ଦୁବାଇ, ୨୬।୯: ଆଇପିଏଲ୍ର ଚଳିତ ୧୩ତମ ସଂସ୍କରଣରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସର ପ୍ରଦର୍ଶନ ଆଖିଦୃଶିଆ ରହିନାହିଁ। ସିଜନର ପ୍ରଥମ ମ୍ୟାଚ୍ ଜିତି ଅଭିଯାନ ଆରମ୍ଭ କରିଥିବା ଚେନ୍ନାଇ। ଉଦ୍ଘାଟନୀ ମୁକାବିଲାରେ ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସକୁ ୫ ଉଇକେଟ୍ରେ ଚେନ୍ନାଇ ପରାସ୍ତ କରିଥିଲା। ଏହି ମ୍ୟାଚ୍ରେ ଅମ୍ବାତି ରାୟୁଡୁ ୭୧ ରନର ଦମ୍ଦାର ଇନିଂସ ଖେଳି ଚେନ୍ନାଇ ବିଜୟରେ ନାୟକ ସାଜିଥିଲେ। କିନ୍ତୁ ଆଘାତଜନିତ ସମସ୍ୟା ଲାଗି ସେ ପରବର୍ତ୍ତୀ ୨ଟି ମ୍ୟାଚ୍ରୁ ବାଦ୍ ପଡ଼ିଛନ୍ତି। ଯେଉଁ ୨ଟି ମ୍ୟାଚ୍ରେ ଧୋନୀଙ୍କ ଦଳକୁ ପରାଜୟ ସାମ୍ନା କରିବାକୁ ପଡ଼ିଛି। ବର୍ତ୍ତମାନ ସୁପର୍ କିଙ୍ଗ୍ସ ସୁଦ୍ଧା ୩ ମ୍ୟାଚ୍ ଖେଳି ୨ ପଏଣ୍ଟ ସହ ଟେବୁଲର ୫ମ ସ୍ଥାନରେ ରହିଛି। ଚେନ୍ନାଇ ଏହାର ପରବର୍ତ୍ତୀ ମୁକାବିଲାରେ ଆସନ୍ତା ଶୁକ୍ରବାର (୨ ଅକ୍ଟୋବର) ସନ୍ରାଇଜର୍ସ ହାଇଦ୍ରାବାଦ୍କୁ ଭେଟିବ। ତେବେ ଏହି ମ୍ୟାଚ୍ ପୂର୍ବରୁ ଅଧିନାୟକ ଧୋନୀଙ୍କ ପାଇଁ ଖୁସି ଖବର ଆସିଛି। ଆଘାତଜନିତ ସମସ୍ୟା ଲାଗି ଗତ ୨ଟି ମ୍ୟାଚ୍ ଖେଳି ନ ଥିବା ରାୟୁଡୁ ହାଇଦ୍ରାବାଦ ବିପକ୍ଷ ମ୍ୟାଚ୍ ଖେଳିବା ଏକ ପ୍ରକାର ନିଶ୍ଚିତ ହୋଇଛି।
