ମୁମ୍ବାଇ: ବଲିଉଡ ଅଭିନେତା ଗୋବିନ୍ଦାଙ୍କୁ ଲାଲବାଗଚା ରାଜାଙ୍କ ଦର୍ଶନ କରି ଆଶୀର୍ବାଦ ନେଉଥିବା ବେଳେ ତାଙ୍କ କଥିତ ଗର୍ଲଫ୍ରେଣ୍ଡ ଓ କୋ-ଷ୍ଟାର୍ କୋମଲ ରାଣୀ ସ୍ବର୍ଣ୍ଣକାରଙ୍କ ସହ ଦେଖିବାକୁ ମିଳିଛି। ଅନ୍ୟପଟେ ତାଙ୍କ ପତ୍ନୀ ସୁନୀତା ଆହୁଜା ଏକାକୀ ପଣ୍ଡାଲରେ ପହଞ୍ଚି ପୂଜା କରିଥିଲେ। ଏହାପରେ କଶ୍ମୀରା ଶାହା ସୋସିଆଲ ମିଡିଆରେ ଏକ ପୋଷ୍ଟ ଶେୟାର କରି ‘ଘର ଭାଙ୍ଗୁଥିବା ଲୋକଙ୍କୁ ପ୍ରୋତ୍ସାହନ ନଦେବା’କୁ ଅପିଲ କରିଥିଲେ। ଏହି ପୋଷ୍ଟ ପରେ ସେ ଗୋବିନ୍ଦାଙ୍କୁ ଟାର୍ଗେଟ କରିଥିବା ନେଇ ସୋସିଆଲ ମିଡିଆରେ ଅଟକଳ ଆରମ୍ଭ ହୋଇଛି।
ବୁଧବାର କଶ୍ମୀରା ଶାହା ଇନଷ୍ଟାଗ୍ରାମରେ ଏକ ଫଟୋ ସହ ଏକ ନୋଟ ଶେୟାର କରିଥିଲେ। ସେଥିରେ ସେ ଲେଖିଥିଲେ, ‘ମୁଁ ବିଶ୍ୱାସ କରିପାରୁନାହିଁ ଯେ ଲୋକେ ଜଣେ ‘ରହସ୍ୟମୟ ମହିଳା’ଙ୍କୁ ପ୍ରୋତ୍ସାହନ ଦେଉଛନ୍ତି ଏବଂ ତାଙ୍କ ବିଷୟରେ ପୋଷ୍ଟ କରୁଛନ୍ତି। ଘର ଭାଙ୍ଗୁଥିବା ଲୋକଙ୍କୁ ପ୍ରୋତ୍ସାହନ ଦେବା ବନ୍ଦ କରନ୍ତୁ ଏବଂ ନିଜ ସମର୍ପିତ ପତ୍ନୀଙ୍କୁ ଛାଡ଼ି କମ ବୟସର ଆକାଂକ୍ଷୀ ଯୁବତୀଙ୍କ ସହ ଚାଲିଯାଉଥିବା ପୁରୁଷଙ୍କୁ ଆଦର୍ଶ ମାନିବା ବନ୍ଦ କରନ୍ତୁ। ଏହା ଘୃଣ୍ୟ। ଆମ ଲୋକଙ୍କଠାରୁ ଅଧିକ ବୁଦ୍ଧିମତା ଓ ନୈତିକତା ଆଶା କରୁଛି। ଦୟାକରି ଏହି ପାଗଳାମିକୁ ବନ୍ଦ କରନ୍ତୁ।’
କଶ୍ମୀରା ତାଙ୍କ ପୋଷ୍ଟରେ କାହାର ନାଁ ନେଇନଥିଲେ। କିନ୍ତୁ ଅନେକ ସୋସିଆଲ ମିଡିଆ ୟୁଜର୍ସ ଅଟକଳ କରିଛନ୍ତି ଯେ ସେ ତାଙ୍କ ‘ମାମୀ’ ସୁନୀତା ଆହୁଜାଙ୍କ ସମର୍ଥନରେ ଏହି ପୋଷ୍ଟ କରିଛନ୍ତି। କାରଣ, ଗୋବିନ୍ଦାଙ୍କୁ କୋମଲ ରାଣୀ ସ୍ବର୍ଣ୍ଣକାରଙ୍କ ସହ ଦେଖାଯିବାର କିଛି ସମୟ ପରେ ଏହି ପୋଷ୍ଟ ସାମ୍ନାକୁ ଆସିଥିଲା।
ଜଣେ ଫ୍ୟାନ କମେଣ୍ଟ କରି ଲେଖିଥିଲେ, ‘ସୁନୀତାଙ୍କୁ ଆପଣଙ୍କ ଭଳି ଜଣେ ଶକ୍ତିଶାଳୀ ମହିଳାଙ୍କ ସମର୍ଥନ ମିଳୁଥିବା ଦେଖି ବହୁତ ଭଲ ଲାଗିଲା।’ ଆଉ ଜଣେ ଲେଖିଥିଲେ, ‘ସତ୍ୟର ସାଥ ଦେଇଥିବାରୁ ଧନ୍ୟବାଦ। ସୁନୀତାଜୀଙ୍କୁ ଆପଣଙ୍କ ଆବଶ୍ୟକତା ଥିଲା।’ ଅନ୍ୟ ଜଣେ ଫ୍ୟାନ କହିଥିଲେ, ‘କଶ୍ମୀରା, ଆପଣ ସୁନୀତାଜୀଙ୍କ ସାଥ ଦେଇଥିବାରୁ ଆପଣଙ୍କ ପାଇଁ ଗର୍ବିତ।’
ବୁଧବାର ଗୋବିନ୍ଦା ଲାଲବାଗଚା ରାଜାଙ୍କ ପଣ୍ଡାଲରେ ପହଞ୍ଚି ଭଗବାନ ଗଣେଶଙ୍କ ଆଶୀର୍ବାଦ ନେଇଥିଲେ। ତେବେ ଏଠାରେ ତାଙ୍କ ସହ କୋମଲ ରାଣୀ ଥିବା ଘଟଣା ଚର୍ଚ୍ଚାର କାରଣ ପାଲଟିଥିଲା। କୋମଲ ରାଣୀ ଗୋବିନ୍ଦାଙ୍କ ଆଗାମୀ ଫିଲ୍ମ ‘ରୂପା’ରେ ତାଙ୍କ ସହ ନଜର ଆସିବେ ବୋଲି କୁହାଯାଉଛି। ଲାଲବାଗଚା ରାଜାଙ୍କ ପଣ୍ଡାଲରେ ଦୁହିଁଙ୍କ ଏକ ଭିଡିଓ ସୋସିଆଲ ମିଡିଆରେ ଦ୍ରୁତ ଗତିରେ ଭାଇରାଲ ହୋଇଛି।
