ଭୁବନେଶ୍ୱର,୨୪।୧୧(ବ୍ୟୁରୋ): ଧରିତ୍ରୀ’ ପକ୍ଷରୁ ଆୟୋଜିତ ୟୁଥ୍ କନ୍କ୍ଲେଭ୍ର ଅନ୍ୟ ଏକ ଆକର୍ଷଣ ଥିଲା ‘କ୍ଲାଇମେଟ ଚେଞ୍ଜ’ ପ୍ରଦର୍ଶନୀ। ପରିବେଶ ସଂରକ୍ଷଣ ଉପରେ କାମ କରୁଥିବା ଯୁବପିଢୀ ତଥା ଅନୁଷ୍ଠାନମାନଙ୍କ କାର୍ଯ୍ୟଧାରାକୁ ନେଇ ଏକ ପ୍ରଦର୍ଶନୀ ଅନୁଷ୍ଠିତ ହୋଇଥିଲା। ଏଥିରେ ମୋଟ୍ ୧୩ ଜଣ ବ୍ୟକ୍ତି ତଥା ଅନୁଷ୍ଠାନ ସ୍ଥାନ ପାଇଥିଲେ। ସେମାନଙ୍କ ମଧ୍ୟରେ ଥିଲେ ‘ଓଡ଼ିଶା ପର୍ଯ୍ୟାବରଣ ସଂରକ୍ଷଣ ଅଭିଯାନ’ (ଓପିଏସ୍ଏ)। ଏହାର ପ୍ରତିଷ୍ଠାତା ସଭାପତି ହେଉଛନ୍ତି ସୌମ୍ୟରଞ୍ଜନ ବିଶ୍ୱାଳ। ଅସ୍ତରଙ୍ଗର ଏହି ଅଭିଯାନ ୨୦୧୪ରୁ ଉପକୂଳ ଓଡ଼ିଶାରେ ଅଲିଭ୍ରିଡ୍ଲେ କଇଁଛ ଏବଂ ହେନ୍ତାଳ ବନ ସୁରକ୍ଷା ଉପରେ କାର୍ଯ୍ୟ କରୁଛି। ସେହିପରି ପ୍ରଦର୍ଶନୀରେ ‘ସାତ୍ତ୍ୱିକ ସୋଲ୍ ଫାଉଣ୍ଡେଶନ’(ଏସ୍ଏସ୍ଏଫ୍) ସ୍ଥାନ ପାଇଥିଲା। ଏସ୍ଏସ୍ଏଫ୍ରେ ୧ହଜାରରୁ ଊର୍ଦ୍ଧ୍ୱ ସଦସ୍ୟ ରହିଥିବା ବେଳେ ପରିବେଶ ଏବଂ ଜଳବାୟୁ ପରିବର୍ତ୍ତନ ଉପରେ ଲୋକଙ୍କୁ ସଚେତନ କରାଉଛନ୍ତି।
ସମୁଦ୍ରକୂଳରୁ ଆରମ୍ଭ କରି ପାହାଡ଼, ଜଙ୍ଗଳ ଅଞ୍ଚଳ, ପର୍ଯ୍ୟଟନ ସ୍ଥଳ, ସର୍ବସାଧାରଣ ସ୍ଥାନ, ନଦୀକୂୂଳ ଅଞ୍ଚଳ ସହ ବିଭିନ୍ନ ସ୍କୁଲ, କଲେଜ ଏବଂ ଶିକ୍ଷାନୁଷ୍ଠାନରେ କର୍ମଶାଳା ଆୟୋଜନ କରି ସଚେତନତା କାର୍ଯ୍ୟକ୍ରମ କରାଯାଉଛି। ସେହିପରି ପ୍ରଦର୍ଶନୀର ଅନ୍ୟତମ ଆକର୍ଷଣ ସାଜିଥିଲା ଅନୁଗୋଳର ‘ସାଥି ପରିବାର’। ଜଙ୍ଗଲରେ ନିଆଁ ଲାଗିବା ଦ୍ୱାରା ଜୈବ ବିବିଧତା ନଷ୍ଟ ହେଉଛି। ଏଥିସହ ବନ୍ୟ ଜୀବଜନ୍ତୁଙ୍କ ଜୀବନ ପ୍ରତି ବିପଦ ଦେଖା ଦେଉଛି। ତେଣୁ ଲୋକଙ୍କୁ ସଚେତନ କରିବା ପାଇଁ ମଙ୍ଗ ଧରିଛନ୍ତି ସିଦ୍ଧାର୍ଥ ପ୍ରଧାନ।
