ଛତ୍ରପୁର,୧୬।୧(ଦିଲ୍ଲୀପ ସାମଲ): ଏବେ ସବୁଠି ମିଲର୍ଙ୍କ ମନମାନିକୁ ନେଇ ଚାଷୀଙ୍କ ଅଭିଯୋଗ। କେଉଁଠି ମିଲର ୭୫ କେଜି ଧାନ ବସ୍ତାରେ ୭୯ କେଜି ମାଗୁଛନ୍ତି ତ କେଉଁଠି ୭୮ କେଜି ମାଗୁଛନ୍ତି ନଚେତ ଧାନ ଉଠିବ ନାହିଁ ବୋଲି ଚାଷୀଙ୍କୁ କହୁଛନ୍ତି ମିଲର । ଏହିଭଳି ଘଟଣା ଛତ୍ରପୁର ବ୍ଲକ ବିପୁଳିଙ୍ଗି ସେବା ସମବାୟ ସମିତି ଓ ଲକ୍ଷ୍ମୀପୁର ପଞ୍ଚାୟତରେ ଦେଖିବାକୁ ମିଳିଛି। ଚଳିତ ଧାନ ଅମଳ ସମୟରେ ଦୁଇଥର ଲଗାଣ ବର୍ଷାରେ ଚାଷୀ ସମ୍ପୂର୍ଣ୍ଣ ଭାଙ୍ଗି ଯାଇଥିବାବେଳେ ଏବେ ଏଫଏକ୍ୟୁ ମାନକୁ ନେଇ ମିଲର ମନମୁଖୀ ଶାସନ ପୁଣି ଚାଷୀର ଦଃୁଖକୁ ଦ୍ୱିଗୁଣିତ କରିଦେଇଛି । ଏହି ସମୟରେ ମିଲରଙ୍କ ରାଜୁତିରେ ଶିକାର ହେଉଛନ୍ତି ଶହ ଶହ ଚାଷୀ । ଏହି ବ୍ୟାପକ ଅବ୍ୟବସ୍ଥା ନେଇ ଶେଷରେ ସେମାନେ ଆଜି ବାଧ୍ୟ ହୋଇ ଜିଲା ଯୋଗାଣ ମୁଖ୍ୟାଳୟରେ ପହଞ୍ଚି ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି। ଚଳିତ ମାସ ୧୪ ତାରିଖ ଦିନ ଧାନ କିଣାର ବ୍ୟାପକ ଅବସ୍ଥା ନେଇ ବିପୁଳିଙ୍ଗି ସେବା ସମବାୟ ସମିତି କାର୍ଯ୍ୟାଳୟ ତାଲା ପକାଇଥିଲେ ଚାଷୀ। ପରେ ଏହାର ସମାଧାନ ନେଇ ଗତକାଲି ବୈଠକ ହୋଇଥିଲା। ଏପରିକି ୩ ରୁ ୪ ଥର ବୈଠକ ହୋଇ ଏକ ନିଷ୍ପତ୍ତି ମଧ୍ୟ ବାହାରିଥିଲା ବୋଲି ସେବା ସମବାୟ ସମିତି ସଭାପତି ପୂର୍ଣ୍ଣଚନ୍ଦ୍ର ଦାଶ କହିଛନ୍ତି। ପୂର୍ବଥର ଯେପରି ଚାଲିଥିଲା ସେହିପରି ଚାଲିବ କିନ୍ତୁ ଆଜି ମିଲର ଚାଷୀଙ୍କୁ ୭୫ କେଜିରେ ଧାନ ବସ୍ତାରେ ୩ କେଜି ଅଧିକ ମାଗୁଥିବା କହିଥିଲେ ସଭାପତି । ସେହିପରି ଲକ୍ଷ୍ମୀପୁରରେ ମଧ୍ୟ ଅନୁରୁପ ଘଟଣା। ସେଠାରେ ୭୫ କେଜି ଧାନ ବସ୍ତାରେ ୪ କେଜି ଅଧିକ ମାଗୁଛନ୍ତି ବୋଲି ଲକ୍ଷ୍ମୀପୁର ଚାଷୀ ଏସ.