ନୂଆଦିଲ୍ଲୀ,୬।୧୨: ବଳପୂର୍ବକ ଧର୍ମାନ୍ତରୀକରଣ ଏକ ଗମ୍ଭୀର ପ୍ରସଙ୍ଗ ଏବଂ ଏହା ସମ୍ବିଧାନ ବିରୋଧୀ ବୋଲି ସୋମବାର ସୁପ୍ରିମକୋର୍ଟ କହିଛନ୍ତି। ଭୟ ଦେଖାଇ, ଧମକ ଦେଇ, କିମ୍ବା ଉପହାର ଏବଂ ଆର୍ଥତ୍କ ଫାଇଦାର ପ୍ରଲୋଭନ ଦେଖାଇ କରାଯାଉଥିବା ପ୍ରତାରଣାପୂର୍ଣ୍ଣ ଧର୍ମ ପରିବର୍ତ୍ତନ ରୋକିବା ଦିଗରେ କଠୋର ପଦକ୍ଷେପ ନେବା ନିମନ୍ତେ କେନ୍ଦ୍ର ଓ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବା ଲାଗି ଆଇନଜୀବୀ ଅଶ୍ୱିନୀ କୁମାର ଉପାଧ୍ୟାୟ ସର୍ବୋଚ୍ଚ ଅଦାଲତରେ ଜନସ୍ବାର୍ଥ ମାମଲା ରୁଜୁ କରିଥିଲେ। ଏହାର ଶୁଣାଣି ବେଳେ ଜଷ୍ଟିସ୍ ଏମ୍.ଆର୍. ଶାହା ଏବଂ ସି.ଟି. ରବିକୁମାରଙ୍କ ଖଣ୍ଡପୀଠ ଉପରୋକ୍ତ ଟିପ୍ପଣୀ ଦେଇଛନ୍ତି। ଏଭଳି ଧର୍ମ ପରିବର୍ତ୍ତନ ସମ୍ପର୍କରେ ରାଜ୍ୟଗୁଡ଼ିକରୁ ତଥ୍ୟ ସଂଗ୍ରହ କରାଯାଉଛି ବୋଲି କେନ୍ଦ୍ର ସରକାର ଜବାବ ରଖିଥିଲେ। ସବିଶେଷ ତଥ୍ୟ ଉପସ୍ଥାପନ ନିମନ୍ତେ କେନ୍ଦ୍ର ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ଅଦାଲତଙ୍କୁ ସପ୍ତାହେ ସମୟ ମାଗିଥିଲେ।
ପିଟିଶନର ଶୁଣାଣି ଯୋଗ୍ୟତାକୁ ନେଇ ଜଣେ ଆଇନଜୀବୀ ପ୍ରଶ୍ନ କରିବାରୁ ବେଶୀ ଚାଲାକି ଦେଖାଅ ନାହିଁ ବୋଲି ଖଣ୍ଡପୀଠ କହିଥିଲେ। ଆମେ ଏକ ସମାଧାନରେ ପହଞ୍ଚତ୍ବାକୁ ଏବଂ ସବୁ କିଛିକୁ ଠିକ୍ ବାଟରେ ନେବା ଲାଗି ଏଠି ବସିଛୁ। ଯଦି ପରୋପକାରର ଉଦ୍ଦେଶ୍ୟ ଭଲ ହୋଇଥାଏ, ତେବେ ସ୍ବାଗତଯୋଗ୍ୟ। ପରୋପକାରର ଉଦ୍ଦେଶ୍ୟ ଧର୍ମାନ୍ତରୀକରଣ ହେବା ଉଚିତ ନୁହେଁ ବୋଲି ଖଣ୍ଡପୀଠ କହିଛନ୍ତି। ଏହାକୁ ନେଇ ଦ୍ୱନ୍ଦ୍ୱ ସୃଷ୍ଟି କରା ନଯାଉ, କାରଣ ଏହା ଅତି ଗମ୍ଭୀର ପ୍ରସଙ୍ଗ ଏବଂ ସମ୍ବିଧାନ ବିରୋଧୀ। ଭାରତରେ ରହିବାକୁ ହେଲେ ଏହାର ସଂସ୍କୃତି ଅନୁଯାୟୀ କାର୍ଯ୍ୟ କରିବାକୁ ପଡ଼ିବ ବୋଲି ଖଣ୍ଡପୀଠ ଟିପ୍ପଣୀ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଡିସେମ୍ବର ୧୨ରେ ହେବ।