କେବଳ ସେତିକି ନୁହେଁ, ଅନୁଗୋଳକୁ ସାପ କାମୁଡ଼ା ମୃତ୍ୟୁଶୂନ୍ୟ ଜିଲା ଭାବେ ପରିଣତ କରିବା ପାଇଁ ସାଥି ପରିବାର ଲକ୍ଷ୍ୟ ରଖିଛି। ଏଥିପାଇଁ ଗତ ୩ବର୍ଷ ମଧ୍ୟରେ ଏକାଧିକ ବିଦ୍ୟାଳୟ ଏବଂ ପ୍ରାୟ ୧ଶହ ଗ୍ରାମରେ ସାପ କାମୁଡ଼ାକୁ ନେଇ ସଚେତନତା କାର୍ଯ୍ୟକ୍ରମ କରାଯାଇଛି। ସେହିପରି ୟୁନିସେଫ୍ ଦ୍ୱାରା ପରିଚାଳିତ‘ୟୁଥ୍ ଫର୍ ଓ୍ବାଟର’ ଏକ ମହତ୍ତ୍ୱାକାଂକ୍ଷୀ ଅଭିଯାନ। ଏହି ଅଭିଯାନ ପକ୍ଷରୁ ୧ଲକ୍ଷ ୩୫ହଜାରରୁ ଅଧିକ ଯୁବତୀ ଯୁବକଙ୍କ ପାଖରେ ଜଳବାୟୁ ପରିବର୍ତ୍ତନ ଏବଂ ଜଳ, ପରିମଳ ଓ ସ୍ବଚ୍ଛତା(ଓ୍ବାସ୍) ଉପରେ ସଚେତନତାବାର୍ତ୍ତା ପହଞ୍ଚି ପାରିଛି।
ଅପରପକ୍ଷେ କେବଳ ଅନୁଷ୍ଠାନ ନୁହେଁ ବରଂ ବ୍ୟକ୍ତିଗତ ସ୍ତରରେ ମଧ୍ୟ ଅନେକ ପରିବେଶର ସୁରକ୍ଷା ପାଇଁ ଅଣ୍ଟା ଭିଡିଛନ୍ତି। ସେମାନଙ୍କ କାର୍ଯ୍ୟଧାରାକୁ ମଧ୍ୟ ପ୍ରଦର୍ଶନୀରେ ସ୍ଥାନ ଦିଆଯାଇଥିଲା। ସେମାନଙ୍କ ମଧ୍ୟରେ ଅଛନ୍ତି ଗଞ୍ଜାମ ଜିଲା ଶେରଗଡ଼ର ନିରାକାର ବିଶୋଇ, ଖୋର୍ଦ୍ଧା ଜିଲା ବାଲିପାଟଣାର ରାହୁଲ ମହାରଣା, ନୟାଗଡ଼ ଜିଲାର ପପୁନ ସାହୁ, ପୁରୀ ଜିଲା ଗୋପ ବ୍ଲକ ଅନ୍ତର୍ଗତ ସିମିଳି ଗ୍ରାମ ପଞ୍ଚାୟତର ସମିତି ସଭ୍ୟ ବିଶ୍ୱଜିତ୍ ସ୍ବାଇଁ, ପାରାଦୀପର ଅମରେଶ ନରେଶ ସାମନ୍ତ, କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ୍ ଅଧୀନ ଓରଟ ଗ୍ରାମର ବାପି ଗୋଛାୟତ, ଢେଙ୍କାନାଳର ଶୁଭ୍ରାଂଶୁ କୁମାର ଶତପଥୀ, ଗଞ୍ଜାମ ଜିଲାର ସାଗର ପାତ୍ର, ଜନ୍ମେଜୟ ମିଶ୍ର।
