ଟର ଫର୍ ଡେଭ୍ଲପ୍ମେଣ୍ଟ ଷ୍ଟଡିଜ ପକ୍ଷରୁ ସେବାୟତଙ୍କ ସାମାଜିକ ଓ ଅର୍ଥନୈତିକ ସର୍ଭେ କରାଯାଇଥିଲା। ପ୍ରାୟ ୨୨୩୬ ସେବାୟତ ପରିବାର ଥିବା ବେଳେ ୯୫୫୮ଜଣ ସେବାୟତ ରହିଥିବା ଜଣାପଡ଼ିିଥିଲା। ସେବାୟତଙ୍କ ସଂଖ୍ୟା, ଶିକ୍ଷାଗତ ଯୋଗ୍ୟତା, ଅନ୍ୟ ବୃତ୍ତି ଓ ଆର୍ଥତ୍କ ମାନଦଣ୍ଡକୁ ନେଇ ଭବିଷ୍ୟତରେ ଦୀର୍ଘମିଆଦି ଯୋଜନା ପ୍ରସ୍ତୁତ କରାଯିବାକୁ ସ୍ଥିର ହୋଇଥିଲା। ସେବାୟତଙ୍କ ଲାଗି ରାଜ୍ୟ ଗୃହ ଓ ନଗର ଉନ୍ନୟନ ବିଭାଗ ଏବଂ ପ୍ରଧାନମନ୍ତ୍ରୀ ଆବାସ ଯୋଜନା ସହଯୋଗରେ ଗୃହ ନିର୍ମାଣ ନିମନ୍ତେ ଲକ୍ଷ୍ୟ ରଖାଯାଇଥିଲା। ସୂଚନାଯୋଗ୍ୟ, ଅନେକ ସେବାୟତ ସାହିରେ ଗୋଟିଏ ଗୋଟିଏ ଘରେ ୧୦-୧୫ ପରିବାର ବହୁକଷ୍ଟରେ ରହୁଛନ୍ତି। ଅନେକ ସେବାୟତ ପରିବାର ବାସହୀନ ଅଛନ୍ତି। ଦୀର୍ଘବର୍ଷ ହେବ ବାସହୀନ ସେବାୟତ ପରିବାରକୁ ଘର ଯୋଗାଇବା ଲାଗି ଦାବି ହୋଇଆସୁଥିଲା। ଏହାପରେ ସେମାନଙ୍କୁ ଆର୍ଥତ୍କ ସହାୟତା ଓ ଗୃହ ଯୋଗାଇବାକୁ ନିଷ୍ପତ୍ତି ହୋଇଥିଲା। ଏହି କ୍ରମରେ ପ୍ରଥମ ପର୍ଯ୍ୟାୟରେ ହରଚଣ୍ଡୀ ସାହି ମୌଜାରେ ଥିବା ମହିପ୍ରକାଶ ମଠର ୩ ଏକର ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ ହୋଇଛି। ଶୁକ୍ରବାର ଶ୍ରୀମନ୍ଦିର ଉନ୍ନୟନ ପ୍ରଶାସକଙ୍କ ସହ ପରିଚାଳନା କମିଟି ସଦସ୍ୟ ଉପସ୍ଥିତ ରହି କାର୍ଯ୍ୟ ଅନୁଧ୍ୟାନ କରିଥିଲେ। ଦ୍ୱିତୀୟ ପର୍ଯ୍ୟାୟରେ ମାଟିମଣ୍ଡପ ସାହି ମୌଜାରେ ଥିବା ଏମାର ମଠର ଜମି ଅଧିଗ୍ରହଣ ହେବ ବୋଲି ସୂଚନା ମିଳିଛି। ଏହି ଦୁଇଟି ମୌଜା ଶ୍ରୀମନ୍ଦିର ପ୍ରଶାସନ ଅଧୀନକୁ ଆସିଛି। ସେହି ସ୍ଥାନ ସଫା କରାଯାଇ ପାଚେରି ନିର୍ମାଣ ପରେ ଆପାର୍ଟମେଣ୍ଟ ନିର୍ମାଣ କରାଯିବ। ୨୦୧୪ ଓ ୨୦୧୫ରେ ସେବାୟତ ଜଣଗଣନା କରାଯାଇଥିଲା। ପରେ ନବକୃଷ୍ଣ ଚୌଧୁରୀ ସେଣ୍ଟର ଫର୍ ଡେଭ୍ଲପମେଣ୍ଟ ଷ୍ଟଡିଜ୍ ପକ୍ଷରୁ ସେବାୟତଙ୍କ ସାମାଜିକ, ଅର୍ଥନୈତିକ ନେଇ ପୁନଃ ଗଣନା କରାଯାଇଥିଲା। ସେବାୟତ ବାସଗୃହ ଯୋଜନା ପାଇଁ ଶ୍ରୀମନ୍ଦିର ପରିଚାଳନା କମିଟିରେ ବଜେଟ ପାରିତ ହୋଇଥିଲା। ଏ ସମ୍ପର୍କରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ ଜେନା କହିଛନ୍ତି, ଶ୍ରୀମନ୍ଦିର ପରିଚାଳନା କମିଟି ନିଷ୍ପତ୍ତି ଅନୁଯାୟୀ, ହରଚଣ୍ଡୀ ସାହି ମୌଜାରେ ଗରିବ ସେବାୟତଙ୍କ ପାଇଁ ବାସଗୃହ ନିର୍ମାଣ କରାଯିବାକୁ ନିଷ୍ପତ୍ତି ନିଆଯାଇଥିଲା। ପ୍ରଥମେ ମାଟିତୋଟା ଅଞ୍ଚଳରେ ପ୍ରକଳ୍ପ କରାଯିବାକୁ ଥିଲା। ମାତ୍ର ଉକ୍ତ ସ୍ଥାନ ଶ୍ରୀମନ୍ଦିରଠାରୁ କିଛି ଦୂରରେ ଥିବାରୁ ସେବାୟତମାନେ ଦାରୁଦିଅଁଙ୍କ ସେବା ପୂଜାରେ ହଇରାଣ ହେବା ଆଶଙ୍କା କରି ହରଚଣ୍ଡୀ ସାହି ମାୈଜାକୁ ସ୍ଥାନାନ୍ତର କରାଯାଇଥିଲା। ହରଚଣ୍ଡୀ ସାହି ମୌଜାର ୯୧, ୯୨ ଏବଂ ୯୩ ନମ୍ବର ପ୍ଲଟର ୩ ଏକରରୁ ଅତ୍ଧକ ସ୍ଥାନରେ ଏହି ପ୍ରକଳ୍ପ କରାଯିବ। ମୁଖ୍ୟତଃ ୯୩ ନମ୍ବର ପ୍ଲଟରେ ପାଖାପାଖି ୨ ଏକର ୮ ଶହ ଜାଗା ରହିଛି। ୬ଶହ ବର୍ଗଫୁଟର ୪ ମହଲା କୋଠା ହେବ। ଜି + ୩ ଆପାର୍ଟମେଣ୍ଟ କରାଯିବ। ସେଠାରେ ସମସ୍ତ ସୁବିଧା ରହିବ। ଦୁଇବର୍ଷ ମଧ୍ୟରେ କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଛି। ଯୋଗ୍ୟ ସେବାୟତଙ୍କୁ ଚିହ୍ନଟ କରାଯାଇ ଗୃହ ଦିଆଯିବ। ଯେଉଁମାନେ ବାସଗୃହ ପାଇଁ ପ୍ରଶାସନ ପାଖକୁ ଆବେଦନପତ୍ର ପଠାଇବେ, ସେମାନଙ୍କ ନିକଟକୁ ଏକ କମିଟି ଯାଇ ଅନୁଧ୍ୟାନ କରିବ। ଏବେ ପ୍ରଶାସନ ପକ୍ଷରୁ ଚିହ୍ନଟ ଜାଗାରେ ଏବେ ପାଚେରି ନିର୍ମାଣ ଚାଲିଛି। ଡିଜାଇନ ଚୂଡ଼ାନ୍ତ ହେବା ପରେ କେତେ ଖର୍ଚ୍ଚ ହେବ ତାହା ଜଣାପଡ଼ିବ। ତେବେ ଚିହ୍ନଟ ଜାଗା ଉପରେ ଜଣେ ବ୍ୟକ୍ତି ଘର କରି ରହିଛନ୍ତି। ସେ ପୁରୀ ସିଭିଲ କୋର୍ଟରେ ଏକ ମାମଲା ରୁଜୁ କରିଛନ୍ତି। ଉକ୍ତ ଜମି ଶ୍ରୀମନ୍ଦିର ନାମରେ ଥିବାରୁ ସେପରି କିଛି ସମସ୍ୟା ହେବ ନାହିଁ ବୋଲି ଜେନା ଆଶା ବ୍ୟକ୍ତ କରିଛନ୍ତି। ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମାଧବ ମହାପାତ୍ର କହିଛନ୍ତି, ପ୍ରକଳ୍ପ ହେବା ଦ୍ୱାରା ଗରିବ ସେବାୟତ ଉପକୃତ ହେବେ। ସେହିପରି ସେବାୟତମାନେ ଶ୍ରୀମନ୍ଦିର ପାଖରେ ରହିଲେ ଠିକ ସମୟରେ ନୀତି ହୋଇପାରିବ।