ସୁର୍ଦଶନ ରେଡି କହିଛନ୍ତି । ଏହିପରି ମଣ୍ଡି ଅବ୍ୟବସ୍ଥା ଆଗରୁ କେବେ ଆମେ ଦେଖିନଥିଲୁ କହିଛନ୍ତି ଚାଷୀ ବୁଲୁ ବିଷୋଇ। ଏ ପର୍ଯ୍ୟନ୍ତ ମଣ୍ଡିରେ କୌଣସି ସରକାରୀ କର୍ମଚାରୀଙ୍କ ଦେଖାନାହିଁ। ଏ ସରକାର ଚାଷୀଙ୍କର ସରକାର ନୁହନ୍ତି, ଚାଷୀଙ୍କ ପାଇଁ ଏହି ସରକାର ଅଯୋଗ୍ୟ ସରକାର ବୋଲି କହିଛନ୍ତି। କିପରି ଧାନ ସୁରୁଖୁରୁରେ ଉଠିବ ତାର ବ୍ୟବସ୍ଥା କରାଯିବ ବୋଲି ଭାରପ୍ରାପ୍ତ ମୁଖ୍ୟ ଯୋଗାଣ ଅଧିକାରୀ ପୁଷା ମୁଣ୍ଡା ଚାଷୀଙ୍କୁ କଥା ଦେଇଛନ୍ତି। ଅନ୍ୟପକ୍ଷରେ ସଠିକ୍ ସମୟରେ ଧାନ ନ ଉଠିଲେ ଅଭାବୀ ବିକ୍ରି କରିବା ପାଇଁ ଚାଷୀ ବାଧ୍ୟ ହେବେ । ଯାହାଫଳରେ ଚାଷୀ କୁଇଣ୍ଟାଲ ପିଛା ଯେଉଁ ୩୧ଶହ ଟଙ୍କା ପାଇବେ ବୋଲି ଆଶା ରଖିଥିଲେ ସେମାନେ ବାଧ୍ୟ ହୋଇ ଦଲାର ଶିକାର ହୋଇ ୧୭ଶହରୁ ୧୮ ଶହ ଟଙ୍କାରେ ବିକ୍ରି କରିବାକୁ ବାଧ୍ୟ ହେବେ। ତେଣୁ ତୁରନ୍ତ ଜିଲାପ୍ରଶାସନ ଏଥିରେ ହସ୍ତକ୍ଷେପ କରି ଏହାର ସମାଧାନ କରି ସମସ୍ତ ପଞ୍ଜିକୃତ ଚାଷୀଙ୍କ ଧାନ ଉଠାଣ କରିବା ପାଇଁ ଦାବି କରିଛନ୍ତି ଚାଷୀ ନେତା ସିମାଞ୍ଚଳ ନାହାକ, ନିଳକଣ୍ଠ ଦାଶ.ଶଙ୍କର ଦାଶ, ଦୀଲ୍ଲିପ ଛୋଟରାୟ ପ୍ରମୁଖ ନଚେତ ଜିଲାରେ ଚଳିତ ବର୍ଷ ୬୦ ରୁ ୭୦ ପ୍ରତିଶତ ଚାଷୀ ମଧ୍ୟ ମଣ୍ଡିରେ ବିକ୍ରି କରିବା କଷ୍ଟକର ହୋଇଯିବ ବୋଲି କହିଛନ୍ତି। ସୂଚନା ଥାଉକି ଜିଲାରେ ୪୭୮ ସୋସାଇଟ ଚଳିତ ବର୍ଷ ଧାନ କିଣାରେ ସାମିଲ ହୋଇଛନ୍ତି, ସେଥିମଧ୍ୟରୁ ୩୬୬ ସେବା ସମାବୟ ସମିତି, ୧୧୧ଟି ସ୍ବୟଂସହାୟକ ଗୋଷ୍ଠୀ ଓ ଗୋଟିଏ ପାଣି ପଞ୍ଚାୟତ ଚଳିତ ଥର ଏହି ଧାନ କିଣା ପ୍ରକ୍ରିୟାରେ ସାମିଲ ହୋଇଛନ୍ତି। ଜିଲାରେ ଚଳିତ ମାସ ତିନି ତାରିଖରୁ ମଣ୍ଡି ଖୋଲାଯାଇଥିବା ବେଳେ ଏଯାବତ ୪୧୪ଟି ମଣ୍ଡିରେ ୨୩୭୫ ଜଣ ଚାଷୀ ୧ଲକ୍ଷ ୨୦ହଜାର ୪୯୨.୭୦ କୁଇଣ୍ଟାଲ ଧାନ ବିକ୍ରି କରିଥିବା ଜଣାପଡିଛି । ଚଳିତ ବର୍ଷ ୧ ଲକ୍ଷ ୪୬ ହଜାର ୫୦୪ ଜଣ ଚାଷୀ ପଞ୍ଜିକରଣ କରିଛନ୍ତି । ଜିଲାକୁ ଚଳିତ ବର୍ଷ ଚାଉଳ ବାବଦକୁ ୩୦୦୨୭୮ ମେଟ୍ରିକ ଟନ୍ ତଥା ୩୦ ଲକ୍ଷ ୨୭୮୦ କୁଇଣ୍ଟାଲ ପ୍ରଥମ ପର୍ଯ୍ୟାୟରେ ଟାର୍ଗେଟ ଆସିଛି। ଯାହାକି ଧାନ ବାବଦରେ ୪୪୮୧୭୬.୧୦ ମେଟ୍ରିକ ଟନ୍ ତଥା ୪୪ ଲକ୍ଷ ୮୧ହଜାର ୭୬୧ କୁଇଣ୍ଟାଲ।
