ପୁରୀ,୬।୧(ଅଜିତ୍ କୁମାର ମହାନ୍ତି): ଆସନ୍ତା ୮ ତାରିଖରୁ ୩ ଦିନ ବ୍ୟାପୀ ଭୁବନେଶ୍ୱରରେ ପ୍ରବାସୀ ଭାରତୀୟ ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି। ପ୍ରବାସୀ ଭାରତୀୟଙ୍କ ପରିଭ୍ରମଣ ପାଇଁ ସରକାରଙ୍କ ପକ୍ଷରୁ ଡବଲ୍ ଡେକର୍ ବସ୍ର ବ୍ୟବସ୍ଥା କରାଯାଉଛି। ଭୁବନେଶ୍ୱରଠାରେ ସମ୍ମିଳନୀ ଆୟୋଜିତ ହେଉଥିଲେ ମଧ୍ୟ ପ୍ରବାସୀ ଭାରତୀୟମାନେ ପୁରୀର ବିଭିନ୍ନ ସ୍ଥାନ ଭ୍ରମଣ କରିବାର କାର୍ଯ୍ୟକ୍ରମ ରହିଛି। ତେଣୁ ମୁମ୍ବାଇରୁ ଆସିଥିବା ଡବଲ୍ ଡେକର୍ ବସ୍ର ଟ୍ରାଏଲ ରନ୍ ରବିବାର ପୁରୀରେ କରାଯାଇଛି। ବସ୍ ଭୁବନେଶ୍ୱରରୁ ପୁରୀ ଅଭିମୁଖେ ଆସି ମାଳତୀପାଟପୁର ବସ୍ଷ୍ଟାଣ୍ଡଠାରେ ପହଞ୍ଚତ୍ଥିଲା। ସେଠାରୁ କଡ଼ା ସୁରକ୍ଷା ମଧ୍ୟରେ ମାଳତୀପାଟପୁରଠାରୁ ଟ୍ରାଏଲ୍ ରନ୍ ଆରମ୍ଭ କରି ଶ୍ରୀସେତୁ ଦେଇ ଶ୍ରୀଜଗନ୍ନାଥ ବଲ୍ଲଭ ପିଲିଗ୍ରିମ୍ ସେଣ୍ଟର (ଜେବିପିସି)ରେ ବସ୍ ପହଞ୍ଚତ୍ଥିଲା। ପରେ ଶ୍ରୀସେତୁ ଦେଇ ମଙ୍ଗଳାଘାଟ ଛକ ଦେଇ ଷ୍ଟର୍ଲିନ୍ ଛକ, ସମୁଦ୍ରକୂଳ ଦେଇ ସୁଭାଷ ବୋଷ ଛକରେ ପହଞ୍ଚିଥିଲା। ସେଠାରୁ ପ୍ରତ୍ୟାବର୍ତ୍ତନ କରି ଷ୍ଟର୍ଲିନ୍, ମଙ୍ଗଳାଘାଟ ଛକ ଦେଇ ଶେଷରେ ସମଙ୍ଗ ପାର୍କିଂରେ ବସ୍ଟି ରହିଥିଲା। ପ୍ରବାସୀ ଭାରତୀୟଙ୍କୁ ପରିଭ୍ରମଣ କରାଇବା ସହ ସୁଖଦ ଅନୁଭୂତି ଦେବାକୁ ଏହି ଡବଲ୍ ଡେକର୍ ବସ୍ ପୁରୀ ସମେତ କୋଣାର୍କ, ସାତପଡ଼ାକୁ ଯାତ୍ରା କରିବ। ଏହି ବସ୍ରେ ସମୁଦାୟ ୬୬ଟି ସିଟ୍ ରହିଥିବାବେଳେ ପ୍ରବାସୀ ଭାରତୀୟଙ୍କ ସେଫ୍ଟି ଏବଂ ସିକ୍ୟୁରିଟି ଉପରେ ଧ୍ୟାନ ଦିଆଯାଇଛି। ପୁରୀ ପରିବହନ ଅଧିକାରୀ ରବିନ ପଟ୍ଟନାୟକ କହିଛନ୍ତି, ପ୍ରବାସୀ ଭାରତୀୟଙ୍କ ଯାତ୍ରା ନିମନ୍ତେ ବସ୍ ଆସିଛି।
