ବିଳାସପୁର,୧୫।୮: ଦେଶ ପାଳନ କରିଛି ୭୪ ତମ ସ୍ବାଧିନତା ଦିବସ। ହେଲେ ଆଜି ବି କେତେକ ସ୍ଥାନରେ ପରାଧିନତାର ଝଲକ ଦେଖିବାକୁ ମିଳୁଛି। ମଣ୍ଡି ଓ ବିଳାସପୁର ସୀମାରେ ୮ ପରିବାର ଏମିତି ଅଛନ୍ତି ଯେଉଁମାନେ ବିଗତ ପ୍ରାୟ ୪ ବର୍ଷ ହେବ ଗୁମ୍ଫାରେ ରହି ଆସୁଛନ୍ତି। କେବଳ ପୁରୁଷ ନୁହେଁ ମହିଳା, ଶିଶୁ ମଧ୍ୟ ଏଠାରେ ବସବାସ କରୁଛନ୍ତି। ଏମାନେ ଆଦିମ ଅଧିବାସୀଙ୍କ ଭଳି ଜୀବନ କାଟୁଛନ୍ତି। ସରକାର ଓ ଜିଲା ପ୍ରଶାସନ ମଧ୍ୟ ଏକଥା ଜାଣନ୍ତି। ଏବେ ଭୂମିହୀନଙ୍କ ପାଇଁ ବିଭିନ୍ନ ଯୋଜନା କରାଯାଇଥିଲେ ମଧ୍ୟ ଏମାନେ ଏଥିରୁ ବାଦ୍ ପଡିଛନ୍ତି। ଅନ୍ୟପଟେ ଏମାନଙ୍କୁ ଗୁମ୍ଫାରୁ ବାହାର କରି ସାଧାରଣ ଜୀବନର ବାଟ ଦେଖାଇବାକୁ ମଧ୍ୟ କେହି ଆଗେଇ ଆସି ନାହାନ୍ତି। ସୂଚନାଯୋଗ୍ୟ, ଏମାନଙ୍କର ଜମିବାଡି ଥିଲେ ମଧ୍ୟ ଏମାନେ ଆଜି ବାସଶୂନ୍ୟ। କାରଣ ହେଉଛି କୋଲବାନ୍ଧ ପରିଯୋଜନାରେ କେନାଲ ନିର୍ମାଣ କରାଯିବା ପରେ ଏମାନଙ୍କ ଜମି ଓ ଘରଦ୍ୱାର ଭୂସ୍ଫଳନ ଯୋଗୁ ମାଟିରେ ମିଶି ଯାଇଛି। ୨୦୧୪-୧୫ରେ କୋଲବାନ୍ଧ କେନାଲ ତିଆରି କରାଯାଇଥିବା ବେଳେ ୨୦୧୬ରେ ହୋଇଥିବା ଭୂସ୍ଫଳନରେ ଏମାନେ ବାସହରା ହୋଇ ଯାଇଥିଲେ।
